Read Paite Chin 2 KRONIKIL 33 Bible Online

2 KRONIKIL 33 - Paite Chin bible

2 KRONIKIL 33

¹Manasseh bel a vaihawm pattung in kum sawmlehnih ahi a; Jerusalem ah kum sawmnga leh nga vai a hawm hi.

²TOUPA mitmuh a thil hoihlou, Israel suante ma a TOUPA’N a delhkhiak Pathian theilou namte’n thil kihhuaitak a hih bang uh aman leng a hihzel hi.

³A pa Hezekiah in a hihchip nung munsangte a bawlpha a, Baalte ading in maitam a bawl a, Aserah limte a bawl a, van a om tengteng a bia a, a na uh a sem hi.

⁴“Jerusalem ah tangtawn in ka min a om ding” TOUPA’N a chihna TOUPA inn ah maitamte a bawl hi.

⁵TOUPA inn huangsung intual nih ah van a om tengteng ading in maitamte a bawl hi.

⁶Hinnom tapa guam ah mei ah a tate a lutsak a; aisante a ching a, bumte a ching a, dawi aisan siam zawlte leh bumsiamte a guaisek a; TOUPA thangpaisak ding in a mitmuh ah thil hoihlou a hih hi.

⁷Pathian in David leh a tapa Solomon kiang a, “Hiai inn leh Jerusalem khua a Israel chi tengteng lak a ka tel ah ka min tangtawn in ka omsak ding, a chih khitsa Pathian inn ah amah bawl, milim bawl tawm a koih hi.

⁸Thu ka piak tengteng leh dan tengteng, thuseh, thilhih ding Mosi zang a ka piakte a zuih peuhmah uleh a pi leh pute uh ka piaksa gam a kipan Israelte khe ka kalsuan khesak nawn kei ding” a chihna ah.

⁹Manasseh in Judahte leh Jerusalem a mite thil a hihkhial sak a; TOUPA’N Israelte ma a a hihman khitsa namte sang in a hihkhial zaw hi.

¹⁰Huan, TOUPA’N Manasseh leh a mite kiang ah thu a gen zel a; himahleh a limsak kei uhi.

¹¹Huaiziak in TOUPA’N Assuria sepaih heutute a sawl a, Manasseh khainiang in a khih ua, Kol a bunsak ua, Babulon ah a paipihta uhi.

¹²Huchi in, mangbang tak a a omlai in TOUPA a Pathian a zong a, a pi leh pute Pathian ma ah nakpitak in a kiniamkhiak hi.

¹³A kiang ah a thum a, hehpih a ngen a, a ngetna a ngaihkhiak sak a, Jerusalem ah a gam ah a pai nawnta hi.

¹⁴Huai nung in David khaw pawlam ah Gihon tumlam pang guam ah ngasa kongkhak lutna pha in kulh a bawl a, Ophel umsuak in sangpi in a dingsak a: Judah khua kulhnei tengteng ah heutu hangsantak tak a koih hi.

¹⁵Gamdang pathiante leh milimte, TOUPA inn a kipan a paimang a, TOUPA inn mual leh Jerusalem a maitam a bawl tengteng khua a kipan a paikhe vek uhi.

¹⁶TOUPA maitam a bawl a, lemna thillat kithoihnate, kipahthu gennate a lan a, Judahte bel TOUPA Israelte Pathian nasem ding in thu a pia hi.

¹⁷Mipite munsang ah a kithoih lailai ua; himahleh TOUPA a Pathian uh kiang ah kithoih ahi zawta hi.

¹⁸Manasseh tanchin dang tengteng, a Pathian kiang a a thum thute, TOUPA Israelte Pathian min a zawlnei in a kiang a thu a gente uh ngai dih, Israel kumpipate tanchin lak ah a tuang hi.

¹⁹A thumnate, Pathian in a hehpihna leh a kiniamkhiak ma in a gitlouhna tengteng, munsang a bawl a, Asher leh milim bawltawma bawlkhiakna mun tengteng leng ngai dih, Hozai tanchin gelhna bu ah a tuang vek ahi.

²⁰Huchi in Manasseh bel a pi leh pute kiang ah a ihmu a, amah inn ah a vui ua; a tapa Ammon in a sik in vai a hawmta hi.

²¹Ammon bel a vaihawm pattung in kum sawmnih leh nih ahi a; Jerusalem ah kum nih vai a hawm hi.

²²A pa Manasseh hihmah bang in TOUPA mitmuh in thil hoihlou a hih a; a pa Manasseh in a bawl milim bawltawm tengteng kiang ah Ammon a kithoih a, a na a sem hi.

²³A pa Manasseh kiniamkhiak bang in TOUPA ma ah a kiniamkhiak kei a. Ammon a gilou semsem hi.

²⁴Huchi in, a sikhate’n a sawm ua, amah inn ah a that uhi.

²⁵Himahleh Ammon sawmmi tengteng mipi’n a thatvek nawn ua; mipite’n a tapa Josiah a sik in kumpipa ding in a bawlta uhi.