Read Paite Chin NEHEMIAH 5 Bible Online

NEHEMIAH 5 - Paite Chin bible

NEHEMIAH 5

¹Huailai in a unaute uh Judate dem a nakpitak a kikouna mite leh a zite uh a kipan a hong omta hi.

²Kou, ka tapate leh ka tanute uh, tampi ka hi ua: ka nek ua ka hin theihna ding un, buh leh bal honpia un” chi pawl a hongom uhi.

³“Ka loute uh, ka grephuante uh, ka innte uh ka zuak uhi: kial ziak in, buh leh bal honpia un” chi kuate hiam leng a om uhi.

⁴“Ka loute uh leh ka grephuante ua dit ding in kumpipa siah ding in sum ka leitawi uh, chi mi khenkhat leng a om uhi.

⁵Hinapi in ka sa uh ka unaute uh sa bang ahi a, ka tate uh lah amau tate bang: ngai un, ka tapate uh leh ka tanute uh sikhate hi ding in tanna ah ka pi ua, ka tanute uh lak a a khente tanna a pi in a omkhin man hial uhi: panpih theihna ka neikei ua; midangte’n lah ka loute uh leh ka grephuante uh a nei ngal ua” chi in.

⁶Huchi a a kikouna uleh hiai thute ka zak in ka heh mahmah hi.

⁷Huchih lai in ka kingaihtuah a, miliante leh vaihawmmite ka kiselpih a, a kiang uah, “Michih in a unau lak ah a pung na phut uh” ka chi hi. Huchi in amaute demna kikhawmpi thupi ka nei hi.

⁸A kiang uah, “Khovelmite kiang a zuak a omsa, i unau Judahte i theih bang un i tanta ua; nou na unaute uh zuak un, i lak ua khot a om ding uh ahi maw?” ka chi hi. Amau a daidide ua, thu khat leng a neikei uhi.

⁹“Na thilhih uh a hoih kei: i melmate khovel mite’n hon simmawhna ziak un, i Pathian laudansiam a na om ding uh hilou hia? ka chi behlap hi.

¹⁰Huchi mah bang in, ‘ka unaute leh ka sikhate leh ken amau kiang ah sum leh buh leh bal ka leitawi sak uhi. K’on ngen ahi, a pung omsak keini.’

¹¹‘Pe nawn un, k’on ngen ahi, a kiang uah, tuni mahmah in, a loute uh, a grephuante, a olive huante uleh a innte uh, a sum uh a seh zana leng, buh leh bal, uain,’ leh sathau, amau a kipan na phutkhia uhi” ka chi hi.

¹²Huchi in amau, “Ka pe nawn ding ua, amau a kipan bangmah ka ngiat kei ding uh; huchibang in ka hih ding ua, na chih mah bang in” a chi uhi. Ken siampute ka sam a, a kichiamna uh ka la a, huchi a hiai thuchiam bang a a hihna ding un.

¹³Ken leng ka pheipi ka vuang a, “Hiai thuchiam bawllou peuhmah, a inn a kipan, a nasepna a kipan Pathian in hichibang in vuang hen; hichibang tak a vuan khiak ahi ding a, a hawm ding” ka chi hi. Huan khawmpite tengteng in, “Amen, TOUPA phat in om hen” a chi uhi. Huchi in mite’n hiai thuchiam dungzui in a hih uhi.

¹⁴Huailou in Judah gam a a ukpipa ding ua seh a ka omlai a kipan, kumpipa Artaksarses kum sawmnihna leh kum sawmthum leh nih chiang, huai bel, kum sawmlehnih ahi a, kei leh ka unaute’n ukpipa tanghou ka ne kei uhi.

¹⁵Himahleh kei ma a ukpipa masate mite tung a mawhsak theih ahi ua, amau a kipan in tanghou leh uain a la uh, dangka sekel sawmli simlouh in; ahi, a sikhate uh nangawn in mite tung ah vai a hawm uhi: himahleh ken Pathian ka kihtak ziak in huchibang in ka hih kei hi.

¹⁶Ahi, huailou leng hiai kulhbang nasepna ah ka pang nilouhlouh a, gam himhim leng i leikei uh: ka sikhate tengteng huailam ah nasepna ah kaihkhawm in a om uhi.

¹⁷Huaiban ah ka dohkan ah Judahte leh vaihawmmite lak a mi za leh sawmnga, i kim i vel ua om khovelmite lak apan i kiang ua hongpaite chih louh, a om uhi.

¹⁸Ni khat ading a bawlkholhsa bawngtal khat leh belam hoihhoih guk ahi ua; vasate leng kei dia bawlkholhsa in a om ua, huan ni sawm sung a khatvei uain chichih kipan koih hoih: hinapi in hiai mite tung a tanna a gik ziak in, ukpipa tanghou hiaite tengteng ziak in ka phut kei hi.

¹⁹Aw ka Pathian, hoihna ding in, hiai mite adia ka hih tengteng kei lam hon theigige in.