Read Paite Chin NEHEMIAH 9 Bible Online

NEHEMIAH 9 - Paite Chin bible

NEHEMIAH 9

¹Hiai kha ni sawmnih leh li ni’n Israel tate anngawl kawm leh, saiip puansilh kawm leh a tung ua lei kibuak kawm in a kikhawm ua.

²Huchi in Israel chite mikhual tengteng a kipan in a ki koihtuam ua, ading ua a khelhnate uleh, a pipute uh thulimlouhnate thupha a tawi uhi.

³A mun uah ading ua, TOUPA a Pathian uh danlaibu sung ah ni khat a a seh lina teng a sim ua; a seh lina teng thupha a tawi ua, TOUPA a Pathian uh a beta uhi.

⁴Huchihlai in Levi mite, Jeshua, Bani, Kadmiel, Sebaniah, Bunni, Serebiah, Bani leh Kenanite dohkan tung ah ading ua, TOUPA a Pathian kiang uah aw ngaihtak in a kikou uhi.

⁵Huailai in Levi mite, Jeshua, Kadmiel, Bani, Hasabneiah, Serebiah, Hodiah, Sebaniah leh Pethahiah te’n, “Ding unla tangtawn a kipan tangtawn pha in TOUPA na Pathian uh vualzawl un: huchi in vualzawlna leh phatna tengteng tunglam a tawisang a om, na min thupi a vualzawl in om hen.”

⁶Ezra in a gen a, “Nang, nang kia mahmah TOUPA na hi; Van, vante Van a, sepaihte tengteng, lei leh asung a thil om tengteng, tuipite leh asung ua om tengteng na bawl a, avek un na hawi a; van sepaihte’n nang a hon bia uhi.

⁷Abram tel a, Kaldaite Ur a kipan a amah pikhia a, a kiang a Abraham min pepa, TOUPA Pathian na hi;

⁸Na ma a lungtang ginom na mu a, Kanaan mite, Hit mite, Amor mite, Jebus mite leh Girgas mite gam peding a amah toh thukhun bawlpa, a chite kiang a pe ding in, na thute bawl piching a; nang lah na diktat ngal a.

⁹“Aigupta a ka pipute uh gimthuakna na mu a, Tuipi San a a kah uh na za a;

¹⁰Pharo tung leh, a sikhate tengteng tung leh, a gam a mite tengteng tung ah chiamtehna leh thillamdangte na ensak a; amaute siatna ding in kisatheitak in a gamtang uh chih lah na thei ngal hi; tuni a bang in, min na kimuh hi.

¹¹A ma uah tuipi na khen a, huchi in gamhul tung ah tuipi lak ah a paisuak ua; amau delhte nang tuithuk sung ah, tui hattak sung a suang bang in na pailut hi.

¹²Huailou in sun in meipi kitung in amaute na pi a; zan in meipi ding in, a paina ding lampi ua vakna amaute kiang a pe ding in.

¹³Sinai vum ah leng na hohsuk a, van a kipan in amau na houpih a, vaihawm dikte leh dan dikte, thuseh leh thupiak hoihte na pia hi:

¹⁴Amau kiang ah na khawlni siangthou na theisak a, na sikha Mosi khut in, thupiakte leh, thusehte leh dan amaute na thupiak in na pia hi:

¹⁵A gilkial un van a kipan tanghou na pia a, a dangtak un suangpi a kipan amaute adin tui na pawt khesak a, amaute peding a na khut na lik a, gam luahding a kuan ding in amaute thu na pia hi.

¹⁶“Himahleh amaute leh a pipute un kisatheitak in a hih ua, a paupeng ua, na thupiakte a ngaikhe kei uhi,

¹⁷Thu a mang nuam kei ua, a lak ua na hih na thillamdangte leng a limsak sam kei uh; himahleh a kiuangsak ua, a helna uah a tanna ua kiknawn ding in heutu khat a sep uhi: himahleh nang ngaidam dia mansa, lainatna a dim leh hehpihsiam, heh mengmeng lou, chitna hau, amaute lehngatsanlou Pathian na hi a.

¹⁸Ahi, bawngnou sun a bawllai un, Aigupta a kipan a nang hon pikhepa hiai na Pathian ahi, a chi ua, nakpitak a thangpaihnate a bawllai un;

¹⁹Huchi napi in na chitna tampi ziak in amaute gamdai ah na lehngatsan kei hi: sun in a tung ua kipan meipi ding a paimang kei a, vakna amau peding, zan a mei ding leng, a paina lampi uah amaute piding in.

²⁰Amaute chil di’n na kha hoih na pia a, a kam uah na Manna na phallou kei a, amaute a dangtak un tui na pia hi.

²¹Ahi, kum sawmli gamdai ah amaute na vak a, bangmah a tasam kei ua; a puansilhte uh a tulkei a, a khepekte uh a bawkkei hi.

²²Huaiban ah gam leh mite amau a pia a, a tantuante uh dungzui a na piakkhiakte: Sihon gam, Heshbon kumpipa gam leh Bashan kumpipa Og gam a lata uhi.

²³Van aksite bang in a tate uh na pungsak a, nei ding in a lut ding uh chi a a pi leh pute kiang a na gen bang in gamsung ah na pilut hi.

²⁴Huchi in tate a lut ua gam a neita ua, a ma uah gam a tengte na satpuk a, Kanaante, a kumpite leh, gam a mite, amau khut ah na pia a, huchi a a utdan ua a tung ua a hihtheihna ding un.

²⁵Khopi hatte, gam hoihte a la ua, thil hoih tengteng a dim innte a nei ua, tuibel sekte, grephuante, olive huante, a tam a tam theikungte: huchi in a ne ua, a vah ua, a hongthau ua, na hoihna thupi ziak in a kipak mahmah uhi.

²⁶“Hinapi’n lah thu a mangkei ua, na tung ah a hel ua, na dan a nunglam uah a pai ua, na kiang lam amaute nganawn sak ding a, amaute dem a thugen na zawlneite a that ua, thangpaihna thupi mahmah a bawl uhi.

²⁷Huaiziak in a melmate uh khut ah amau na pia a, amau a hih genthei uh: a buai ni ua na kiang a hong kahlai un, van a kipan in na za a; na chitna tampi dungzui in a melmate uh khut a kipan a amaute hondam ding in hondammite a kiang uah na pia hi.

²⁸Himahleh a tawldam nung un, na ma ah gilou a hih nawn ua: huaiziak in a melmate uh khut ah amau na nusia a, huchi in amau a tung uah thu a nei ua: hinapi in a hong kihei ua, na kiang a a kah un, van a kipan na za a; na chitnate dungzui in amaute tam veipi na hunkhia hi;

²⁹Na dan a na pilut theihnawnna di’n, amau na dem a: himahleh kisatheitak in a hih ua, na thupiakte a limsakkei ua, na vaihawmte tung ah a khial zawsop uhi, huai mi’n a hih aleh, huai ah a hing ding, liang a sawisak ua, a kiuangsak ua, a za nuam kei uhi.

³⁰Himahleh kum tampi amau na thuakzou a, na zawlneite in na kha zang in amaute na dem a: himahleh a ngaikhe nuam kei ua: huaiziak in gammite khut ah amau na peta hi.

³¹Huchi napi in na chitna tampite ziak in amaute na hihbei keuhkeuh kei a, na lehngatsan kei; nang lah hehpihthei leh chingthei Pathian na hi ngal a.

³²“Huaiziak in tuin, ka Pathian uh, thupi Pathian hat leh kihtakhuai, thukhun leh chitna vompa, na ma ah, ka tung uh, ka kumpipate uh tung, ka vaihawmte uh tung, ka siampute uh tung, ka zawlneite uh tung, ka pipute uh tung, na mite, Assuria kumpipate damlai a kipan a tuni tan, na mite tung a, nauveina bangmah thamlou bang in kilang kei hen.

³³Akoi abangin ka tung ua hongtung tengteng ah nang na diktat a; nang lah diktak in na hihngal a, kou bel gilou tak in ka hih uhi:

³⁴Kumpipate leh ka vaihawmte uh hiam, siampute uh hiam, ka pipute uh hiam in na dan a zuikei ua, na thupiakte leh na thu theihpihnate, amaute dem a na theihpihnate lah a ngaikhe nuam sam kei uhi.

³⁵A gam uah nang na a semkei ua, na hoih mahmahna ziak a amau na piak, a ma ua na piak gam lian leh hoih, a nasep gilou ua kipan a kilehhei sam kei uhi.

³⁶Ngai in, tuni in sikhate ka hi ua, a gahnekna ding leh huai a hoihte neihna dia ka pipute uh kiang a na piak gam ahihleh, ngai in, asung ah sikhate ka hi uhi,

³⁷Ka khelhna ziak ua ka tung ua na koih kumpipate ading in a nak pun mahmah a: a thuthu un, ka pumpite uleh, ka gantate uh tung a thilhihtheihna a nei ua, kou ka nak gim mahmah uhi.”

³⁸Huan hiaite tengteng huchibang hita mah leh thukhun muanhuai ka bawl ua, ka gelh ua; ka vaihawmte uh, ka Levi mite uleh ka siampute un, huai ah suai a kai uhi.