Read Paite Chin NEHEMIAH 8 Bible Online

NEHEMIAH 8 - Paite Chin bible

NEHEMIAH 8

¹Huchi in mite tengteng tui kongpi mai a om mun lian ah mi khat bang in a kikhawm khawmta ua; TOUPA’N Israel kiang a a piak, Mosi Dan laibu hontawi ding in Laigelhmi Ezra kiang ah thu a gen uhi.

²Siampu Ezra in omkhawmte, pasal leh numei, theihsiamna toh za thei ding tengteng ma ah kha sagihna ni khat ni’n danthu a honlata hi.

³Pasal leh numeite, leh theisiam thei dingte ma ah, zingkhang a kipan sunlai tanpha in tui kongpi mai a om mun lian ma ah a simta hi; huchi in mite tengteng in Dan laibu a bil uh a doh chiat uhi.

⁴Huai ding mah a a bawl uh, sing pulpit tung ah Laigelhmi Ezra ading a; a sik ah Mattithiah, Shema, Anaiah, Uriah, Hilkiah leh Maaseiah, a taklam pang ah ading ua; a veilam pang ah, Pedaiah, Misael, Malkiah, Hasum, Hasbaddana, Zekariah leh Mesullam.

⁵Huchi in Ezra in mite mitmuh in laibu a hong a; mite tunglam ah a om ngal a; huan a hongta a, mite tengteng ading uhi:

⁶Ezra in TOUPA, Pathian thupi a vualzawl hi. Huchi in mipi tengteng in a dawng ua, “Amen, Amen” chi a a khutte uh lik kawm in: a lute uh a kunsak ua a maite ua leisi in TOUPA a bia uhi.

⁷Jeshua, Bani, Serebiah, Jamin, Akkub, Sabbethai, Hodiah, Maaseiah, Kelita, Azariah, Jozabad, Hanan, Pelaiah leh Levi mite’n mipite dan theisiam ding in a bawl ua: huchi in mite amau mun ah ading uhi.

⁸Huchi in teltak in laibu ah, Pathian dan sung ah a sim ua; a omdan a taklang ua, huchi a lai simkhiak a theihsiamna ding un.

⁹Huan Nehemiah, amah Tirsatha ahi a, leh siampu Ezra Laigelhmi leh Levite mite sinsakte’n, mite tengteng kiang ah, “Tuni TOUPA na Pathian uh adia ni siangthou ahi; dah kei unla kap kei un” a chi ua. Dan thute a zak un lah mite tengteng a kap ngal ua.

¹⁰A kiang uah, “Pai unla, thaute ne unla, a khumkhum dawn unla, amah adia bangmah bawlkhol a omlou kiang ah tantuante khak un: tuni lah i Toupa uh adia ni siangthou ahi. Dah kei unla; TOUPA a kipahna na hatna uh ahi” a chi hi.

¹¹Huchi in Levite’n mite tengteng a daisak ua, “Tuni siangthou a hih ziak in, dai un; dah sam kei un” chi in.

¹²Huan mite tengteng ne ding leh, dawn ding leh, vualnopna thupi bawlding in a paita ua, a kiang ua phuankhiak a om thute a theisiamta uhi.

¹³A ni nih nin mite tengteng pipute inkaw lupente, siampute leh, Levi mite, Laigelhmi Ezra kiang ah, Dan thute ngaikhe ding in a kikhawm khawm uhi.

¹⁴TOUPA’N Mosi zang a Israel tate a kha sagihna Ankuangluina a aidakbuk a a tendan ding uh a thu a piakdan dan a kigelh a mu uhi:

¹⁵“Mual ah kuan khia unla, Olive hiang, gam olive leh muising hiang, tum hiang, sing vunsah hiang, a kigelh bang a, aidakbuk bawlna ding in vala un, a khopi tengteng uh leh Jerusalem a a puankhiak theihna ding un” a chi hi.

¹⁶Huchi in mite a kuan khia ua, a vala ua, michih in a inn tung ah, a pisate uah, Pathian pisate ah, tui kongpi a mun lian ah leh Ephraim kongpi a mun lian ah aidakbukte a kibawlta uhi.

¹⁷Huan saltanna a kipan hong painawnte omkhawmte tengteng in aidakbukte a bawl ua, aidakbuk ah a teng uhi. Nun tapa Joshua damlai a kipan huai ni tanpha in Israel tate’n lah huchibang in a hih naikei uhi. Huchi in nakpi a kipahna mahmah a omta hi.

¹⁸Huailou in niteng in ni masapen a kipan ni tawpni tan in Pathian Dan laibu sung ah a sim hi. Huan Ankuangluina ni sagih a nei ua; a ni giatni in thuseh dungzui in kikhopna thupi a omta hi.