Read Paite Chin NEHEMIAH 1 Bible Online

NEHEMIAH 1 - Paite Chin bible

NEHEMIAH 1

¹Hakaliah tapa Nehemiah thute: Kisleu kha, kum sawmnihna kum a, Susan Inpi a ka om in, hichi a honghi hi.

²Hananiah, ka unaute lak a khat, a hong a, amah leh Judah a kipan mi kuate hiam; amaute kiang ah saltanna a kipan a nutsiat a omte, Judah suaktate tanchin leh Jerusalem thu ka dong hi.

³Amau ka kiang ah, “Huailai bial a saltanna a kipan omlaite gimthuakna thupi thuak leh simmawh in a om uh: Jerusalem kulhbangte leng a chim a, a kongpite leng mei in a kang” a chi uhi.

⁴Huan hichi ahi a, hiai thute ka zaklai in, ka tu a ka kap a, ni bangzah hiam ka sun a; van Pathian ma ah an ka ngawl a ka thum hi.

⁵“Aw TOUPA, van Pathian, Pathian thupi leh lauhuai, amah it a, a thupiakte zuite tung a thukhun theigige leh chitna nei gige:

⁶Tuin na bil in hon hungaih henla, na mitte hong kihong hen, huchi a na sikha thumna, huai hun a, sun leh zan a, na sikhate Israel tate adia, nangmah tung a ka hihkhelh uh, Israel tate khelhna thupha tawi a, ka thumna n’on ngaihkhiaksakna din: ahi, kei leh ka pa inkawte ka khialta uhi.

⁷Thanghuaitak in na tung ah ka gamta ta ua, na thupiakte ka zuita kei ua, na sikha Mosi kiang a na thupiak, thusehte, leh vaihawmte.

⁸‘Theigige in, k’on ngen ahi, na sikha Mosi kiang a thu na piak, Na tatlek uh leh mite lak ah k’on thehzak ding:

⁹Himahleh ka kiang a na hongkik ua, ka thupiakte na zuih ua na hih uleh, delhkhiak a na omna uh vantawp mun ah himahleh, huai a kipan in amaute ka kaikhawm ding a, ka min omna dia ka mun telsa ah amau ka pikhawm ding’ chi in.

¹⁰Tuin hiaite, na thilhihtheihna thupi leh, na banhat a na tatsa, na sikhate leh na mite ahi uh.

¹¹Aw TOUPA, k’on ngen ahi, na min laudansiam nuamsa, na sikha thumna leh, na sikhate thumna na bil in hungaih hen: k’on ngen ahi, tuni in na sikha lohchingsak inla, hiai mi mitmuh in a kiang ah chitna pia in” a chi hi. Kei bel kumpipa nou tawipa ka hi.