Read Paite Chin 2 KRONIKIL 8 Bible Online

2 KRONIKIL 8 - Paite Chin bible

2 KRONIKIL 8

¹Huan, hichi ahi a, Solomon in TOUPA inn leh amah inn a lamsung kum sawmnih a bei in,

²Huram in Solomon khua a piakte Solomon inn a bawl a, Israel suante a omsak hi.

³Solomon in Hamath Zobah a sual a, a zou hi,

⁴Gamdai ah, Tadmor a bawl a, Hamath a vankoihna khuate toh.

⁵Bethhoron saknung zaw leh khangnung zaw leng, kulhte, kongkhakte, a kalhnate nei in a bawl beh hi.

⁶Baalath khuate, a vankoihna khua tengteng, a kangtalai koihna khuate, a sakol tungtuang mite omna khuate, Jerusalem leh Lebanon leh a gamsung tengteng ah Solomon in a deih bangbang in a bawl hi.

⁷Israel suante hilou, Hitte, Amorte, Perizte, Hivte, Jebuste suan a omlai mite tengteng;

⁸Israel suante’n a hihman louhte uh, huai gam a amaute nung a nutsiat a om a suante uh, tutan a, Solomon in sikha nasem ding a goih teitei pawl din a bawl hi.

⁹Israel suante Solomon in a nasemmi sikha ding in a bawl kei a, kidou mite, a sepaih heutute intekte, a kangtalai leh a Sakol tungtuang mi heutu ahizaw uhi.

¹⁰Huaite mipite heutu, Solomon intek pente ahi ua, za nih leh sawmnga ahi uhi.

¹¹Solomon in Pharo tanu David khopi a kipan a tuam a inn a lamsak ah a pitou a, “Ka zi Israel kumpipa David inn a om ding ahi kei, TOUPA bawm hongtunna Mun Siangthou ahi” a chi hi.

¹²Huchi in, Solomon inlim mailam a kibawl TOUPA maitam ah TOUPA ding in haltum thillatte a lan hi;

¹³Mosi thupiak, nitenga, ding a bikhiah bangbang in khawlni ah, kha thak ni, Ankuanglui hun nei, kum khat a thumvei, tanghou silngou sohlouh ankuangluinate, nipi kal Ankuangluinate, bawkta Ankuang luinate,

¹⁴Huan, a pa David na seh bang in siampu pawlte leh Levite a tantuam chiat ua, niteng a sepkul dungzui zel a, phat dingte, siampute ma a nasem ding in a sep a; kongkhak teng ah a pawlpawl a vengmite a seplai a; huchibang in Pathian mi David in a nasep hi.

¹⁵Kumpipa’n siampute, Levite thu a piak bangchi mah in sumthute leng a pialsan hetkei uhi.

¹⁶TOUPA inn a bawlkhiak tung ua kipan a a zohtan un, Solomon in a suktuahsa bang geih ahi. Huchi in TOUPA inn pichin ahita hi.

¹⁷Huchi in Solomon bel Edom gam a luipi gei a Ezion-geber ah leh Eloth ah a hoh a,

¹⁸Huram in a sikha tuipi a gamtang mi, longte toh a kuansak a: Solomon sikhate toh Ophir ah a hoh ua, huai ah dangkaeng talent za li leh sawmnga a hontun ua, kumpipa Solomon kiang ah hontun uhi.