Read Paite Chin ESTHER 3 Bible Online

ESTHER 3 - Paite Chin bible

ESTHER 3

¹Hiai thilte nung in kumpipa Ahasueras in Haman Agagmi Hammedatha tapa a kaisangsak a, malam a nawtsak a, a kiang a om vaihawmte tengteng tunglam ah a tutphah a koih hi.

²Huchi in kumpipa sikha tengteng, kumpipa kongpi a omte niamchik in a kun ua, Haman a zahtak mahmah uh: kumpipa’n amah tungtang thu huchibang in thu a pia hi. Himahleh Mordekai a kunkei a, amah zahna a bawlkei hi.

³Huchihlai in kumpipa sikhate, kumpipa kongpi a omte’n, Mordekai kiang ah, “Bangding a kumpipa thupiak a talek na hia?” a chi uhi.

⁴Hichi ahi a, ni teng a amah a houpih lai un, amau a ngaikhe kei a, Mordekai thu paiding hia pailou ding chih thei ding in Haman a hilh uh: amah Judah mi ahi chih amaute a hilhta hi.

⁵Huchi a Mordekai niamchik a kunlou in, amah a zahtak kei chih Haman in a theih in, a heh mahmah hi.

⁶Himahleh Mordekai tung kia a khutkhak bang thamlou in a ngaihtuah a; Mordekai mite lah amah a ensakta ngal ua; huchi in Haman in Ahasueras gam pumpi a om Judahte tengteng, Mordekai mite, hihgawp ding in a zongta hi.

⁷Kumpipa Ahasueras vaihawm kum sawmlehnih ni, kha khatna, Nisan kha in, “Pur” a san ua, huai bel aisan ahi, Haman ma ah, niteng in, kha teng in, kha sawmlehnih, Adar kha tan in.

⁸Huan Haman in kumpipa Ahasueras kiang ah, “Mi kuate hiam kithehzak a na gam bial sung tengteng a mite lak a dalh a om ua; a Dante uh mi tengteng Dan toh a kibang kei a; kumpipa dante a zuikei uhi: huaiziak in amaute thuakzoh kumpipa punna ding ahi kei hi.

⁹Kumpipa deihlam ahihleh, hihgawp a a omna ding un lai kigelh leh: kumpipa nasepna a heutute khut ah ken dangka talent sang sawm ka pe ding, kumpipa sumbawmte a tawilut ding in” a chi hi.

¹⁰Huchi in a khut a kipan kumpipa’n a zungbuh a suah a, Agagmi Hammedatha tapa Haman kiang ah, Judahte melmapa kiang ah a pia hi.

¹¹Huchi in kumpipa’n Haman kiang ah, Dangka na kiang a piak ahi, mipi leng, amau tung a pha na saksak hih ding in, a chi hi.

¹²Huchihlai in a kha khatna, a ni sawmlehthum ni’n, kumpipa laigelhmite a samlut ua, kumpipa heutuliante leh kumpipa bial chih a omte tengteng leh mi chiteng vaihawmte Haman in thu a piak peuhmah dungzui in a kigelhta hi; bialchih kiang ah huai a kigelh dungzui in, michih kiang ah a pau bangzel un; kumpipa Ahasueras min in a kigelh a, kumpipa zungbuh in suai a kisawn hi.

¹³Huchi in, Adar kha, kha sawmlehnih, a ni sawmlehthum ni mahmah a, ni khat a, Judah mite tengteng a tek a khang naupang noute leh numeite hihgawp ding, that ding leh mangthangsak ding in, kumpipa bial sung tengteng ah dak in laikhakte a khak ua, a sum uh gallak a la sak ding in.

¹⁴Laigelh kopi, thupiak bialteng a piakkhiak ding leh huai ni dia mansa a om chiat ding a, mi tengteng kiang ah a suah uhi.

¹⁵Kumpipa thupiak in dakte kinohtak in a sawlkhia ua, Susan Inpi ah thupiak a kipekhia hi: huchi in kumpipa leh Haman dawn ding in a tu ua; himahleh Susan khopi a lungzing hi.