Read Paite Chin 2 KRONIKIL 34 Bible Online

2 KRONIKIL 34 - Paite Chin bible

2 KRONIKIL 34

¹Josiah in a vaihawm pattung in kum giat a upa ahi; Jerusalem ah kum sawmthum leh khat vai a hawm hi.

²TOUPA mitmuh in thil hoih a hihzel a, a pu David lampite a zui a, taklam ah hiam, veilam ah hiam a pialsan kei hi.

³Kum giat a vaihawm kum, naupang tak a hihlai a kipan him in a pu David Pathian a zong pan a; kum sawmlehnih a vaihawm kum in Judah gam leh Jerusalem a munsangte, Asherte, milim bawltawmte, milim suntawmte a hihbei a.

⁴Baal maitamte a mitmuh in a chimsak ua; huaite sang a sangzaw ni limte a phuk a; Asherte, milim bawltawmte, milim suntawmte a hihkham vek a, a kiang ua kithoihmite han tung ah a thehzak hi.

⁵Siampu guhte a maitamte uah a hal a, Judah gam leh Jerusalem a hihsiang a.

⁶Huchi mah bang in Manasseh, Ephraim, Simeon leh Naphtali khuate tan in ahihvek hi.

⁷Maitamte a chimsak a, Asherte, milim bawltawmte a hihkham a, Israel gam tengteng a milimte a phukvek a, Jerusalem ah a pai nawn hi.

⁸Huan, a vaihawm kum sawmlehgiat kum, a gam leh innte a hihsiang kum in Azaliah tapa Saphan, khaw ukpa Maaseiah, Joahaz tapa Laigelhmi Joah TOUPA a Pathian inn bawlhoih ding in a sawl hi.

⁹Siampu Hilkiah kiang ah a hoh ua, kongkhak ngak Levite’n Manasseh mite, Israel omlaite, Judah mi leh Benjamin mite, Jerusalem a mite kiang a kipan a na lakkhawm uh, Pathian inn a hong koih uh dangka a pia uhi.

¹⁰Huchi in, TOUPA inn lammi nasemmite a pia ua; TOUPA inn nasem mite’n inn bawlmite leh zemmite a pia uhi.

¹¹Judah Kumpipate’n a hihsiat uh bawlhoihna ding in suangsekte, a pehnate leh a inkamte ding singleina ding in khutsiamte leh inn lammite a pia uhi.

¹²Huchi in, mite’n muanhuaitak in nna a sem ua; a heutu uh, nasep ngaihtuahmite, Merari tapate lak a Levi mi Jahath leh Obadiah, Kohath mi tapate lak a mi Zekariah leh Mesullamte ahi ua; Levi mi, midang, thil tum siam tengteng toh;

¹³A puak a puakthoh mite heutu leh na chiteng semmite sep ding ngaihtuahmi ahi uhi: laigelhmite, heutute, kongkhak ngakmite Levi mite lak a mi ahi uhi.

¹⁴Huan, TOUPA inn a hong koih uh sumte a suah ua leh, siampu Hilkiah in Mosi zang a a piak TOUPA dan bu a mukhia hi.

¹⁵Huchi in, Hilkiah in Laigelhmi Saphan kiang ah, “TOUPA inn ah danbu i mu kheta uh” a chi a. Huan Hilkiah in laibu Saphan a pia hi.

¹⁶Huan, Saphan in laibu kumpipa kiang ah a paipih a, “Na sikhate’n hih ding a seh tengteng a hih uh.

¹⁷TOUPA inn a dangka om a bungkhia ua, heutute leh nasemmite a pia uh” chi in thu a tun hi.

¹⁸Laigelhmi Saphan in, “siampu Hilkiah in laibu a honpia” chi in kumpipa a hilh a, kumpipa ma ah a sim hi.

¹⁹Hichi ahi a, kumpipa’n Danthute a zak in, a puan a botkek hi.

²⁰Kumpipa’n Hilkiah, Saphan tapa Ahikam, Mikah tapa Abdon, Laigelhmi Saphan leh kumpipa sikha Asaiah thu a pia hi.

²¹“Kuan unla, danthu na muhkhiak tungtang thu uah kei leh Israel leh Judah gam a mite ading in TOUPA hon dotsak dih ua; I pi leh pute’n hiai danbu a tuang bang a TOUPA thu a zuihlouh ziak un i tung uah TOUPA thangpaihna a hongom mahmah ngal a” chi in.

²²Huchi in kumpipa’n thu a piakmite leh Hilkiah puansilh kempa Hasrah tapa Tokhat tapa Shallum zi zawlnei Huldah kiang ah a vahoh ua, huai thu ah a va houpih uhi. Amah bel Jerusalem Misneh a om ahi.

²³Huan, aman a kiang uah, TOUPA, Israelte Pathian in hichi in a chi; “Ka kiang a nou hon sawlpa hilh unla, TOUPA’N hichi in a chi:

²⁴‘Ngai dih ua, hiai mun leh asung a omte tung ah thil hoihlou ka tungsak ding a, Judah kumpipa ma a ki simkhia, laibu a tuang hamsia tengteng leng;

²⁵A khut thilhih ua hon hehsakna ding ua hon lehngatsan a milim dangte ding a gimlim a hal ziak un hiai mun tung ah ka hehna sun ahi a, daihsak ahi kei ding,’ chi in.

²⁶Himahleh TOUPA thu dong ding a nou hon sawlpa Judah kumpipa kiang ah, hichibang in chi un, ’TOUPA, Israelte Pathian in hichi in a chi: Na thuzakte tungtang thu ah,

²⁷Na lungtang hihnem a a om ziak a Pathian ma a na kiniamkhiak a, hiai mun tungtang thu leh asung a omte tungtang thu na zak a, ka ma a na kiniamkhiak a, na puan na bohkek a, ka ma a na kah ziak in ken leng na thu ka na ngaikhia hi.

²⁸Ngai dih, na pi leh na pute kiang ah k’on hohsak ding a, na han ah lungmuangtakin na pai ding a, hiai mun leh asung a omte tung a k’on tunsak ding thil hoihlou tengteng na mit in a mu kei ding, chi in, gen in’ ” a chi hi. Huchi in, kumpipa kiang ah thu a tunta uhi.

²⁹Huchi in kumpipa’n mi a sawl a, Judah gam leh Jerusalem a Upa tengteng a samkhawm hi.

³⁰Huchi in, kumpipa leh Judah mi tengteng leh Jerusalem a mi tengteng, siampu leh Levite, mipi tengteng a lian a neu in TOUPA inn ah a hohtou ua; TOUPA inn a muhkhiak thukhun bu a thu tengteng a bil ua zak in a sim hi.

³¹Kumpipa bel a mun ah ading a, huai laibu a tuang thukunte hihkip ding in a lungtang tengteng, a kha tengteng a TOUPA zuiding leh a thupiakte, a thu theihsakte, a thusehte pom ding in TOUPA ma ah thu a khung uhi.

³²Jerusalem leh Benjamin mi tengteng huchibang a om ding in a chi ua. Huan, Jerusalem a mite’n Pathian, a pi leh pute uh Pathian thukhun bang in a hih uhi.

³³Huchi in, Josiah hi in Israel gam in a huap tengteng a kipan thilkihhuai tengteng a paimang a, Israel gam a om tengteng TOUPA a Pathian uh na a semsak hi. A damsung in TOUPA a pi leh pute uh Pathian a zuih uh a pialsan kei uhi.