Read Paite Chin ESTHER 5 Bible Online

ESTHER 5 - Paite Chin bible

ESTHER 5

¹Hichi ahi a ni thum ni’n, Esther in a kumpi puansilh a silh a, kumpipa inn zawn a, kumpipa pisa sungnung zaw pen ah a vading a: kumpipa bel inn lutna zawn a, kumpi inn ah a mangtutphah tung ah a tu hi.

²Hichibang ahi a, kumpipa’n pisa a kumpinu Esther ding a muh in, a mitmuh in deihsakna a ngahta hi: kumpipa’n a khut a om dangkaeng kumpi chiang Esther lam ah a lik hi. Huchi in Esther a hongnai a, kumpi chiang dawn a khoih hi.

³Kumpipa’n a kiang ah, “Bang na deih a, kumpinu Esther? Na ngetna bang ahia? Gam kimkhat tan leng piak na hi ding” a chi hi.

⁴Huchi in Esther in, “ kumpipa’n hoih a sakleh tuni’n kumpipa leh Haman amah adia ka bawl annekna ah hongpai un” a chi hi.

⁵Huan kumpipa’n, “Haman kinoh sak un, Esther gen bang a hih a hih theihna ding in” a chi hi. Huchi in Esther annekna bawl ah kumpipa leh Haman a hong uhi.

⁶Huan uain a dawnlai un kumpipa’n Esther kiang ah, “Bang ahia na thumna? Phal a hihtheihna ding in: bang ahia na ngetna? Gam kimkhat tan in leng piak ahi ding” a chi hi.

⁷Esther in a dawng a, “Ka thumna leh ka ngetna hiai ahi;

⁸Kumpipa mitmuh a deihsakna ka muh leh, ka thumna phal ding, leh ka ngetna bawl ding a kumpipa a lungkim leh, kumpipa leh Haman amau adia ka bawl ding annekna ah hong le uh, kumpipa’n a chih bang in zingchiang in ka hih ding” a chi hi.

⁹Huchi in huai ni’n nuamsa leh lung kipak in Haman a paikheta a: himahleh Mordekai kumpipa kongpi a om, amah dia ding lou a tat leng tanglou Haman in a muh in, Mordekai tung ah a heh mahmah hi.

¹⁰Huchi in leng Haman a ki ip teitei a, inn ah a paita; huan mi a sawl a a lawmte leh a zi Zeresh a hon tonpih hi.

¹¹Haman in a kiang uah, a hauhsakna thupina leh, a tate tamdan leh, kumpipa’n a kaisang sakna thil tengteng leh kumpipa sikhate vaihawmte tung a a masak tuamdan a gen hi.

¹²Haman in, ahi, “Esther in annekna a bawl ah mi kuamah kumpipa toh kei chih louhngal a hohsak kei; zingchiang in leng kumpipa toh kei a honsam hi.

¹³Hitamahleh Mordekai huai Judapa, kumpipa kongpi a tu ka muh laiteng hiaite tengteng kei ading in bangmah a phatuam kei,” a chilai hi.

¹⁴Huchi in a zi Zeresh leh a lawmte’n a kiang ah, “Khailupna khuam tong sawmnga a sang kibawl henla, zingsang in nang kumpipa kiang ah thugen inla huai a Mordekai khailup ahihtheih na ding in; huchi in vualnuamtak in kumpipa toh annekna ah na hoh ding uh” a chi uhi. Hiai in Haman a kipaksak a; huchi in khailupna khuam a bawlsakta hi.