Read Paite Chin 2 KRONIKIL 6 Bible Online

2 KRONIKIL 6 - Paite Chin bible

2 KRONIKIL 6

¹Huchi in Solomon in thu a gen a, “TOUPA’N, mial bikbek ah ka om ding, a chi a,

²Himahleh na tenna ding, tangtawn a na om na ding inn k’on lamsakta hi” chi in.

³Huchi in kumpipa a kihei a, Israel kikhawm tengteng a vualzawl a; Israel kikhawmte ading khawm uhi.

⁴Aman, “TOUPA Israelte Pathian, ka pa David kiang a amah kam mahmah a,

⁵Aigupta gam a kipan ka mi Israelte ka pikhiak ni a kipan Israelte nam lak a koi khua mah ka min omna ding inn lamna ding ka tel ngeikei a; ka mi Israelte tung a heutu ding mi kuamah ka tel ngeikei hi;

⁶Himahleh, ka min omna ding in Jerusalem ka telta a, ka mi Israelte heutu ding in David ka tel hi, chi a genpa, amah khut mahmah a hon pichingsakpa phat in om hen.

⁷Ka pa David in Israelte Pathian, TOUPA min ding a inn lam a ngaihtuah hi.

⁸Himahleh TOUPA’N ka pa, David kiang ah, ka min ding a inn lam na ngaihtuah a, hichibang lungsim nana put na hih hoih hi; himahleh nang zaw inn na lam kei ding;

⁹Na tapa, na khal a hongpawt ding in ka min ding in inn a hon lamzaw ding, a na chita hi.

¹⁰Huchi in TOUPA’N a thugen a tangtungsakta a: TOUPA chiamsa bang ngei in ka pa David mun k’on luah a, Israel mangtutphah ah ka hongtu a, Israel Pathian TOUPA min ding inn k’on lamta ahi.

¹¹Huai ah Israel suante kiang a na khun, TOUPA thukhun bawm ka koihta ahi” a chi hi.

¹²Huan, TOUPA maitam bul ah Israel kikhawm tengteng muh in ading a, a ban a zak a,

¹³Solomon in dal dohkan a saulam tong nga, a zatlam tong nga, a sanlam tong thum a bawl biakin huang laitak a tun tung ah a tuang a, Israel kikhawm tengteng ma ah a khuk din a, vanlam nga in a ban a zak a:

¹⁴“Aw TOUPA, Israelte Pathian, lei leh van ah nangmah bang mahmah Pathian a omkei uh, a lungtang tengteng ua na lampi tawnmi a sikhate tung a thukhun tangtung sak a hehpihna kem,

¹⁵Na sikha ka pa David kiang a, na thuchiam na tangtung sak a; ahi, tuni in na kam a na gensa na khut in na lohching sakta a:

¹⁶Huchi in aw TOUPA, Israelte Pathian, na sikha ka pa, David kiang a, na suante na om bang a omsam ding a omdan ua a pilvan peuhmah uleh, ka mit muh a Israelte mangtutphah a tu ding na tasam kei ding, chi a na chiamsa tangtung sak in.

¹⁷Huchi in TOUPA, Israelte Pathian, na sikha, David kiang a, na thugen lohchingsak mahmah in.

¹⁸“Himahleh, Pathian lei ah mihing lak ah om petmah dia hia? Ngai in, van, vante van ah leng na takei a, hiai ka inn lam ah takei sem natel ni chia!

¹⁹Himahleh, aw TOUPA ka Pathian na sikha in nang a hon sapna leh a thumna ngaihkhiak sak in, na sikha thumna leh ngetna hon limsak in.

²⁰Hiai munlam nga a na sikha a thumna ngaikhia a, Huai ah ka min a om ding, na chihna mun mahmah, inn lam ah sun leh zan a na mit suan gige theihna ding in.

²¹Na sikha leh na mi Israelte’n hiai mun lam nga a a thum chiang un a ngetnate uh na ngaihkhiak sak zel in, ahi, na tenna mun van ah na ngaikhia inla, na ngaikhia in, ngaidam in.

²²“Mi kuapeuh in a invengte tung ah thil hihkhial in, kichiamsak hong kiphamoh taleh, hiai inn a na maitam ma ah hong kichiam henla;

²³Nang van ah na ngaikhia inla, gamtang inla, migilou a gitlouh man a mawh tangsak in, mi diktat a diktak man a dik tangsak in, na sikhate vaihawmsak in.

²⁴“Na mi Israelte’n na tung a thil a hihkhelh ziak ua melmate lak a a vuallelh ua, nang lam a hong ngat nawn ua, na min a gup ua, hiai inn a thum a thil na kiang a a hon nget uleh;

²⁵Nang van ah na ngaihkhiak sak inla, na mi Israelte khelhna ngaidam inla, amau leh a pi leh pute uh na piak gam ah pi nawn in.

²⁶“Na tung a thil a hihkhelh ziak ua van a hongbina, vuah a hong zuklouha, hiai mun lam nga a a thum ua, na min a gup uleh, amau na hihgim ziak a a khelhna uh a kisik uleh;

²⁷Nang van ah na ngaikhia inla, a paina ding uh lampi hoih kawkmuh in na sikhate leh na mi Israelte khelhna ngaidam in na mite a goutan ding ua na piakna gam ah vuah zusak in.

²⁸Ka gam ua kial a hong kiaka, hii a honglen a, keuna hiam, muatna hiam, khaukhup hiam, lung hiam a hongom a, a melmate un a khuate uh a hongum ua, hii bangpeuh, natna bangpeuh a hongtun leh hii a vei uhiam, a lungkham na uh theipih in;

²⁹“Hiai inn lam nga a banzak a mimal hiam, Israel mipi hon in hiam thumna leh ngetna a hontut uh:

³⁰Na omna van ah na ngaikhia inla, ngaidam inla, michih a omdan bang chiat un lohchingsak in, a lungtang uh lah na thei ngal a: nangmah kia mihing tate lungtang theipa na hi:

³¹“Ka pi leh pute uh na piak gam a omsung teng ua na lampi tawn thei ding a nang laudan a hong siamna ding un.

³²“ Na mi Israelte hilou, namdang mi, na min thupitak leh na khut hattak leh na banzak ziak a gam gamla tak a kipan a hongpai, hiai inn lam nga a a hong thum chiang un:

³³Nang na omna van ah na ngaikhia inla, namdangte leng nang hon sapdan uh dungzui in a tung uah hih in, huchi in na mi Israelte bangmah in khovel a namchih in na min a thei ding ua, nang laudan a hongsiam ding ua, hiai ka inn lam in na min a pu chih a thei ding uhi.

³⁴“Na mite’n a melmate uh na sawlna lamlam a a sual ua na khopi tel leh na min omna dia na lam inn lam nga a na kiang a a thum uleh:

³⁵Nang a thumna uh leh a ngetna uh van ah na ngaikhia inla, a thu uah pi zel in.

³⁶“Na tung a a hong khelh ua, kuamah lah khiallou a om ngalkei a, a tung ua na heh a, melma khut a na piak a, gam gamlapi ah hiam, naideuh ah hiam sal a a pi un leng,

³⁷Sal a a pina gam ua a kingaihtuah khiak ua, a kisik ua, i na khialta, dikloutak leh gitlouhhuai tak in thil i na hihta, chi a a tanna gam ua ngetna hontut ua:

³⁸Sal a amau a pi na ua, a tanna gam ua a lungtang tak uleh a lungsim taktak ua nanglam a hong ngat ua, a pi leh pute uh gam lam leh na khopi tel leh na min dia ka lam inn lam nga a na kiang a a thum uleh:

³⁹A thumna uh leh a ngetna uh nang na omna van ah na ngaikhia inla, a thu uah pi zel inla, na tung a na khialta na mite ngaidam in.

⁴⁰Aw ka Pathian, hehpih in na mit honghak inla, hiai mun a thumna ah na bil dohin.

⁴¹“Aw TOUPA Pathian, na omna mun ah paitou in nang leh na hatna bawm toh, Aw TOUPA Pathian, na siampute na hotdamna in van inla, na misiangthoute hoihna in nuamsa sak in.

⁴²Aw TOUPA Pathian, na thau nilhpa mel lehngatsan kenla, na sikha David thil hoih hihte theigige in” a chi hi.