Read Paite Chin NEHEMIAH 3 Bible Online

NEHEMIAH 3 - Paite Chin bible

NEHEMIAH 3

¹Huchi in siampu lian Eliasib a unau siampute toh a thou ua, belam kongpi a bawl ua; a hih siangthou ua, a kongkhakte a tung ua; Hameah insang tan in a hih siangthou ua, Hananel insang tan in.

²Amah zom in Jeriko mite’n a lam uhi. Amau zom in Imri tapa Zakkur in a lam hi.

³Hassenah tapate’n ngasa kongpi a hih ua; a inkamte a khung ua, a kongkhakte a tung ua, a kalhnate leh a kalhnatawnte.

⁴Amau zom in Uriah tapa, Hakkoz tapa, Meremoth in a bawlpha hi. Amau zom in Mesullam Berekiah tapa, Meshezabel tapa in a bawlpha hi. Amau zom in Baana tapa Zadok in a bawlpha hi.

⁵Amau zom in Tekoa mite’n a bawlpha ua; himahleh a miliante un a Toupa uh nasepna ah a nakpan nuam kei uhi.

⁶Kongpi lui pen Paseah tapa Jehoiada leh Besodeiah tapa Mesullam in a bawlpha ua, a inkamte a khung ua, a kongkhakte a tung ua, a kalhnate leh, a kalhnatawnte.

⁷Amau zom in Gibeon mi Melatiah leh Meronoth mi, Jadon, Gibeon mite, Mizpah mite, luipi khen a ukpipa mangtutphah toh kizomte’n a bawlhoih uhi.

⁸Amah zom in Harhaiah, dangkaeng sekmite tapa Uzziel in a bawlhoih hi. Amah zom in gimlim bawlmite tapa Hananiah in a bawlhoih a, kulhbang za tanpha in Jerusalem a bubitsak uhi.

⁹Amaute zom in Jerusalem seh kimkhat a vaihawmpa, Hur tapa Rephaiah in a bawlpha hi.

¹⁰Amau zom in Harumaph tapa Jedaiah in, amah inn sunhial in a bawlpha a. Amah zom in Hasabneiah tapa Hattush in a bawlpha hi.

¹¹Malkijah, Harim tapa leh Hasub Pahath moab tapa in a mundang leh meipi insang a bawlpha uhi.

¹²Amah zom in Jerusalem seh kimkhat a vaihawmpa, Hallohesh tapa Sallum in, amah leh a tanute toh, a bawlpha uhi.

¹³Guam kongpi pen Hanun leh, Zanoah a tengte’n a bawlpha ua, a lam ua, a kongkhakte a tung ua, a kalhnate leh, a kalhnatawnte leh, ekvum kongpi lam a kulhbang tong sang khat toh.

¹⁴Huchi in Bethhakkerem seh a vaihawmpa, Rekab tapa Malkijah in ekvum kongpi a bawlhoih a, a kongkhakte, a kalhnate leh, a tung a a kalhnatawnte a lam hi.

¹⁵Mizpah seh a vaihawmpa, Kolhozeh tapa Sallum in tuikhuk kongpi a bawlhoih a; a lam a, a vuka, kongkhakte, kalhnate, leh kalhnatawnte leh, kumpipa huan kiang a Siloah dil bang, David khopi a kipan a sukpai leichial tan in a bawl hi.

¹⁶Amah nung in Azbuk tapa Nehemiah, Bethzur gam kimkhat a vaihawmpa’n, David han toh kimatuah mun leh, dil bawltawm chiang leh, mi hatte inn tan in a bawlpha hi.

¹⁷Amah nung in, Levite, Bani tapa Rehumte’n a bawlpha ua. Amah zom in Keilah seh kimkhat a vaihawmpa Asabiah in, amah sehding in a bawlhoih hi.

¹⁸Amah nung in a unaute uh, Keilah seh kimkhat a vaihawmpa, Henadad tapa Bavai in a bawlhoih hi,

¹⁹Amah zom in Mizpah vaihawmpa, Jeshua tapa Ezer in, sehdang, kulhbang kawina tak a galvan in tan a paitouhna sun in a bawlhoih hi.

²⁰Amah nung in Zabbai tapa Baruk in seh dang, kulhbang kawina a kipan siampu lian Eliasib inn kongkhak chiang a bawlhoih hi.

²¹Amah nung in Hakkoz tapa Uria tapa Meremoth in sehdang, Eliasib in kongkhak a kipan Eliasib inn tawpna chiang a bawlpha hi.

²²Amah nung in, phaizang mite, siampute’n a bawlpha uh.

²³Amau nung in Benjamin leh Hasub in a inn pha un a bawlhoih ua. Amau nung in Ananiah tapa Maaseiah tapa Azariah inn amah inn sik ah a bawlhoih a.

²⁴Amah nung in Henadad tapa Binui in sehdang, Azariah inn a kipan kulhbang kawina tan, leh a ning chiang, a bawlhoih hi.

²⁵Uzai tapa Palal in kulhbang kawina sunchiang a bawlhoih a, kumpipa inn tungnung zaw a kipan a hong dingkhetou insang, venna pisa kiang a om toh.

²⁶Amah nung in Parosh tapa Pedaiah leh tempul nasem Ophel a tengteng suahlam pang tui kongpi leh insang lawkkhia zawn tan a bawlhoih uhi.

²⁷Amah khit in Tekoa mite’n seh dang, Ophel kulhbang chiangpha, insang thupi ding khetou sun in a bawlpha uhi.

²⁸Siampute’n sakol kongpi tunglam, michih in amah inn tung sun chiat in a bawlpha uhi.

²⁹Amaute nung in Immer tapa Zadok in amah inn tung suntou chiang a bawlpha a. Amah nung in suahlam kongpi ngakpa Sekaniah tapa Semaiah in, a bawlpha hi.

³⁰Amah nung in Selemiah tapa Hananiah leh Hanun Zalaph tapa gukna in seh dang a bawlpha uhi. Amah nung in Berekiah tapa Mesullam in a dantan tungzawn a bawlpha hi.

³¹Amah nung in dangkaeng sekmite tapa Malkijah in Nithinimte inn leh, sumsinmite inn chiang, Hammipkad kongpi zawnchiang leh, a ning a kahtouhna chiang a bawlpha hi.

³²Huan a ning a kahtouhna leh belam kongpi kikal dangkaeng sekmite leh sumsinmite’n a bawlpha uhi.