Read Paite Chin EZRA 5 Bible Online

EZRA 5 - Paite Chin bible

EZRA 5

¹Huan zawlneite, zawlnei Haggai leh, Zekariah Iddo tapa in Judah leh Jerusalem a om Judate kiang ah a thu a genkhol ua; a kiang uah Israel Pathian min in thu a genkhol uhi.

²Huchi in Sialtiel tapa Zerubbabel leh, Jozadak tapa Jeshua a thou ua, Jerusalem a om Pathian inn a lam panta ua; amaute panpih in a kiang uah Pathian zawlneite a om uhi.

³Huchihlai mah in a kiang uah Tattenai, luipi khen a ukpipa leh Sethar boznai leh, a kithuahpihte uh a hong ua, a kiang uah hichibang in, Hiai inn lam ding leh hiai kulhbang zou ding in kuan thu a honpia a? a chi uhi.

⁴Huaiban ah ka kiang uah, “Hiai inlam mite min bang ahia?” chi in hong dong uhi.

⁵Himahleh Judah upate tung ah a Pathian uh mit a tu a, a thu Darias kiang a a hongtun a, huai tungtang laikhak a dawnna a hong kiknawn masiah, amaute a khawlsak kei uhi.

⁶Laikhak kopi Tattenai, luipi khen a ukpipa leh, Sethar boznai leh, a kithuahpih Abharsa mite, luipi khen a omte’n kumpipa Darias a khak ua:

⁷A kiang ah laikhak a khak uh hichibang a gelh ahi; “Darias kumpipa kiang ah, Chibaibukna kim.

⁸Kumpipa’n thei hen, Judia bial ah ka pai ua, suang thupite a lam, Pathian thupi inn ah, kulhbangte singte a kikoih a, hiai nasep thanopna toh a pai zel a, a khut uah ma a sawnzel hi.

⁹Huai upate thu ka dong ua, hichibang in a kiang uah, Hiai inn lam ding leh hiai kulhbang zou ding in nou kuan thu a honpia a? ka chi uhi.

¹⁰Nang kiang a tel mahmah genthei ding in, a minte uh leng ka dong ua, huchi a amau makaipen a om mite min ka gelhkhiak theihna ding un.

¹¹Huchi in hichibang in kou a hon dawng uhi, Van leh lei Pathian sikhate ka hi ua, hiai inn kum tampi a na kilamsa, Israel kumpipa thupi in a lam leh a zohsa inn ka lam uhi.

¹²Himahleh ka pipute un van Pathian a na suk heh nung un, amaute Babulon kumpipa Nebukadnezzar, Kaldai mi khut ah a pia a, aman hiai inn a hihsia a, mite Babulon lam ah a pimang hi.

¹³Himahleh Babulon kumpipa Kura kum khatna kum in, kumpipa Kura in hiai Pathian inn lam ding in thupiak a bawl hi.

¹⁴Dangkaeng leh dangka tuium-belsuan Pathian in a leng, Nebukadnezzar in Jerusalem a om Pathian inn a kipan a a lakkhiak a, Babulon biakin a laklutte, huaite kumpipa Kura in Babulon biakin a kipan a lakhia a, mi khat Sesbazzar, ukpipa dia a bawl kiang ah huaite a pekhia hi.

¹⁵Aman a kiang ah, “Hiai tuium-belsuan la inla, pai in, Jerusalem a om biakin ah koih in, a mun ah Pathian inn lam hi hen” a chi hi.

¹⁶Huailai in Sesbazzar a hong a, Jerusalem a om Pathian inn suangphumte a koih a: huai hun a kipan tutan in lam in a om gige a, hinapiin lah zoh ahi kei hi.

¹⁷Huaiziak in, tuin kumpipa’n hoih a sakleh, Babulon a om, kumpipa laigelhte koihchingna inn sung kizong henla, Jerusalem a hiai Pathian inn lam ding kumpipa Kura in thupiak bawlna hiam a bawl leh, hiai thu ah kumpipa’n a kipahna kou hon khak hen” chi in.