Read Paite Chin 2 KRONIKIL 35 Bible Online

2 KRONIKIL 35 - Paite Chin bible

2 KRONIKIL 35

¹Huan, Josiah in Jerusalem ah TOUPA din Paikan Ankuang a bawl a; a kha khatna, ni sawm leh ni li ni’n Paikan Ankuangluina ding a gou hi.

²Huchi in, siampute a nasep uh a sehsak a, TOUPA inn a nasepna sem ding in a hanthawn hi.

³Israel mite sinsakmi, Pathian ading a hihtuam Levite kiang ah, “Israel kumpipa David tapa Solomon inn lam ah bawm siangthou koih un; na liangzang ua zawn a kiphamohta kei ding; TOUPA na Pathian uh leh a mi Israelte na semta un.

⁴Israel kumpipa David gelh bang leh a tapa Solomon gelh bang in na inkuan intekpen dungzui zel in a pawlpawl in kisa un.

⁵Na unaute uh inkuan intekpen dungzui zel in Levite tuam a tantuan nei in Mun Siangthou ah om un.

⁶Paikan Ankuangluina ding gou unla, kihihsiangthou unla, Mosi zang a TOUPA gen bang hih ding in na unaute uh ding in bawl un” a chi hi.

⁷Huchi in, Josiah in huai a mi om tengteng Paikan Ankuang adia lan ding in ganhon lak a belamnou leh kel nou sing thum leh bawngtal sang thum a pia a: huaite kumpipa sum lak a ahi.

⁸A miliante’n mipite, siampute, Levite amau ut thu a lan ding in a pia uhi. Pathian inn heutu, Hilkiah, Zekariah leh Jehielte’n Paikan Ankuang dia lan ding in gan nou sang nih leh za guk leh bawngtal za thum siampute a pia uhi.

⁹Konaniah, a unau Semaiah leh Nethaneel, Levite heutu Hasabiah, Zeiel leh Jozabadte’n leng Paikan Ankuang dia lat ding in Levite gan nou sang nga leh bawngtal za nga a pia uhi.

¹⁰Huchi in nasepna a bawl ua, kumpipa thupiak bang in siampute a mun uah ading ua, Levite a pawl dan bangzel un.

¹¹Paikan Ankuangluina ding a gou ua, siampute’n sisan a theh ua, Levite’n a vun a hawk uhi.

¹²Huan, Mosi laibu a tuang bang a inkuan khen dan dungzui zel a TOUPA kiang a lat ding a piak ding in haltum thillatte a lasawn ua. Bawngtalte leng huchi mah bang in a hih uhi.

¹³Huchi in, Paikan Ankuangluina ding a dan bang in a em min ua; thillat siangthou sa bel, bel, bel khainanei, bel gongza in a ui ua, mi tengteng kiang ah a paipih uhi.

¹⁴Huaikhit in amau leh siampute ading a bawl ua; Aron ta siampute haltum thillat leh sathau lan in zan tanpha in a buai ngal ua; huaiziak in Levite’n amau leh Aron ta siampute ading a bawl uhi.

¹⁵David, Asaph, Heman leh kumpipa zawlnei Jeduthunte thupiak bang in lasami Ashaph tapate a mun uah ading ua, kongkhak ngakmite bel kongkhak chih ah a om ua; a unau Levite’n a bawlsak ziak un a na uh paisan a kiphamoh kei hi.

¹⁶Huchi in kumpipa Josiah thupiak bang a Paikan Ankuang nei ding leh TOUPA maitam a haltum thillat lan ding in huai ni mah in TOUPA nasepna thil tengteng a bawl uhi.

¹⁷Huchi in, Israel suan huailai a omte’n huai ni’n Paikan Ankuang a bawl ua, tanghou silngou sohlouh Ankuang leng ni sagih a bawl lai uhi:

¹⁸Zawlnei Samuel damlai a kipan Israel gam ah Paikan Ankuang huchibang himhim a bawl ngeikei ua; Israel kumpipa kuamah in Josiah leh siampute leh Levite leh Judah tengteng leh Israelte’n a neih bang uh nei a omsam kei uhi.

¹⁹Kum sawmlehgiat Josiah vaihawm kum in huai Paikan Ankuang a nei uhi.

²⁰Huai tengteng khit a Josiah in biakin a bawlkhit in, Aigupta kumpipa Neko Karkhemish sual ding in Euphrates lui ah a paitou a; Josiah in a vasual hi.

²¹Himahleh, aman, “Nang Judah kumpipa, kei leh nang bang ahia i kihihna ding om? Nang sual ding in ka hongpai kei a, ka dousa dou ding in ahizaw ka hong, Pathian in kin ding in thu honpia a, ka lam a pang Pathian doudal kei dih, a hon hihmang kha ding hi” chi in palai a sawl hi.

²²Himahleh Josiah in a kiksan nuam kei a, a dou theihna ding in a kibawl lamdang a, Pathian kam a kipan a Neko thugen a pom kei a, Meggiddo guam ah na sual ding in a kuan hi.

²³Huchi in, thalkap mite’n Josiah a kapkha ua; kumpipa’n a sikhate kiang ah, “Hon paimangpih un, liamna thupi mahmah ka tuakta” a chi hi.

²⁴Huchi in a sikhate’n kangtalai a kipan a lakhia ua, a kangtalai dang ah a koih ua, Jerusalem ah a paipih ua, a si a, a pi leh pute han ah a vui uhi. Judah mi tengteng leh Jerusalem a mite’n Josiah a sun uhi.

²⁵Huan, Jeremiah in Josiah a kah a; lasami numei leh pasalte’n tutan in Josiah a kahna la uh a gen lailai uhi. Israel gam ah dan in a nei ua, ngai dih, kahna la ah a tuangta hi.

²⁶Josiah thilhih dang tengteng, a thilhih hoihte, TOUPA dan bu a gelh bangzel in,

²⁷A masapen a nanungpente leng, ngai dih, Israel kumpipa leh Judah kumpipate tanchinbu ah a tuang hi.