Read Paite Chin ESTHER 2 Bible Online

ESTHER 2 - Paite Chin bible

ESTHER 2

¹Hiai thilte zoh in, kumpipa Ahasueras thangpaihna lungkimsak a om in, Vasti bang ahia a hih, a siatna dia bang ahia thupiak chih a theigige hi.

²Huchi in a nasepsak kumpipa sikhate’n a kiang ah, “Kumpipa ading in nungak siangthou tuailai melhoih kizong henla:

³Kumpipa’n a gam a bial tengteng ah heutu sep hen, huaite’n nungak siangthou tuailai tengteng Susan Inpi ah, numeite inn ah, Hegai kumpipa michilgeh numeite kempa in a hon pikhawm theihna ding un; huchi in siansakna ding a thilte uh amau kipe leh:

⁴Huchi in nungak kumpipa lungkimsak pen Vasti sik in kumpinu hi hen” a chi uhi. Huai thil in kumpipa a lungkimsak a; huchibang in a hihta hi.

⁵Susan Inpi ah Judah mi kuahiam, a min Mordekai, Jair tapa, Shimei tapa, Benjamin mi a om a;

⁶Amah bel Jerusalem a kipan a salte Judah kumpipa Jekoniah Babulon kumpipa Nebukadnezzar in a pimang a omte toh pimang in a om uhi.

⁷Aman Hadassah, huai bel Esther, a pangak tanu a kem piching hi: aman nu leh pa a neikei a, huai nungak a kilawm in a melhoih hi: a nu leh pa a sih un, Mordekai in a tanu ding in a la hi.

⁸Huchi in hichi a honghi a, kumpipa thupiak leh a thubawl a kizak in, nungak tampi Susan Inpi, Hegai in a kaihkhawm a omlai un, Esther leng kumpipa in ah, Hegai, numeite kempa nuai ah a honpi uhi.

⁹Huchi in nungak in amah a lungkimsak a, amah siamna a ngahta a; aman siansakna ding in a thilte amah a pepah a, a tantuante toh, amah piak ding a kilawm, kumpipa in a kipan nungak sagih toh: amah leh a nungakte numeite in a mun hoihpen ah a suanta hi.

¹⁰Esther in a hihna a genkhe kei a, a tanaute hihna leng a genkhe sam kei hi: Mordekai in lah genkhe lou ding in amah a thuhilh hi.

¹¹Huchi in Mordekai bel niteng in numeite inn mai ah a Esther in bangchi’n a hihzel a, bang a hong chidia chih thei ding in a hohzel hi.

¹²Numeite adia dan dungzui a kha sawmlehnih, murra thau toh kha guk, gim namtuite toh kha guk leh, numeite siansakna ding a t hilte toh, huchibang in a siansakna nite hihkim a a om nung in, nungak chih kumpipa Ahasueras kiang a a valut hun uh a tungta hi.

¹³Nungakte kumpipa kiang a a lut chiang un, kumpipa inn a hohpih ding in numeite omna a kipan a deihdeih uh piak in a om uhi.

¹⁴Nitaklam in a pai a, a zingnawn in numeite inn nihna ah, kumpipa michilgeh Shasgaz, meite kempa inn ah a hongkik a: kumpipa amah ah kipak napi in, kumpipa kiang ah a honglut kei a, a min a sap in a om hi.

¹⁵Huchi a amah a tanu ding a la pa, Mordekai pangak Abihail tanu, Esther kumpipa kiang a a valut hun a hongtun in, Hegai kumpipa michilgeh, numeite kempa a seh chih ngallouh bangmah a kankei hi. Huchi in amah ente tengteng mitmuh in Esther in deihsakna a ngah hi.

¹⁶Huchi in Esther kumpipa Ahasueras kiang a kumpi inn ah a kha sawmna, Tebeth kha a vaihawm kum sagihna kum in laklut in a omta hi.

¹⁷Huchi in kumpipa’n numei tengteng sang in Esther a it a, nungak siangthoute sang in a mitmuh in hehpihna leh deihsakna a mu hi; huchi in a lu tung ah lallukhu a koih a, Vasti sik in kumpinu ding in amah a bawlta hi.

¹⁸Huchihlai in kumpipa’n a vaihawmte tengteng leh a sikhate tengteng ading in Ankuang thupi, “Esther Ankuang mahmah” a luita a: bialte kiang ah khawlna a bawl a, kumpipa siamna bangzel in, thilpiakte a pia hi.

¹⁹Huchi a nungak siangthoute nihveina dia kaihkhawm a omlai un, Mordekai bel kumpipa kongpi ah a tu hi.

²⁰Esther in a tanaute leh a mite hihna a genkhe kei; amah kiang a khanletsak a om bangtak in Mordekai thupiak bang in a hih hi.

²¹Huailai a, Mordekai kumpipa kongpi a a tutlai in, kumpipa michilgeh lak a nih, Bigthan leh Teresh, kongkhak ngakte a heh ua, kumpipa Ahasueras tung a khutkha ding in a zongta uhi.

²²Huai thil Mordekai in a thei a, aman kumpinu kiang ah a theisak hi; Esther in Mordekai min in huai a kumpipa a hilhta hi.

²³Huchi in a thu a kikan leh, huchibang ahi ngei chih a ki mukhia a, a nih un sing dawn ah khailup in a om ua: tanchin gelhna laibu ah kumpipa ma ah a kigelhta hi.