Read Paite Chin EZRA 9 Bible Online

EZRA 9 - Paite Chin bible

EZRA 9

¹Huchi a hiai thilte hihkhit a a omlai in, vaihawmtute ka kiang ah a hongpai nai ua, “Israel mite leh, siampute leh Levi mite, gamte a mite a kipan amau leh amau a ki koihtuam kei ua, amaute kihhuainate, Kananmi, Hitmi, Perizmi, Jebusmi, Amonmi, Moabmi, Aigupta mi leh Amormite, dungzui in a om uhi.

²Amau ading leh a tapate uh ading in a tanute uh a la ua; huchi in chi siangthou gamte mite toh amau leh amau a kihelkhawmta hi: ahi, hiai tatlekna ah vaihawmtute khut leh vaihawmmite a pipen ahi uhi” a chi hi.

³Huchi a hiai thil ka zak in, ka puansilh leh ka puanak ka botkek a, ka khamul ka botkhia a, lamdangsa in ka tusuk hi.

⁴Huailai in saltanna a amaute tatlekna ziak a, Israelte Pathian thute ziak a lau a ling michih ka kiang ah a hong kikhawm ua; nitaklam kithoih hun masiah lamdangsa in ka tu hi.

⁵Nitaklam kithoih hunlai in ka tunggikna apan ka thou a, ka puansilh leh ka puanak bohkeksa toh; ka khukdin a, TOUPA ka Pathian lam ah ka khutte ka zakkhia a;

⁶“Aw ka Pathian, na kiang a daktou ding in ka zum in ka zakta hi, ka Pathian: ka thulimlouhnate uh ka lu tunglam uah a pung deuhdeuh a, ka mawhna un vante a sunta hi.

⁷Ka pipute uh damlai hun a kipan tuni pha in nakpi’n ka mawhta ua; huchi in ka thulimlouhnate uh ziak in kou, ka kumpipate uh leh, ka siampute uh, gamte kumpipate khut ah, namsau ah, saltanna ah, lohna ah leh zahlakna ah, hiai ni bang in piakkhiak in ka omta uhi.

⁸Huan tuin sawtlou sung a din TOUPA ka Pathian ua kipan in hehpihna honglang a, suakta ding a omlai dia nutsiat ding in leh, a Mun Siangthou a omkipna honpe ding in, huchi a ka Pathian un ka mitte uh a hon sukvak sak a, ka tanna ua halhna neukha a honpiak theihna ding in.

⁹Sikha lah ka hi ngal ua; huchipi in leng sikha ka hihna uah ka Pathian un a hon mangngilh kei a, himahleh Persia kumpipate mitmuh in chitna a honpia a, halhna honpe ding, ka Pathian uh inn dingsak ding leh, huai a siatna bawlpha ding leh, Judah leh Jerusalem a kulhbang honpe ding in.

¹⁰“Tuin, Aw ka Pathian uh, hiai zoh in bang ka chi ding ua? Na thupiakte lah ka lehngatsanta ngal ua,

¹¹Na sikha zawlneite zang in thu n’on pia a: ‘Luah ding a na paina uh, huai gam, gamte a mite nitna ziak a gam nin ahi. A kihhuainate un gam tawp khatlam a kipan khatlam tawp tan a hihdimna ziak in.

¹²Huaiziak in na tanute uh a tapate uh kiang ah pe kei unla, a tanute uh leng na tapate uh ading in la sam kei un, a muanna uhiam a hauhsakna uhiam leng tangtawn in zong sam kei un: huchi a na hat ua, gam a a hoih na nek ua, tangtawn a na tate uh adia gouluah dia na nutsiat theihna ding un.’

¹³Huchi a ka gamtat giloute uh ziak leh ka mawhna thupi mahmah ziak ua, ka tung ua hongtung tengteng zoh in, nang ka Pathian un ka thulimlouhnate uh gunzah sang a hon gawt tawmzaw a, a sibang omlai n’on piak mu in.

¹⁴Na thupiakte bohse nawn in, kihhuaite hih mite toh kituak in ka om ding uam? Omlai ding omlou khop a, suakta ding himhim leng omlou khop a na bolgawp matan ka tung uah na heh nilouh dia hia?

¹⁵‘Aw TOUPA Israel Pathian, nang na diktat a; hiai ni bang a a suakta omlaite n’on nutsiat ziak in: ngai in, ka mawhna un na ma ah ka om uhi’; hiai ziak in lah kuamah na ma ah ading theikei ding uhi.”