Read Paite Chin 2 KRONIKIL 7 Bible Online

2 KRONIKIL 7 - Paite Chin bible

2 KRONIKIL 7

¹Huchi in Solomon a thum khit in van a kipan mei a hong lengsuka, haltum thillat leh kithoihnate a hong kangmangta a, huan TOUPA thupina’n inn a dimta hi.

²TOUPA thupina in TOUPA inn a dimsak ziak in TOUPA inn ah siampute a lut theikei uhi.

³Israel suante in van a kipan a mei hong lengsuk leh inn tung a TOUPA thupina a en nilouh ua, suanglep tung ah mai a leisi in a khupboh in TOUPA phat in a bia uhi. “Amah lah a hoih ngal a, a chitna tangtawn in a om ding hi, chi in chibai a buk ua, kipahthu a gen uhi.”

⁴Kumpipa leh mipite’n TOUPA ma ah kithoihnate a lan uhi.

⁵Kumpipa Solomon in kithoihna bawngtal sing nih leh sang nih leh belam nuai khat leh sing nih a lan uhi. Huchibang in kumpipa leh mipite’n Pathian inn a lan uhi.

⁶Huan, siampute a mun chiat uah ading ua; Levite leng TOUPA kiang a kipahthu genna ding a phuah, a chitna tangtawn in a om ding hi, chi a TOUPA phatna dia David in a zatsek, thil gingthei toh TOUPA lasa in ading ua; huchi in siampute’n pengkul a mut ua, Israel mi tengteng ading diamduam uhi.

⁷Solomon in TOUPA inn mazawn a umsung kongtual a hih siangthou behlap a; huai ah haltum thillatte, lemna thillat thaute a lan a; Solomon dal maitam bawl haltum thillat, tangbuang thillat, thaute latna ding a a neuluat ziak in.

⁸Huchi in, huai tung in Solomon leh Israel mi tengteng mipi kikaikhawm thupitak Hamath kholutna a kipan a Aigupta gam luipha a mite toh ni sagih Ankuang a lui uhi.

⁹A ni giat ni’n kikhopna tak a nei ua; maitam kipahpihna ding in ni sagih a zang ua, Ankuanglui ni ading in ni sagih a zang uhi.

¹⁰Huchi in kha sagih na ni sawmnih leh thum nin mipite a kikhensak a, TOUPA’N David leh Solomon leh a mi Israelte tung a a hoihna a latsak ziak in nuamsatak leh kipaktak in mite a inlam uah a paita uhi.

¹¹Huchibang in, Solomon in TOUPA inn leh kumpipa inn a pichinta a; Solomon in a lungsim a a tup bang in TOUPA inn leh amah inn lamzangtak in a pichinta hi.

¹²Huan, zan in Solomon kiang ah TOUPA a hong kilak a, a kiang ah, “Na thumna ka za a, hiai mun kei adin kithoihna inn din ka sepkhin hi.

¹³Vante ka khak a, vuahte a zuklouh in hiam, khaukhup ka sawl a, gamte a hihsiat hiam ka mite lak a hi ka lensak hiam a;

¹⁴Ka minpu ka mite kingaineu a a thum ua, hon zon ua, a omdan giloute uh a lehngatsan uleh van a kipan in ka na ngaikhe ding a, a khelhna uh ka ngaidam ding a, a gam uh ka damsak ding hi.

¹⁵Hiai mun a thumna ka mit ka suan ding a, ka bil ka doh ding hi.

¹⁶Huai a ka min tangtawn a a omtheihna ding in hiai inn ka sep a, ka hihsingthouta hi: huai ah ka mit leh ka lungtang a om tawntungta ding hi.

¹⁷Huan, nang tungtang thu ah leng, na pa David bang a ka mitmuh a na om a, thu ka honpiak bang a na om a, ka thusehte leh ka vaihawmte na zuih leh:

¹⁸Israelte lak ah ‘vaihawm mi na tasam kei ding,’ chi a na pa David kiang a ka thukhun bang in ‘na gam mangtutphah ka kipsak ding hi.’

¹⁹“Himahleh na kiheimang ua, ka thusehte leh ka thupiakte na lehngatsan ua, Pathian dangte nna nasep ua, na biak uh leh:

²⁰Amau ka piak gam a kipan k’on hihmang ding a; hiai inn ka min ding a ka hihsiangthousa ka mitmuh phaklouh ah ka suanmang ding a, namchih lak a paunak leh a selam a gentehna ding in ka bawl ding hi.

²¹‘Hiai inn sangpi a kiang a paipeuh in lamdang a sa ding ua, bangchi a hiai gam leh hiai inn TOUPA’N hichi a hih ahia? a chi ding uh.’

²²TOUPA, a pi leh pute uh Pathian, ‘Aigupta gam a kipan pikhe pa a lehngatsan ua, Pathian dangte zuia, a biakua, a nnate a sep ziak un hiai siatna tengteng a tung uah a tung ahi, a honchi ding uh a chi hi.’ ”