Read Paite Chin 2 KRONIKIL 36 Bible Online

2 KRONIKIL 36 - Paite Chin bible

2 KRONIKIL 36

¹Huai gam a mite’n Josiah tapa Jehoahaz a pi ua, Jerusalem ah a pa sik in kumpipa in a bawl uhi.

²Jehoahaz bel a vaihawmpat tung in kum sawmnih leh thum ahi a, Jerusalem ah kha thum vai a hawm hi.

³Aigupta kumpipa’n Jerusalem a a vaihawmna a tawpsak a, a gam uh dangkasik talent za leh dangkaeng talent khat a liausak hi.

⁴Aigupta kumpipa’n a unaupa Eliakim Judah leh Jerusalem a kumpipa ding in a bawl a, a min Jehoiakim chi’n a khensak hi. Huchi in, Neko in a unaupa Jehoahaz Aigupta gam ah a pi hi.

⁵Jehoiakim bel a vaihawmpat tung in kum sawmnih leh nga ahi a, Jerusalem ah kum sawmlehkhat a vai a hawm hi: TOUPA a Pathian mitmuh in thil hoihlou a hih hi.

⁶Babulon kumpipa Nebukadnezzar amah sual ding in a hong kuan a, Babulon a pi ding in kol a bunsak hi.

⁷Nebukadnezzar in TOUPA inn a tuium-belsuan leng Babulon ah a pua a, Babulon a pathian biakin ah a koih hi.

⁸Jehoiakim tanchin dangte, a thil kihhuai hihte leh a omdante ngai dih, Israel kumpipa leh Judah kumpipate tanchin bu ah a tuang hi; huan, a tapa Jehoiakin in a sik in vai a hawmta hi.

⁹Jehoiakin a vaihawm pattung in kum giat ahi a, Jerusalem ah kha thum leh ni sawm vai a hawm a, TOUPA mitmuh in thil hoihlou a hih hi.

¹⁰Kum a bei in kumpipa Nebukadnezzar in mi a sawl a, TOUPA in a tuium-belsuan hoih pipite toh Babulon ah a pisak a, a unaupa Zedekiah Judah gam leh Jerusalem a kumpipa ding in a bawl hi.

¹¹Zedekiah a vaihawmpat tung in kum sawmnih leh khat ahi a, Jerusalem ah kum sawmlehkhat vai a hawm hi:

¹²TOUPA a Pathian mitmuh in thil hoihlou a hih a; TOUPA kam a kipan a thugenpa zawlnei Jeremiah lak ah a kiniamkhiak nuam kei hi.

¹³Pathian min a kichiamsakpa kumpipa Nebukadnezzar tung ah a hellai a, paupeng in a om a, TOUPA Israel Pathian lam ngalou ding in a lungsim a khauhsak hi.

¹⁴Siampu heutu tengteng leh mipite’n leng Pathian theilou mite mah bang in thilkihhuai pipite a hih ua; Jerusalem a hih siangthou TOUPA innte leng a hihbuah uhi.

¹⁵Huchi in, TOUPA’N a mite leh a omna mun a lainat ziak in a pi leh pute uh Pathian in a kiang uah theihtawp a phatuamngai in mi a sawl hi.

¹⁶Himahleh Pathian misawlte a musit ua, a thute a ngaineu ua, a mite tung ah TOUPA hehna a hong thou a, hih lungdam nawnna mahmah omlou khop in a zawlnei a hihgim uhi.

¹⁷Huaiziak in Kaldai kumpipa a tung uah a gamtang sak a, aman a tangvalte uh a Mun Siangthou uah namsau in a that a, nungak leh tangval leng, tek leng, teksia leng lainatna a neikei a; a khut ah a pevek hi.

¹⁸Pathian inn a tuium-belsuan tengteng, a lian leh a neu leng, TOUPA inn a sum koihkhawm tengteng, kumpipa sum koihkhawm leh a miliante sum koihkhawmte nangawn in Babulon ah a pawvek hi.

¹⁹Pathian innte a hal a, Jerusalem kulhte a chimsak a, huailai a inn thupi tengteng a hal a, huailai a tuium-belsuan hoih tengteng a hihse vek hi.

²⁰Namsau thah bang teng Babulon ah a pi a, Persiate a honglal tak un amah leh a tapate sikha in a om uhi:

²¹A khawlnite gam in nuamtak a a zattan a Jeremiah kam a gen TOUPA thu a tangtunna ding in: segawp a a omsung teng, kum sawmsagih tangtunna ding in, a khawlnite a tang uhi.

²²Huchi in Persia kumpipa Kura vaihawm tung kum in Jeremiah kam a TOUPA thu a tun kim theihna ding in a gam tengteng a thankhiak vek ding leh a gelh a gelh ding in leng TOUPA’N Persia kumpipa Kura lungtang a tokthou hi.

²³Persia kumpipa Kura in hichi in a chi, “Khovel gam tengteng TOUPA van Pathian in a honpia a; Judah gam a Jerusalem ah a inn lamsak ding in thu a honpia ahi. Na lak ua amah mite photphot kiang ah TOUPA a Pathian om henla, va hohtou uhen” chi in.