Read Paite Chin NEHEMIAH 4 Bible Online

NEHEMIAH 4 - Paite Chin bible

NEHEMIAH 4

¹Himahleh hichi ahi a, kulhbang i lam uh chih Sanballat in a zak in, a hehta a, nakpitak in a thangpai a, Judate a kouta hi.

²Huchi in a unaute leh Samari sepaih pawl ma ah thu a gen a, “Hiai Judah zawngkhalte’n bang ahia a hih uh? Kihihhat ding uhia? Kithoih ding uh hia? Ni khat a zoh sawm uhia? A kangsa ahi chih mu napi in, ninneng sunvum a kipan a suangte bawlthak ding uhia?” a chi hi.

³Huailai in Ammon mi Tobiah a kiang ah a om a, “Aman, a inlam uh, sehal khat kuantou leh, a suang bang uh a laichim ding” a chi hi.

⁴Za in aw ka Pathian; simmawh in lah ka om ngal ua: a hon kouna uh amau lutung ah kiksak inla, saltanna gam a loh ding in amau pia in:

⁵A ginatlouhna uh khuh kenla, na ma a kipan a khelhna uh nulmang in omsak ken: inlamte ma ah lah nang a hon hehsakta uhi.

⁶Huchi in bang ka bawl ua; bang tengteng, a sandan kim chiang in a kizomta hi: mite’n lah nna sem ding in lungsim a nei uhi.

⁷Himahleh hichi ahi a, Sanballat, Tobiah, Arab mite, Ammon mite leh Ashdod mite’n Jerusalem kulhbangte bawlphatna in ma a sawntou zel a, a kitapsiatna a kibawlpha, chih a zak un, a thangpai mahmah uhi;

⁸Avek ua hong kuan a Jerusalem dou ding leh, huai a buaina omsak ding in a kikum khawmta uhi.

⁹Himahleh i Pathian kiang ah i thum ua, sun leh zan a amaute vil ding i koih ua, amau ziak in.

¹⁰Judah in, “Puakgik pawte hatna a bahta a, ninneng tampi a om; huchi in kulhbang bawl theilou i hi uh” a chi hi.

¹¹I melmate un, “A lak uh i hongtun ua, amaute i thah ua, nasep i khawlsak matan a theikei ding ua, muh leng a mu kei ding uh” a chi uhi.

¹²Hichi ahi a, amau kiang a teng Judahte a hong pailai un, “Sawmvei i kiang uah mun tengteng a kipan hondou ding uh ahi” a honchi uhi.

¹³Huaiziak in kulhbang nunglam mun a mun niampen pen, mun awngthawlte ah, ka koih a, mite a inkuan kuan uh dungzui in a namsaute utoh, a teipite utoh, a thalpeute utoh ka koih hi.

¹⁴Huchi in ka en a, ka thou a, miliante leh, vaihawmmite leh mipi dangte kiang ah, “Amau lau kei un: TOUPA thupi leh lauhuai theigige unla, na unaute uh, na tapate uh leh na tanute uh ading in galdou un, na zite uh leh na innte uh ading in” ka chi hi.

¹⁵Hichi ahia, i melmate’n i na theita ua, Pathian in a thusawm uh bangmahlou a suaksak a, kulhbang bawl ding in i vek un michih a nasepna munah i kilehnawnta uh chih a zalai uhi.

¹⁶Huchi in hichi ahia huai hun a kipan in, ka sikhate lak a a kimkhat nasepna ah a pang ua, a lak ua kimkhat in teipi, lum leh thalpeu leh sik puanakte a len ua; vaihawmmite Judah inkawte nung ah a omvek uhi.

¹⁷Kulhbang bawlte leh, vangik pawte’n a puaklai un, michih in a khutte uh a khat nasepna a nasem in, a khut khatlam a galvan tawi in;

¹⁸Inlam mite’n, michih in a namsau a pang ah khaisa a nei in, huchi in a lamtou zel uhi. Pengkul mutpa ka kiang ah a om hi.

¹⁹Huchi in miliante kiang leh, vaihawmmite kiang ah leh mite lak a a dangdangte kiang ah, “nasep thupi in, a tam a, kulhbang tung ah i kikhenzak ua, kigamlat tak in:

²⁰Koilai mun peuh a pengkul ging na zakna uah, i kiang uah huai lam ah kuan un; i Pathian un gal hondou sak ding ahi” ka chi hi.

²¹Nna i sem ua: a lak ua a kimkhat in zingsang kipat a kipan aksite hong kilat matan teipi a tawi uhi.

²²Huchi mah bang in huailai in mite kiang ah, michih a sikha toh Jerusalem sung ah giak hen, zan chiang a ei ding a galvil a hih a, sun chiang a na a sep theihna ding un, ka chi hi.

²³Huchi in ken leng, ka unaute’n leng, ka sikhate’n leng, kei hongzui galvil mite’n leng, i lak ua kuamah in i puante uh i suahkei ua, michih a galvan toh tui ah a hoh uhi.