Read Paite Chin ESTHER 7 Bible Online

ESTHER 7 - Paite Chin bible

ESTHER 7

¹Huchi in kumpipa leh Haman kumpinu Esther toh annekna ah a hong uhi.

²Uain a dawnlai un a ni nihni in kumpipa’n Esther kiang ah, Bang ahia na thumna, kumpinu Esther? A hon phalsak ding uh: bang ahia na ngetna? Gam kimkhat leng piak in na om ding, a chi hi.

³Huchi in Esther kumpinu’n a dawng a, “Aw kumpipa, na mitmuh a deihsakna ka muh a, kumpipa kipahna ahihleh, ka thumna ah ka hinna leh ka mite hinna piak in om hen:

⁴Zuak in ka omta ua, kei leh ka mite, hihgawp a om ding in, thah a om ding in leh hihmang ding in. Sikhapa ding leh sikhanu ding a zuak a om hi le ung zaw, melma in kumpipa siatna gunbawl theita kei mahleh, daidide ding hi veng in” a chi hi.

⁵Kumpipa Ahasueras in thu a gen a, kumpinu Esther kiang ah, “Kua ahia, kaw om ahia, huchibang a lungtang sung a tum ngam?” a chi hi.

⁶Esther in, “Melma leh gal, hiai giloupa Haman mah” a chi hi. Huchi in kumpipa leh kumpinu ma ah Haman a lauta hi.

⁷Huchi in uain annekna a kipan a heh ziak in kumpipa ading a Inpi huan sung ah a lu a: huchi in kumpinu Esther kiang a a hinna ngen ding in Haman a dingta hi; kumpipa’n a siatna ding in hoihlou a tup a om chih a thei hi.

⁸Kumpipa Inpi huan a kipan uain annekna mun ah a hongkik a; huchi in Esther omna tutphah nem tung ah Haman a puk hi. Kumpipa’n, “Inn sung a ka ma a kumpinu nangawn sual ding ahi hia?” a chi hi. Kumpipa kam a thupawt bang in, Haman maitang a tuamsakta uhi.

⁹Huailai in kumpipa ma a om zel michilgehte lak a khat, Harbonah in, “En un, Haman in Mordekai, kumpipa gum a thugenpa adia a bawl, khailupna khuam tong sawmnga a sang, Haman inn ah ading hi” a chi hi. Huan kumpipa’n “Huai ah amah khailum un” a chi hi.

¹⁰Huchi in Mordekai adia a bawlkholh sak khailupna khuamtung ah Haman a khailumta uhi. Huchi in kumpipa thangpaihna a daita hi.