Read Paite Chin EZRA 1 Bible Online

EZRA 1 - Paite Chin bible

EZRA 1

¹Persia kumpipa Kura kum khatna ah, Jeremiah kam a TOUPA thu hihzoh a hihtheihna ding in, TOUPA’N Persia kumpipa Kura kha a tokthou a, huchi in a gamsung teng ah thuphuan a bawl a, a gelh in leng a koih hi.

²Hichibang in Persia kumpipa Kura in a chi, “TOUPA, van Pathian in, Lei gam tengteng kei a honpeta hi; Judah a om Jerusalem a amah inn lamsak ding in kei thu a honpia hi.

³A mite tengteng na lak ua om peuhmah, a kiang ah Pathian om henla, Judah a om, Jerusalem ah hohtou henla, TOUPA Israel Pathian, amah Pathian ahi, Jerusalem a om inn lam hen.

⁴Kuapeuh a khualtamna koi munpeuh a nutsiat a omna mun a mite’n, amah dangka leh dangkaeng, vante leh, gantate in panpih uhenla, Jerusalem a om Pathian inn ading a utthu a thillat chihlouh” chi in.

⁵Huchi in Judah leh Benjamin intekpate inkawte lupente, siampute leh Levite, Pathian in Jerusalem a om TOUPA inn lam dia hohtou dia a kha uh a tohthohte tengteng, a thouta uhi.

⁶Huan, a kimvel ua omte tengteng in a khut uh dangka tuium-belsuan, dangkaengte, vante, gantate, leh thil manphate in a hihhat ua, uttak a piakte tengteng simlouh in.

⁷Kumpipa Kura in leng TOUPA inn a tuium-belsuan, Nebukadnezzar in Jerusalem a kipan a lakkhiak, pathian innte a a koihte a lakhe vek hi;

⁸Huaite Persia kumpipa Kura in sumkempa Mithredath khut in a lakhe vek a, Judah vaihawm, Sesbazzar pia in a sim sak hi.

⁹Huchi in hiai a muhzah uh ahi: dangkaeng kuang sawmthum, dangka kuang sang khat, gimlim halna kuang sawmnih leh kua;

¹⁰Dangkaeng noubem sawmthum, dangka noubem a hoihlou deuhte za li leh sawmkhat leh tuium-belsuan dangte sang khat.

¹¹Dangkaeng leh dangka tuium-belsuan tengteng sang nga leh za li ahi uh. Saltangte lak a te Babulon a kipan Jerusalem a pitouh a omlai un, hiai tengteng Sesbazzar in a tawitou vek hi.