Read Paite Chin NEHEMIAH 11 Bible Online

NEHEMIAH 11 - Paite Chin bible

NEHEMIAH 11

¹Huchi in mite vaihawmte Jerusalem ah a teng ua: midangte’n leng, khopi siangthou Jerusalem a teng ding sawm lak a khat leh khopi dangte a teng dia seh kuate theihna ding in ai a san uhi.

²Mite’n Jerusalem a tengding a uttak a amau leh amau kipete tengteng a vualzawlta uhi.

³Huchi in Jerusalem a teng bialsung a hausate hiaite ahi uh: himahleh Judah khopite ah michih amau khopite uah michih a tanchiat uah amau a teng ua, huaite, Israel siampute, Levi mite leh Nithinim mite leh, Solomon sikhate tate.

⁴Jerusalem ah Judah tate lak a leh Benjamin tate lak a kuate hiam a teng uhi. Judah tate lak ah: Athaiah Uzziah tapa, Zekariah tapa, Amariah tapa, Sephatiah tapa, Mahalaleel tapa, Perez tate lak ah;

⁵Maaseiah Baruk tapa, Kolhozeh tapa, Hazaiah tapa, Adaiah tapa, Joiarib tapa, Zekariah tapa, Siloni tapa.

⁶Jerusalem a teng Perez tapate tengteng za li sawmguk leh giat pasal hangsan ahi uh.

⁷Hiaite Benjamin tapate ahi uh: Sallu, Mesullam tapa, Joed tapa, Pedaiah tapa, Kolaiah tapa, Maaseiah tapa, Ithiel tapa, Jesaiah tapa.

⁸Huai nung in Gabbai, Sallai, za kua sawmnih leh giat.

⁹Huan Joel Zikri tapa a heutu uh ahi: huan Judah Senuah tapa khopi tung a nihna ahi.

¹⁰Siampute lak ah: Jedaiah, Joiarib tapa, Jakin tapa,

¹¹Seraiah, Hilkiah tapa, Mesullam tapa, Zadok tapa, Meraioth tapa, Ahitub tapa, Pathian inn a vaihawm,

¹²leh a unaute uh huai in a nasep sem, za giat sawmnih leh nih: huan Adaiah Jeroham tapa, Pelaliah tapa, Amzi tapa, Zekariah tapa, Pashur tapa, Malkijah tapa,

¹³Leh a unaute, pipute inkawte hausate, za nih sawmli leh nih: huan Amasai Azarel tapa, Ahzai tapa, Mesillemoth tapa, Immer tapa,

¹⁴leh a unaute uh, mi hat hangsante, za leh sawmnih leh giat: huan a heutu uh Zabdiel, Haggedolim tapa ahi.

¹⁵Levi mite lak ah: Semaiah, Hassub tapa, Azrikam tapa, Hasabiah tapa, Bunni tapa;

¹⁶Sabbethai leh Jozabad, Levi mite hausate lak a, Pathian in pawlam nasep a heutu;

¹⁷Mattaniah, Mikha tapa, Zabdi tapa, Asaph tapa, thumna a kipahthugen pankhe pipen ahi: Huan Bakbukiah, a unaute lak a nihna; huan Abda, Sammua tapa, Galal tapa, Jeduthun tapa.

¹⁸Khopi siangthou sung a Levi mite tengteng za nih sawmgiat leh li.

¹⁹Huai ban ah kongkhak ngakte, Akkub, Talmon, leh a unaute uh kongpite ngakte, za sawmsagih leh nih ahi uhi.

²⁰Huan Israel lak a omlaite, siampute lak a, Levi mite, Judah khopite tengteng ah a om ua, michih a gouluahna chiat uah.

²¹Himahleh Ophel ah Nithinim mite a teng uh: huan Ziha leh Gispa Nithinim mite tung ah a om uh.

²²Jerusalem a Levi mite heutu leng Bani tapa Uzzi ahi, Hasabiah tapa, Mattaniah tapa, Mikha tapa, Asaph tapate, Pathian inn nasepna a lasamite;

²³Amau tungtang thu ah kumpipa a kipan a thupiak, ni teng a a kiphamoh bang in, lasamite ading a dan kipsa lah a om ngal a.

²⁴Huan Pethahiah, Meshezabel tapa, Judah tapa Zerah tate lak a mipite tungtang thu tengteng amah kumpipa khut ah a om hi.

²⁵Khuate, a lute uh toh ahihleh, Judah tate lak a a khenkhatte Kiriath Arba leh huai a khuate ah, Dibon leh huai a khuate ah, Jekabzeel leh huai a khotate ah a teng ua;

²⁶Jeshua leh Moladah leh, Bethphelet ah;

²⁷Hazar-shual leh, Beer — sheba leh huai a khuate ah;

²⁸Ziklag leh, Mekonah leh huai a Hazar-shual khuate ah;

²⁹Enrimmon leh, Zariah leh, Jarmuth ah;

³⁰Zanoah, Adullam leh a khotate uah, Lakish leh huai loute, Azekah leh huai a khuate. Huchi in Beer — sheba a kipan Hinnom guam tan in giahbuk a bawl uhi.

³¹Benjamin tate leng Geba a kipan in a tengtou zel ua, Mikmash leh Aija ah, Bethel leh huai a khuate ah;

³²Anathoth, Nob, Ananiah ah;

³³Hazor, Ramah, Gittaim;

³⁴Hadid, Zeboim. Neballat;

³⁵Lod, leh Ono, khutsiamte guam ah.

³⁶Huan Judah a Levi mite sehkhen bangzah hiam Benjamin toh a kizom uhi.