Read Paite Chin NEHEMIAH 6 Bible Online

NEHEMIAH 6 - Paite Chin bible

NEHEMIAH 6

¹Huan hichi ahi a, kulhbang ka lamkhin a, huai ah khangkham a om nawnta kei chih, Sanballat, Tobiah, Geshem Arabia mi leh i melma dangdangte kiang a a ki tut lai in; huai huntan in kongpi kongkhakte tung naikei mah leng;

²Sanballat leh Geshem in ka kiang ah mi a honsawl ua, “Hongpai in, Ono phaizang a khuate lak a khat ah kimuh khawmna i nei ding” chi in. Himahleh ka tung a gilou hih a ngaihtuah uhi.

³Huchi in a kiang uah sawltakte ka sawl a, “Nna thupi ka seplai ahi, k’ong paisuk theikei: bangdia ka nna nusia a, na kiang ua ka hongsuk ziak a, nasep khawl ding ahia oi?” ka chi hi.

⁴Huan hichibang ngen in livei ka kiang ah mi a honsawl ua; a ngeingei in amaute ka dawng zel hi.

⁵Huchi in Sanballat in ka kiang ah hichibang in a ngaveina ding in a sikha a khut a laikhak honsa toh a honsawl a;

⁶Huai ah, “Namte lak ah a kigen a, Gasmu in a chi a, nang leh Judahte’n hel na tum uh; huai ading in kulhbang na lam hi: huchi in nang a kumpipa uh hi ding in, hiai thute dungzui in,

⁷Jerusalem a nang tanchin gen ding in zawlneite leng na sep a, Judah ah kumpipa a om chi in: huchi in tuin hiai thute dungzui in kumpipa kiang a tut ding ahi; Huaiziak in hong kuan inla, kihouna i nei ding” chi in.

⁸A kiang ah mi ka sawl a, “Na gen bang a huchibang thilhih a omkei a, himahleh na lungtang a kipan na phuahtawm ahi” chi in.

⁹Amau lah, hihlouh a hihna ding in, “Nasepna a kipan a khutte uh hatlouh sak in a om ding” chi a hon lausak a ut chiat ngal uhi. Himahleh tuin Aw Pathian, nang ka khutte hatsak in.

¹⁰Khum a om, Mehetabel tapa Delaiah tapa Semaiah inn ah ka hoh a; aman, “Biakin sung ah, Pathian inn ah i kikhawm dia, huchi in biakin kongkhakte i khak ding: nang that dia hong ding uh lah ahi ngal ua; ahi, zan in nang that ding a hong ding uh ahi” a chi hi.

¹¹Ken bel, “Kei bang mi, taiding honsa maw? Huan kua ahia, huchi a omkei bang, a hinna humbitna dia biakin sung a hohnuam ding? Ka lut kei ding,” ka chi hi.

¹²Ka ngaihtuah a, huchi in, ngai in, Pathian in amah a sawlkei a; himahleh ka siatna ding in hiai genkholhna a genkheta hi: Tobiah leh Sanballat in amah a guai uhi.

¹³Hiai ading a goih ahi, ka launa ding leh, huchibang a hih a, khial a, thutut gilou ding a thubuai a neih theihna ding ua, kei a hon simmawh theihna ding un.

¹⁴Aw ka Pathian, Tobiah leh Sanballat a nasepte uh bangzel leh zawlneinu Noadiah leh, zawlnei dangte, lausak hontumte, theigige in.

¹⁵Huchi in Elul kha ni sawmnih leh nga ni, ni sawmnga leh nih sung in, kulhbang zoh in a omta hi.

¹⁶Hichi ahi a, i melmate tengteng in huai a zak un, i kim i vel ua om khovelmi tengteng a lauta ua, a mitmuh ngei uah nakpitak in a lunglelta uhi: hiai nasep i Pathian hih ahi chih a thei ngal ua.

¹⁷Huailou in huailai in Judah miliante’n laikhak tampi Tobiah kiang ah a khak ua, amau kiang ah Tobiah laikhakte a hongtung hi.

¹⁸Amah Arah tapa Sekaniah tanu pasal a hih ziak in, Judah ah mi tampi amah lam a kichiam lah a om ngal ua; a tapa Jehohanan in Berekiah tapa Mesullam tanu zi in a nei hi.

¹⁹Huailou leng ka ma ah a thil hoih hihte a gen ua, amah kiang ah ka thute a tunzel uhi. Huchi in Tobiah in laikhakte kei hon hihlau ding in a khak hi.