Read Paite Chin ESTHER 4 Bible Online

ESTHER 4 - Paite Chin bible

ESTHER 4

¹Huchi a kihih tengteng Mordekai in a theih in, a puante a botkek a, vut toh saiip puan a silh a, khopi laizang ah a paikhia a, ngaihtak leh nakpi’n a kap hi.

²Kumpipa kongpi mai pha in a hongpai a: saiip puansilh mi kuamah lah kumpipa kongpi sung ah a lut theikei hi.

³Huchi in bial chiteng a, koilai peuh a kumpipa thupiak leh a thubawl tunna ah, Judahte lak ah nakpitak a sunna, anngawlna, kahna, mauna a om hi; mi tampi saiip puansilh in, vut lak ah a lum uhi.

⁴Esther nungakte leh a heutute a hongpai ua a thu amah a hilhta uhi; huchi in kumpinu a dah mahmah a: puansilh Mordekai silh ding in a khak a, amah a kipan a a saiip puan lakhe ding in: himahleh a sangkei hi.

⁵Huchi in Esther in Hatak, kumpipa michilgehte lak a khat a sam a, amah vil ding a kumpipa’n a seh, Mordekai kiang a hohding in thu a pia hi, hiai bang thu ahi, bangdia hichi ahi chih thei ding in.

⁶Huchibang in Hatak bel kumpipa kongpi mai a om, khopi mun za ah Mordekai kiang ah a va pawtkhia a.

⁷Mordekai in a tung a tung tengteng thu amah a hilh a, Judahte adia, amaute hihsiatna ding, kumpipa sumbawmte a Haman in dangka sumpiak ding a a chiam zah geih a hilh hi.

⁸Huailou leng Esther kiang a lak ding leh, a kiang a phuan ding in amaute hihsiatna ding a Susan a thubawl piakkhiak laigelh kopi amah a pia a; kumpipa kiang a vahoh ding a hilh din, a kiang a thumna vabawl ding leh a mite adia, a ma a ngetna vabawl ding in.

⁹Huchi in Hatak a hong a Mordekai thute Esther a hilh hi.

¹⁰Huchihlai in Esther in Hatak kiang ah thu a gen a, Mordekai ading thukhah a pia hi,

¹¹“Kumpipa sikhate tengteng leh, kumpipa bialte a mite’n a thei kilkel uhi, mi kuapeuh numei, pasal leng, saplouh a, kumpipa pisa sungnung zaw pen a a hoh uleh, amah ading in dan khat a om a, ‘sihsak ding’ chih leh, ‘a hing ding,’ chi a, kumpipa’n dangkaeng kumpi chiang a letkhumte chih louh ngal: himahleh hiai ni sawmthum kumpipa kiang a hongpai ding in sap in ka na omta kei hi” chi in.

¹²Huan Esther thute Mordekai a hilh uhi.

¹³Huchihlai in Mordekai in Esther kiang a dawnna vatun nawn ding in amau a chi a, “Judah tengteng sang in, kumpipa inn sung a nang na suahtak kingaihtuah het ken.

¹⁴Nang hiai hun a bangmah genlou a na daih dide leh, mun dang a kipan in Judahte ding in panpihna leh hutkhiakna a hongom ding a, himahleh nang leh na pa inkawte na mangthang ding uh: hun hichibang adia honglal na hihmel kuan a thei a?”

¹⁵Huchi in Esther in Mordekai kiang a dawnna vatun ding in amau a chi hi.

¹⁶“Kuan inla, Susan a om Judahte tengteng kaikhawm inla kei ding in anngawl unla, ni thum, zan hiam sun hiam: nek lah ne kei unla, dawn leng dawn kei un: huchi mah bang in ken leng ka nungakte toh an ka ngawl ding uh; huaichiangin kumpipa kiang ah ka hoh ngeingei ding, dan bang zaw ahi kei a: huchi a ka man leh, mang ka himai ding” a chi hi.

¹⁷Huchi in Mordekai a kuan a, Esther in amah thu a piak tengteng bang in a gamta hi.