Read Paite Chin NEHEMIAH 2 Bible Online

NEHEMIAH 2 - Paite Chin bible

NEHEMIAH 2

¹Kumpipa Artaksarses vaihawm kum sawmnih, Nisan kha in, a ma a uain a omlai in hichi ahi, uain ka la a, kumpipa kiang ah ka pia hi. A ma ah nidang in dahmel ka pu nai kei hi.

²Kumpipa’n ka kiang ah, “Na chi lah a na kei a, bangchi a dahmel pu na hia? Hiai bangmah dang ahi kei a lungtang dahna ahi” a chi hi. Huaitak in ka lau mahmah hi.

³Kumpipa kiang ah, “Kumpipa tangtawn in dam hen: bangchi’n ka mel a dahlou dia, ka pipute hante omna, khopi, segawp a om a, huai a kongpite mei in kangbei ahi?” ka chi hi.

⁴Kumpipa’n ka kiang ah, “Ahihleh bang ahia na nget?” a chi hi. Huchi in van Pathian kiang ah ka thumta hi.

⁵Kumpipa kiang ah, “Kumpipa kipah lam a hih a, na mitmuh a na sikha in deihsakna a muhleh, Judah gam ah, ka pipute han omna khopi ka bawl theihna ding in kei honsawl in” ka chi hi.

⁶Kumpipa’n ka kiang ah, kumpinu leng a kiang ah a tu a, “Na khualzinna bang tan a sawt ahi dia? Chikchiang in na hong kiknawn dia?” a chi hi. Huchi in honsawl kumpipa kipahlam ahi a; amah hun ka pia hi.

⁷Huailou in kumpipa kiang ah, “Kumpipa kipahlam a hih a, Judah gam tan ka tun mateng a kei a hon paisak zel theihna ding un, luipi khen a ukpipate kiang a piak ding laikhakte honpe lechin.

⁸Inn toh kizom kulh kongpite ading leh, khopi kulhbangte ading leh, ka lutna ding inn ading a bawl ding inkamte bawlna dia sing a hon piakna ding in, kumpipa gammang kempa Asaph kiang ah laikhak hon khaksak lechin” ka chi hi. Huchi in kumpipa’n ka tung a ka Pathian khut hoih a om bang in hon phalsak hi.

⁹Huchi in luipi khen a ukpipate kiang ka hongtung a, a kiang uah kumpipa laikhakte ka pia hi. Huchi in kumpipa’n honzui ding in sepaihpawl heutute leh sakol tungtuangmite a sawl hi.

¹⁰Horon mi, Sanballat leh, sikha Tobiah, Ammon min a zak un, a lungkham sak mahmah a, Israel tate hoihna zong mi khat hongpai a om ngal hi.

¹¹Huchi in Jerusalem ah ka hong a, huai ah ni thum ka omta hi.

¹²Zan in ka thou a, kei leh ka kiang a om mi tawmchikte; Jerusalem adia hih ding ka lungtang sung a ka Pathian in bang ahia a koih mi kuamah ka hilh kei a: ka kiang ah ganta, a tung a ka tuanna ganta chihlouh, leng a omkei hi.

¹³Zan in gulpi tuileh lam, ekvum kongpi lam ah, guam kongpi a pai in ka pawtkhia a, a chimsa, Jerusalem kulhbangte leh, mei a kangsa kongpite ka velta hi.

¹⁴Tuikhuk kongpi leh kumpipa dil ah ka hoh a: himahleh ka nuai a om ganta paina ding mun a omkei hi.

¹⁵Luita zui in zan in ka paitou a, kulhbang ka vel a; ka kiknawn a, guam kongpi ah ka lut a, huchi in ka kiknawnta hi.

¹⁶Huchi in ka paina lam hiam, ka hih hiam vaihawmmite’n a theikei uh; Judate kiang ah leng, siampute hiam, miliante hiam, vaihawmte hiam leh nasep sem midangte kiang ah leng ka gen naikei hi.

¹⁷Huan a kiang uah, “I dinmun uh hoihlouh dan na mu ua, Jerusalem a siatkhit dan, huai a kongpite mei a kat khitdan: simmawh a i om nawnlouh na ding in, kisa un Jerusalem bang i lamnawn ding uh” ka chi hi.

¹⁸Huchi in ka tung a hoih ka Pathian khut tanchin ka kiang a a gen kumpipa thute leng amau ka hilh a; Huchi in amau, “Thou ni’n lamni” a chi uhi. Huchi in nasep hoih sem ding in a khutte uh a hatsakta uhi.

¹⁹Himahleh Horon mi Sanballat leh, Ammon mi sikha Tobiah leh Arabia mi Geshem in a zak un, a hon nuihsan ua, a hon simmawh ua, “Bang thil ahia na hih uh? Kumpipa tung a hel ding na hi uhia?” a chi uhi.

²⁰Amau ka dawng a a kiang uah, “Van Pathian, aman kou a hon lohching sak ding, huaiziak in kou a sikhate ka thou ding ua ka lam ding uh: himahleh nou Jerusalem ah thuneihna, theihgigena leh tan na neikei uhi” ka chi hi.