Read Paite Chin ESTHER 1 Bible Online

ESTHER 1 - Paite Chin bible

ESTHER 1

¹Ahasueras damlai in hichi a honghi a, hiai Ahasueras bel India a kipan Ethiopia tan a, bial za leh sawmnih leh sagih tung a vai a hawm hi.

²Huailai a, Inpi Susan a kumpipa Ahasueras a gam mangtutphah tung a a tutlai,

³A vaihawm kum thum kum in, a vaihawmte leh a sikhate tengteng ading in Ankuangluina a bawl a; Persia leh Media thuneihna, bialte a miliante leh vaihawmte a ma ah a om uhi:

⁴A gam thupi hauhsaknate leh a vaihawmna sang zahtakhuaina ni tampi, ni za leh sawmgiat a ensak hi.

⁵Huchi in hiai nite zoh in, kumpipa’n Inpi Susan a om mite tengteng, a lian leh a neu, adin kumpipa Inpi pisa ah, Ankuangluina ni sagih a bawl hi.

⁶Puan kang khaite, a hing, a dum, puanmalngat hoih leh sandup khauzangte a dangka zungbuhte leh suangpak khuamte a henden a om a: tutna nemte dangkaeng leh dangka a bawl, suangchian suangpak san, ngou, eng leh vom a bawl tung ah a om uhi.

⁷Dangkaeng noute in dawn ding amau a pia ua, noute a kibang kei vek uhi, kumpipa uain tampi, kumpipa khuttawi letna dungzui zel in,

⁸Huchi in dan bangzel in uain dawnna a om a; kuamah phutluih a omkei hi: kumpipa’n a inn heutu tengteng kiang ah, michih in nuam a sak bangzel ua a hih ding un a theisak khin hi.

⁹Kumpinu Vasti in leng kumpipa Ahasueras in a om numeite ading in Ankuangluina a bawlsam hi.

¹⁰A ni sagih ni a, kumpipa lungtang uain a kipak a a omlai in, Mehuman, Biztha, Harbona, Bigtha leh Abagtha, Zether, leh Karkaste, kumpipa Ahasueras omna a nasem michilgehte thu a pia hi.

¹¹Kumpipa ma a kumpi lukhu toh Vasti hon tonpih a, a kilawmna mite leh vaihawmte ensak ding in, amah et in a hoih hi.

¹²Himahleh kumpinu Vasti in michilgehte zang a kumpipa thupiak hoh lou ding in a sel a: huaiziak in kumpipa a heh mahmah a, asung ah a hehna a kuang hi.

¹³Huchihlai in hunte thei mipilte kiang ah kumpipa’n, huchibang lah kuapeuh dan leh vaihawmna theite lau a kumpipa omdan sek ahi him hi.

¹⁴Amah zom in Karsena, Sethar, Admatha, Tarsis, Meres, Marsena leh Memukan, Persia leh Media vaihawmtu sagihte kumpipa mai mute leh, gamsung a tumasate ahi uhi.

¹⁵“Michilgehte zang a kumpipa Ahasueras chih a hihlouh ziak in, dan dungzui in kumpinu Vasti tung ah bang i hih ding ua?” a chi hi.

¹⁶Kumpipa leh vaihawmte ma ah Memukan in a dawng a, “Kumpinu Vasti kumpipa tung ah kia thil diklou hih ahi kei a, kumpipa Ahasueras bial sung a om vaihawmte tengteng tung leh mite tengteng tung ah leng hih ahi.

¹⁷Kumpipa Ahasueras in a ma a hongpai ding in kumpinu Vasti thu a pia, himahleh a hongpai kei, chih a kigenthang chiang in, hiai kumpinu thilhih numei tengteng kiang a tung ding a, a mit uah a pasalte uh simmohna suaksak ding ahi.

¹⁸Tuni a kumpinu thilhih naza Persia leh Media vaihawmte’n kumpipa vaihawmte tengteng kiang ah huchi mah bang a gen ding uh. Huchi in nakpi a kisimmohna leh thangpaihna a hong kipankhe ding hi.

¹⁹Kumpipa deihlam ahihleh, amah a kipan kumpi thupiak pekhia henla, Vasti kumpipa Ahasueras ma ah hongpai nawn hetlou ding chih, hihlamdan theihlouh ding in, Persia mite leh Media mite dante lak a gelh in om hen; huan kumpipa’n amah sang a hoihzaw midang khat amah kumpi mun leh mual pe leh.

²⁰Huchi in kumpipa’n thupiak a bawl ding a gamsung tengteng a a kithehzak chiang in, a thupi ngal a; zi tengteng in a pasalte uh, a liante leh a neute kiang ah zahtakna a pe ding uh” chi in.

²¹Huchi in thugen in kumpipa leh lalte a kipaksak a; huchi in Memukan thu dungzui in kumpipa’n a hihta hi.

²²Aman lah huai a kigelh dungzui in, kumpipa bial tengteng, bial chiteng leh mi chiteng kiang ah a pau uh dungzui in, huchi a michih in amah inn sung mahmah a dante a puaklut theih a, a mite pau dungzui a, a thehzak theihna ding in laikhakte a khakta hi.