Read Paite Chin EZRA 7 Bible Online

EZRA 7 - Paite Chin bible

EZRA 7

¹Hiai thilte nung in, Persia kumpipa Artaksarses vaihawmlai in, Seraiah tapa Ezra, Azariah tapa, Hilkiah tapa,

²Sallum tapa, Zadok tapa, Ahitub tapa,

³Amariah tapa, Azariah tapa, Meraioth tapa,

⁴Zerahiah tapa, Uzzi tapa, Bukki tapa,

⁵Ahisua tapa, Phinehas tapa, Eleazar tapa, Aron siampulian tapa:

⁶Hiai Ezra Babulon a kipan a paitou a; amah Mosi Dan, TOUPA Israel Pathian in a piak dan theisa ahi a: a tung a TOUPA a Pathian khut a om dungzui in, a ngetna tengteng kumpipa’n a phalsak hi.

⁷Huan kumpipa Artaksarses kum sagih kum in, Jerusalem ah Israel tate lak a a khen, siampute lak a a khen, Levi mite, lasamite, kongkhak ngakmite leh Nithinim mite, a hohtou ua.

⁸Huchi in kumpipa kum sagih kum kha ngana in Jerusalem ah Ezra a hongpaita hi.

⁹Babulon a kipan a kha khatna ni khat ni’n a kuantou pan a, a kha ngana a ni khat ni’n a Pathian khut hoih a tung a a om bangzel in, Jerusalem ah a hongpai hi.

¹⁰Ezra bel TOUPA dan zong ding, zui ding leh, Israel tua danthusehte leh vaihawmte sinsak ding in a lungtang a koih kip hi.

¹¹Tuin kumpipa Artaksarses in siampu, Laigelhmi, TOUPA thupiakte thugelhmi leh Israel kiang a a thusehte gelhmi Ezra kiang a a piak laikhak kopi hiai ahi.

¹²“Artaksarses, kumpipate kumpipa’n, siampu, van Pathian Dan gelhmi, buching leh huchibang zel in, Ezra kiang ah.

¹³Thupiak ka bawl hi, huchi a Israel a mite lak a amaute tengteng, ka gamsung a, a siampute uh leh Levi mite, amau utthu petmah a Jerusalem a pai ding a theihsakte, nang kiang ah pai uhen.

¹⁴Kumpipa leh a thudotmi sagihte’n, na khut a omna Pathian dan dungzui a, Judah leh Jerusalem tungtang thu kan ding a, nang a honsawl bang un;

¹⁵A tenna Jerusalem a om, Israel Pathian kiang a man neilou a kumpipa leh a thudot mite’n a piaksate uh dangka leh dangkaeng paw ding in,

¹⁶Babulon bial tengteng a dangka leh dangkaeng na muh tengteng, mite leh siampute’n amau utthu a thillat, Jerusalem a om a Pathian uh in adia uttak a a lat tengteng u toh;

¹⁷Huaiziak in thanopna toh hiai sum in bawngtalte, belamtalte, belamnoute, na lei ding a, a anpiak thillatte uleh a dawn ding thillatte uh toh, huchi in Jerusalem a om na Pathian uh inn maitam tung ah huaite na lan ding hi.

¹⁸Dangka leh dangkaeng omlai hih ding dan nang leh na unaute’n hoih na sak dandan uh, na Pathian uh deihlam bang in hih un.

¹⁹Na Pathian in a nasepna ding a tuium-belsuan k’on piak uh, Jerusalem Pathian ma ah pia in.

²⁰Na Pathian in ding a kiphamoh dangdangte, piakna ding na neih dingte, kumpipa sumin a kipan in pekhia in.

²¹“Kei, kumpipa kei Artaksarses mahmah in luipi khen a om sumkemmite tengteng kiang ah thupiak ka bawl hi, huchi a Ezra siampu, van Pathian dan Laigelhmi in nou a hon nget, thanuam tak a hihzel a hih theihna ding in.

²²Dangka talent za khat, huitbuh tehna za khat, uain bath za khat, sathau bath za khat leh a zah genlou in chi nangawn.

²³Bangpeuh van Pathian in thu a piak, van Pathian inn ading in hih in om zel hen; a ziak bel bangding in kumpipa leh a tapate gamsiatna ding in thangpaihna a om dia?

²⁴Huailou in leng k’on chitaktak uh hi, siampute leh Levite, lasamite, kongkhak ngakmite, Nithinimmite hiam hiai Pathian inn sikhate lak a a kuakua tungtang ah, van leimante, sumsinna leimante hiam lamlian leimante amau liausak dan ahi kei ding hi.

²⁵Huan nang, Ezra, na khut a om na Pathian pilna zui in, thukhenmi leh vaihawmmi, tuipi khen a omte mite tengteng vaihawm ding in sep in; na Pathian Dante tengteng, huaite theiloute nou sinsak un.

²⁶Kuapeuh na Pathian Dan leh, kumpipa dan zuilou , sihna chiang hizong leh, thanuamtak in a tung ah vaihawmna bawl in om hen, ahihkeileh, khakmangna hiam, vankhakna hiam, suangkulh lutna tan in” chi in.

²⁷Jerusalem a om TOUPA inn kilawmsak ding a, kumpipa lungtang a hichibang a thil koih, i pipute Pathian, TOUPA nuamsa in om hen;

²⁸Kumpipa leh, a thudotmite leh, kumpipa vaihawm pih thilhihthei tengteng ma a ka tung a chitna hon pepa amah ahi. Huchi in ka tung a TOUPA ka Pathian khut dungzui in hihhat in ka omta a, ka kiang a hoh ding in Israel a kipan mi kizen tungtuan ka kaikhawmta hi.