Read Paite Chin 2 KRONIKIL 32 Bible Online

2 KRONIKIL 32 - Paite Chin bible

2 KRONIKIL 32

¹Huchibang a muanhuaitak a thil a hihnung un Assuria kumpipa Sennakerib a hong kuan a, Judah gam ah a honglut a, kulh nei khuate a hong um a, lak a hong tum hi.

²Sennakerib a hong kuan a, Jerusalem hongsual a tum chih Hezekiah in a theih in,

³Khaw pawlam a tuite hihtat ding in a miliante leh a mi hatte a thuhilh a; huchi in a panpih uhi.

⁴Huchi in mi tampi a kikaikhawm ua, tui tengteng leh gamsung a luangsuak luite a ching tan ua, Assuria kumpipate a honglut ua, “Tui tampi bang ding in a hongnei mahmah ding ua” a chi uhi.

⁵Huchi in a kihangsak ua, kulh chipna tata a bawl a, insungte leh pawlam kulhte leng a bawlhoih hi. David khua ah Millo a hihkip a, galvante leh lumte tampi a bawl hi.

⁶Kidouna a mipi heutute a bawl a, khopi kongkhak mun za lai ah a samkhawm hi.

⁷“Hattak in, hangsantak in om unla, Assuria kumpipa leh a heute mipi lau kei unla, lunglel sam kei un:

⁸Amah lam a pang sa sepaih ahi ua, ei hon panpih ding leh hon dousak ding a ei lam a pang bel TOUPA i Pathian uh ahi ngal a” chi in lungmuanna thu a gen hi.

⁹Huai nung in Assuria kumpipa Sennakerib in; amah leh a sepaihte Lakish ah a om ua, Judah kumpipa Hezekiah leh Jerusalem a Judah mi tengteng kiang ah,

¹⁰“Assuria kumpipa Sennakerib in hichi in a chi, Jerusalem lak bang ahia na uplouhna uh?

¹¹Hezekiah in, TOUPA i Pathian in Assuria kumpipa khut a kipan hon hunkhe ding, chi in gilkial leh dangtak a na sihna ding un a honkhem ahi kei maw?

¹²Hezekiah mah ahi kei maw, a munsangte leh a maitamte chimsak a Judah mi leh Jerusalem a mite kiang a, Maitam khat ah Pathian na be ding ua, gimlim na hal ding uh, chi a thu pepa?

¹³Kei leh ka pute’n gamchih namchih tung a ka thilhih uh na theikei ua hia?

¹⁴Kua nam pathian ahia ka pute’n a hihman uh ka khut a kipan a a mite uh hunkhe thei om a, nou Pathian in leng ka khut a kipan a a hon hutkhiak theih tuamna ding?

¹⁵Huaiziak in Hezekiah in honkhem kei henla, huchibang in honkhem kei henla, amah um kei un; bang nam pathian leh bang gam pathian himhim a mite uh ka khut a kipan leh ka pute khut a kipan hunkhe thei a omkei ua; bangchi’n na Pathian un ka khut a kipan a hon hunkhe thei tuam mahmah dia?” chi in Jerusalem ah a mite a sawl hi.

¹⁶Huan, a mite’n huai sang a thupi in TOUPA Pathian leh a sikha Hezekiah tungtang thu a hoihlou lam in a gen uhi.

¹⁷Israelte TOUPA Pathian suheh ding leh a gense ding in lai a gelh lai hi. “Gamchih, namchih pathiante’n ka khut a kipan a mite uh a hunkhe theilou bangmah in Hezekiah Pathian in leng ka khut a kipan a mite a hunkhe kei hial ding” chi in.

¹⁸Khua a lak theihna ding un a mulkimsakna ding leh lungzin sakna ding in Jerusalem a kulh a omte Judah pau in ngaihtak in a kikou khum uhi.

¹⁹Jerusalem Pathian mihing khut a bawl khovel pathian banglel phet in a gen uhi.

²⁰Huchi in kumpipa Hezekiah leh Amoz tapa zawlnei Isai huaiziak in a thum ua, van a om a sam uhi.

²¹TOUPA’N angel a sawl a, huai in Assuria kumpipa giahmun a mihat hangsan tengteng leh makai heutute a that hi. Huchi in zum mahmah melpu in a gam lam ah a pai nawnta hi. Huan, a pathian inn a hohlai amah tapate mahmah in namsau in a that uhi.

²²Huchibang in TOUPA’N Hezekiah leh Jerusalem a mite Assuria kumpipa Sennakerib khut a kipan leh midang tengteng khut a kipan a humbit a, a kim ua mite lak ah a veng hi.

²³Huan, mi tampi in Jerusalem ah TOUPA adin thilpiak a hontawi ua, thil manpha pipite Judah kumpipa Hezekiah a hongpia ua; huai a kipan in namchih mitmuh in pahtawi in a omta hi.

²⁴Huailai in Hezekiah bel sizou ding in a china a, TOUPA kiang ah a thum a; huan, a dawng a, chiamtehna a pia hi.

²⁵Himahleh Hezekiah in amah ading a hoih kihih dungzui in ahihkei a, a lungtang a hong kisaktheih ziak in: huaiziak in a tung ah leh Judahte leh Jerusalem tung ah hehna a hongtung hi.

²⁶Himahleh Hezekiah in a lungtang kisaktheihna kisik in a kiniamkhiak nawn a, amah leh Jerusalem a mite toh; huchi in Hezekiah damsung in TOUPA hehna a tung uah a hongtung kei hi.

²⁷Huan, Hezekiah in sum leh pai a hau a, a thupita mahmah a; dangkasik, dangkaeng, suangmantam, gimlim, lum leh tuium-belsuan hoih pipi koihkhawmna in a lam hi.

²⁸Buh, uain, leh thau koihkhawmna in leng a lamlai a; gan chiteng koihna leh belam huang leng a bawl hi.

²⁹Huchi in, khuate leng a bawllai a, belamhon leh bawnghon a hau mahmah hi. Pathian in neizou tak in a bawl hi.

³⁰Hezekiah mah in Gihon lui tui saknung zaw pen a hubing a, David khua tumlam pang ah a luang khesak hi. Huchi in Hezekiah a thilhih tengteng ah a lamzang zel hi.

³¹Babulon miliante’n palai a sawl ua a gam a thillamdang a dot thu uah a lungtang om tengteng a theihtheihna ding in Pathian in a nusia in a ze-et hi.

³²Hezekiah thilhih dang tengteng, a thilhih hoihte ngai dih, Amoz tapa zawlnei Isai kilakna bu, Judah kumpipa leh Israel kumpipate tanchin bu ah a tuang hi.

³³Hezekiah a pi leh pute kiang ah a ihmu a, David tapate han mun paitouhna ah a vui ua; Judah tengteng leh Jerusalem a mite’n a sih ni’n thupitak in a gal uhi. A tapa Manasseh in a sik in vai a hawmta hi.