Read Paite Chin NEHEMIAH 13 Bible Online

NEHEMIAH 13 - Paite Chin bible

NEHEMIAH 13

¹Huai ni’n mite zak in Mosi laibu a sim ua; Ammon mi leh Moab mi tangtawn in Pathian khawmpi sung ah a lut ding uh ahi kei chih, huai sung a kigelh a mu uhi.

²Tanghou leh tui a Israel tate dawnlou a, amaute hamsiat ding a, amaute siatna ding a Balaam a lak ziak un: himahleh i Pathian in hamsia vualzawlna a suaksak hi.

³Dan a zaklai un, hichi ahi a, gamdangmi suante apan Israel mite kikhen khetuamta uhi.

⁴Huan hiai ma in, siampu Eliasib i Pathian inn ua dantante tung a seh a ompa, Tobiah toh kizom in,

⁵Amah ding in dantan thupi a bawlkhol a, huai ah a malam in anpiak thillatte, begaw leh tuium belsuante leh, buh leh bal, uain, leh thaute sawmakhatte a koih ua, huaite bel Levi mite leh lasamite leh kongkhak ngakmite kiang a thupiak a piak ahi a; huchi in vei thillatte siampute ading in.

⁶Himahleh hiai hunte in, Jerusalem ah ka omkei: Babulon kumpipa Artaksarses kum sawmthum leh nih kum in kumpipa kiang ah ka hoh a, ni bangzah hiam nung in kumpipa phalna ka ngen hi.

⁷Huchi in Jerusalem ah ka hong a, Pathian inn pisate sung dantan amah adia a bawlsakna ah, Eliasib in Tobiah adia gilou a hihdan ka theisiam hi.

⁸Huchi in kei a hon dahsak mahmah a: huaiziak in dantan a kipan in Tobiah inn van tengteng ka lawnkhia a.

⁹Huan thu ka pia a, dantante a hihsiang ua: huai ah anpiak thillatte leh begaw toh, Pathian inn a tuium-belsuan k’on la nawn hi.

¹⁰Levi mite tante amau kiang ah piak nailouh in a om chih ka thei a; huchi in Levi mite leh lasamite, nasep semte michih a loulam ah a taizak uhi.

¹¹Kei tuh vaihawmmite toh ka kiselta ua, bangding a Pathian inn mangngilh a om ahia? ka chi hi. Amau ka kaikhawm a, a mun uah ka koih hi.

¹²Judah tengteng in buh leh bal leh uain leh thau sawm a khat sumbawm ah a hontawi uhi.

¹³Sumbawm ading in sumkemmite ka bawl a, Selemiah siampute, Zadok laigelhmite leh, Levi mite lak ah Pedaiah: huan amau zom in Hanan Zakkur tapate, Mattaniah tapa: muanhuai sim ahi ngal ua, a nasep uh a unaute uh kiang a hawm ding ahi.

¹⁴Aw ka Pathian, hiai thu ah hon theigige inla, ka Pathian inn ading a ka nasep hoih ka hihte leh huai a zuihdingte nulkhe ken.

¹⁵Huailai in Judah ah khawlni a kuate hiam uain suknate chil a, buhphalte hontawi a, huaite toh a sabiltungte van guang ka mu a; uain, grep gahte, theipite van puakgik chichih, khawlni a Jerusalem a hon tawilutte leng: huan annekte a zuak ni uh huai ni’n amaute dem in thu ka gen hi.

¹⁶Huai ah Tura mite leng a om ua, ngasa a hontawi ua, van chituamtuam toh, Judah tate kiang leh Jerusalem ah khawlni’n a zuak uhi.

¹⁷Huchi in ken Judahte miliante ka kiselpih a, a kiang uah, “Bang thil gilou ahia hiai na hih ua, khawlni na hihnit uh?

¹⁸Na pipute un huchibang in a hih ngei ua hia, i Pathian in ei tung leh hiai khopi tung ah hiai hoihlou tengteng a hontun ahi kei maw? Hinapi in nou khawlni hihnin in Israel tung ah thangpaihna tamsem na tun ua” ka chi hi.

¹⁹Huan Jerusalem kongpite khawlni ma a khua mial pat in, hichi ahi a, kongkhakte khak ding in thu ka pia a, khawlni bei matan kihong lou ding in thu ka pia a: ka sikhate lak a a khen kongpi tung ah ka pangsak a, huchi a khawlni a puakgik a hong kilaklut louhna ding in.

²⁰Huchi in khatvei hiam nihvei hiam sumsinmite leh van chiteng zuakmite Jerusalem pawlam ah a giak uhi.

²¹Amaute dem in thu ka gen a, a kiang uah, “Bangding a kulhbang kim a giak na hi ua? Na hih nawn uleh, na tung uah khut ka kha ding” ka chilai hi. Huai hun a kipan in khawlni’n a hongpai nawnta kei uhi.

²²Kisiangsak ding leh hong kuan a kongpite ngak ding, khawl ni siangsak ding in, Levi mite thu ka pia hi. Aw ka Pathian, hiai ah leng kei hon theigige in, na chitna letdan dungzui in kei honhawi in.

²³Huailai in Judahte Ashdod, Ammon leh Moab numeite kitenpihte leng ka mu hi:

²⁴Huchi in a tate’n Ashdod pau kimkhat leh namdangte pau a zang ua, Judahte pau in a pau theikei uhi.

²⁵Amaute ka kiselpih a, ka hamsiat khum a, a lak ua kuate hiam ka khen a, a mul uh ka bohkhiaksak a, Pathian lou in ka kichiam sak a, “Na tanute uh a tapate uh ading in na pekei ding ua, na tapate uh ading hiam, noumau ading hiam in leng a tanute uh na la ding uh ahi kei chi in.

²⁶Israel kumpipa Solomon hiaite in a khial kei maw? Hinapiin lah nam tampite lak ah amah bang kumpipa a omkei a, a Pathian it in a om a, Israel tengteng tung ah Pathian in kumpipa in a bawl hi: himahleh amah nangawn numei lamdangte’n a khialsak uhi.

²⁷Ahihleh hiai gilou mahmah hih ding in, numei lamdangte kitenpih a i Pathian tung a talek ding in, na thu honzui ding ka hi umaw?”

²⁸Joiada tapate lak a khat, siampu lian Eliasib tapa, Horon mi Sanballat tanu pasal ahi a: huaiziak in kei a kipan ka delhkhia hi.

²⁹Aw ka Pathian, siamputna, siamputna thukhun, leh Levi mite a hihnit ziak un, amau theigige in.

³⁰Huchi in mikhualte tengteng a kipan in amaute ka sawpsiang a, siampute ading leh Levi mite ading in, michih a nasep uah, nasep dante ka sehsak a;

³¹Hunsehsa a sing thillat ading, leh gahmasa ading in. Aw ka Pathian, hoihna ding in kei hon theigige in.