Read Paite Chin EZRA 6 Bible Online

EZRA 6 - Paite Chin bible

EZRA 6

¹Huchihlai in kumpipa Darias in thupiak a bawl a, Babulon a goute koihkhawmna, laibute in sung a zong uhi.

²Huchi in Akmetha ah, Media bial a om inpi ah laizial a kimu khia a huai ah chiamtehna ding in hichibang a gelh ahi.

³“Kumpipa Kura kum khatna kum in, Kura kumpipa’n thupiak a bawl hi: Jerusalem a Pathian inn tungtang, a inlam hi henla, kithoihnate a latna mun uh leh, huai a suangphumte kiptak a koih hi hen; a sanlam tong sawmguk, a zatlam tong sawmguk;

⁴Suang thupipi vual thum leh, sing thak vual khat toh: huan sumzatbei kumpipa inn a kipan a piakkhiak hi hen:

⁵Nebukadnezzar in Jerusalem biakin a kipan a a lakkhiak, Babulon lam a a lak, Pathian inn a dangkaeng leh dangka tuium-belsuan piak nawn vek hi henla, Jerusalem a om Pathian biakin sung ah amau mun chiat ah koihnawn vek hi hen. Kura in nasep sutzop ding thu a pia hi”

⁶“Tattenai, luipi khen a ukpipa, Sethar boznai leh na kithuahpihte uh Apharsa mite, luipi khen a omte: huai inn lamna a kipan gamla ah om un:

⁷Hiai Pathian inn nasepna subuai kei un; Judahte ukpipa leh Judahte upate’n a mun ah hiai Pathian inn lam uhen.

⁸Huailou in hiai Pathian inn lamna ding a hiai Judah upate kiang ah na hih ding uh thu ka bawl hi: kumpipa vante a kipan, luipi khen a siah a kipan mahmah in, hiai mite kiang a sumzatnate thanopna chiteng toh a piak ding ahi, huchi a dal a a omlouhna ding un.

⁹Huan a taksapnate uh, bawngtalnoute, belamtalte, belamnoute, Van Pathian kiang a haltum thillat ding huitbuh, chi, uain leh thaute, Jerusalem a om siampute thu bangzel in, tatlaklou in niteng in amau piak ding ahi:

¹⁰Huchi a van Pathian kiang a gimlim kithoihnate a lat theih ua, kumpipa hinna leh a tapate hinna adia a thum theihna ding un.

¹¹Thupiak ka bawllai a, kuapeuh in hiai thu a suklamdan leh, a inn a kipan inkam dohkhiak hi henla, huai ah amah dopkang touh leh henden in om hen; hiaiziak in a inn ekvum a bawl hi hen;

¹²Huai mah hihlamdang ding, Jerusalem a om hiai Pathian inn hihse ding a a khut uh kuansak ding kumpipate tengteng leh mite tengteng Pathian huailai a teng ding a a min omsakpa’n paithal vek hen. Kei, Darias in, thupiak ka bawlta; thanopna tengteng toh sepkhiak in om hen” chi in.

¹³Huchi in Tattenai, luipi khen a ukpipa, Sethar boznai leh a kithuahpihte un, kumpipa Darias in a sawl ziak in, thanopna tengteng toh huchibang in a semkheta uhi.

¹⁴Judah upate’n zawlnei Haggai leh Iddo tapa Zekariah genkholhna pansan in inn a lam ua ma a sawnzel uhi. Israel Pathian thupiak dungzui leh Kura, Darias leh, Persia kumpipa Artaksarses thupiak dungzui in inn a lam ua a zouta uhi.

¹⁵Kumpipa Darias vaihawm kum gukna kum a om, Adar kha ni thumni in hiai inn zoh ahita hi.

¹⁶Huchi in Israel tate, siampute leh Levi mite leh, saltanna ta dangte’n, hiai Pathian inn latna nuamtak in a neita uhi.

¹⁷Hiai Pathian inn latna ah bawngtal za khat, belam tal za nih, belamnou za li a lan ua; Israel tengteng adia khelhna thillat ding in, keltal sawmlehnih, Israel namte zah dungzui in.

¹⁸Huchi in Jerusalem a om, Pathian nasepna ading in, Mosi laibu a kigelh bang in, siampute a tanhawmna uah, Levi mite a mun tan uah a koih uhi.

¹⁹Huan saltanna tate’n a kha khatna a ni sawmlehli ni’n Paikan Ankuang a lui uhi.

²⁰Siampute leh Levi mite lah a kisiangsak khawmvek ngal ua; avek un a siang uhi: huchi in saltanna tate ading leh, a unaute uh siampute ading leh, amau mah ading in, Paikan gan a gouta uhi.

²¹Saltanna a kipan a hong paikhe nawn, Israel tate leh, TOUPA, Israel Pathian zong ding a, gam a khovelmite buahna a kipan amau leh amau kihuikhe tuam tengteng in, a neta uhi;

²²Nuamtakin ni sagih sung tanghou silngou sohlouh Ankuangluina a bawlta uhi: TOUPA’N amaute nuam a sasakin, Israel Pathian, Pathian inn a nasepna khutte uh hatsak ding in amau lam ah Assuria kumpipa lungtang a kiheisakta hi.