Read Paite Chin EZRA 4 Bible Online

EZRA 4 - Paite Chin bible

EZRA 4

¹Huchi a Judah leh Benjamin melmate’n saltangte tate’n TOUPA, Israel Pathian ading in biakin a lam uh chih a zak un;

²Zerubbabel leh, pipute inkaw lupente kiang ah a hongpai nai ua, a kiang uah, “Hon lampih le ung a ke: noute bang in, na Pathian ulah ka zong ngal ua; Assuria kumpipa Esarhaddon in hiai mun a hon pipa damlai nite a kipan amah kiang ah ka kithoih uhi” a chi uhi.

³Himahleh Zerubbabel leh, Jeshua leh Israel pipu inkaw lupente’n a kiang uah, “Ka Pathian uh adia inn n’on lampihna ding ziak bangmah na neikei uh; himahleh Persia kumpipa Kura in kou thu a honpiak bang in, Israel Pathian, TOUPA ading in koute’n ka lam ding uhi,” a chi uhi.

⁴Huchi in gam a mite’n Judah a mite khut a hatsak takei ua, inlamna ah amau a subuaita uhi.

⁵Persia kumpipa Kura damlai tengteng, Persia kumpipa Darias lal lai tanpha in, a thiltup uh kalhse ding, amaute siatna ding in thuhilhmite a guai uhi.

⁶Ahasueras vaihawm pattung lai in, Judah leh Jerusalem a tengte hekna lai a gelh uhi.

⁷Huan Artaksarses damlai in Bislam, Mithredath, Tabeel leh a kithuahpihte’n Persia kumpipa Artaksarses kiang ah lai a gelh ua; laikhak gelhdan Suria laimal a gelh a, Suria pau a bawlkhiak ahi.

⁸Dansiam Rehum leh Laigelhmi Shimsai in Jerusalem siatna ding in kumpipa Artaksarses kiang ah hichibang in laikhak a gelhta uhi:

⁹Dansiam Rehum leh, Laigelhmi Shimsai leh, a kithuahpihte un huchi in a gelhta ua; Dinaimite, Apharsatkimite, Tarpemite, Apharmite, Arkimite, Babulonmite, Susanmite, Dehamite, Elammite leh

¹⁰Sanappar lian leh thupi in a honpi khiak a, Samaria khopi leh luipi khen a gamdang leh a dangdang a kikoih namte.

¹¹Kumpipa Artaksarses kiang a a laikhak uh kopi tuh hiai ahi: “Luipi khenlam leh, a dangdang a na sikhate.

¹²Na kiang a kipan a hongtou Judahte Jerusalem ah kou kiang ah a hong uh chih kumpipa kiang ah theih in om hen: Khopi helhat leh hoihlou a lam lellel ua, a kulhbangte a zouta ua, a suangphumte a puahkhinta uh.

¹³Kumpipa’n thei hen, hiai khopi lam a om a, a kulh bangte zoh a om leh zaw, leimante, siahte sumsinna leimante hiam lamlian leimante a pe kei ding ua, a tawptawp in kumpipa siatna ahi ding.

¹⁴Tuin koute kumpi inn apan huhna ngahte ka hih ziak un, kumpipa zahlakna muh koute ding in a kilawm kei a, huaiziak in kumpipa thudik k’on khak uhi;

¹⁵Na pipute chiamtehna laibu sung ah kizong hen: huchi in chiamtehna laibu sung ah na mu ding a, hiai khopi helhat, kumpipate leh bialte adia poikhoihhat chih leh, nidanglai mah in leng huai sung mah a helna a nabawlta uh na thei ding hi: huaiziak a hiai khopi kihihse gawp lah ahi ngal a.

¹⁶Hiai khopi a kilam a, a kulhbangte hichibang a a kihihkhit lezaw, luipi khenlam ah tan na neikei ding chih kumpipa k’on theitel sak uhi, chi in.

¹⁷Huchi in dansiam Rehum leh, Laigelhmi Shimsai leh, Samaria leh, luipi khen a gam a teng a kithuahpih tengteng kiang ah kumpipa’n dawnna a khak: Chibai,

¹⁸“Laikhak ka kiang a n’on khak uh ka ma ah teltak a sim ahita.

¹⁹Huchi in thu ka pia a, a kizong khin a, nidanglai in hiai khopi in kumpipate tung ah helna a bawl a, huai ah helpina leh helna a na kibawlta chih muhkhiak in a om hi.

²⁰Huailou in kumpipa thilhihthei taktak, luipi khengam tengteng tung a vaihawm, Jerusalem tung a vaihawmte a na om ua; van leimante, sumsinna leimante leh, lamlian leimante amau kiang a piak ahi hi.

²¹Huchi in keimah in thupiak ka bawl masiah, huai mite khawl ding leh, hiai khopi lam lou ding in, thupiak bawl un.

²²Hiai thu a ze awllou ding in pilvang un: bangding in kumpipate siatna ding in hoihlouhna a khang dia?” chi in.

²³Huchi a kumpipa Artaksarses laikhak kopi Rehum leh, Laigelhmi Shimsai leh a kithuahpihte ma a a sim khit un, kintak in Jerusalem a Judate kiang ah a hoh ua, kihatsakna leh thilhihtheihna zang in amau a khawlsakta uhi.

²⁴Huchi in Jerusalem a Pathian inn nasep a khawl a: Persia kumpipa Darias vaihawm kum nihna tan in a khawl hi.