Read Paite Chin ESTHER 8 Bible Online

ESTHER 8 - Paite Chin bible

ESTHER 8

¹Huai ni’n kumpipa Ahasueras in Judahte melmapa Haman inn kumpinu Esther kiang ah a pia hi. Kumpipa ma ah Mordekai a hong a; Esther in amah ading in kua ahia chih a genkhinta hi.

²Huchi in kumpipa’n a zungbuh a suah a, Haman a kipan a lak, Mordekai kiang ah a peta hi. Esther in Haman inkaw tung ah Mordekai a koihta hi.

³Esther in kumpipa ma ah thu a genlai a, a khebul a puk in, Agagmi Haman gilou bawl leh Judahte siatna ding a a lunggel khitsa a lunggelna koihmang ding in khitui toh amah a ngen ngutngut hi.

⁴Huchi in kumpipa’n Esther lam ah a dangkaeng kumpi chiang a len a. Huchi in Esther a thou a kumpipa ma ah ading hi.

⁵Aman, “Kumpipa lungkimna a hih a, a mitmuh deihsakna ka muh a, kumpipa ma a thildik a a lat a, a muh a lungkimhuai ka hihleh, Haman Hammedatha Agag mi tapa in laikhak a bawlte kumpipa bial a om Judahte hihsiatna ding a a gelh sut in om hen:

⁶Huchilou in ka mite tung a gilou tungding ken bangchi’n ka en ngam dia? Ahihkeileh ka tanaute siatna bangchi in ka mu ngam dia?” a chi hi.

⁷Kumpipa Ahasueras in kumpinu Esther kiang leh Mordekai Judah mi kiang ah, “Ngai un, Judahte tung a a khut a khak ziak in, Haman inkawte leh, khailupna khuam a a khailuppa uh amah Esther kiang ah a peta hi.

⁸Na deih bang in, kumpipa min in, kumpipa zungbuh a sawn in, Judahte kiang ah leng laigelh un: laigelh kumpipa min a gelh a, kumpipa zungbuh a sawn, mi kuapeuh in a hihlamdang thei ngal kei a” a chi hi.

⁹Huchi in kumpipa laigelhmite a sam ua, a kha thumna Sivan kha a, a ni sawmnih leh thum ni’n; Judahte tungtang thu Mordekai in thu a piak bang in gam heutute kiang leh, India a kipan Ethiopia pha a om bialte ukpipate leh vaihawmte, bial za leh sawmnih leh sagih, huai a gelhdan bangzel a bial chiteng kiang, mi chiteng a pau uh dungzui zel in, a laigelh uh bangzel a Judahte, a pau uh bangzel in a kiang uah gelh in a omta hi.

¹⁰Kumpipa Ahasueras min in a gelh a, kumpipa zungbuh in a sawn a, kumpipa nasepna a kizangsek sakol man gang, hoihtak a vulhte a tuang in sakol tung ah dak in laikhakte a khakta hi.

¹¹Huai ah kumpipa’n khopi chiteng a om Judahte kikhawm khawm a, a hinna ua dia pang a, amaute sual ding a nauneute uleh a numeite uh, a sum uh gallak a la ding a kisa mite leh bial thilhihtheihna hihse ding leh mangthang sak din phalna a pia hi.

¹²Kumpipa Ahasueras bial tengteng ah ni khat in, huaibel, a kha sawmlehnih, Adar kha ahi a, a ni sawmlehthumni tak in.

¹³Bial chiteng a piak ding chi a thupiak, kigelh a kopi mite tengteng kiang ah suah in a om a, huai ni chiang a Judahte’n a melmate uh tung a phula ding a mansa a omchiat theihna ding un.

¹⁴Huchi in dak kumpipa nasepna a zat sakol mangangte tung a tuangte a paikhia ua, kumpipa thupiak in amau a nawh in a khawksak ngal ua; thupiak pen Susan Inpi a piakkhiak ahi.

¹⁵Huchi in Mordekai bel kumpi puandum leh kang, dangkaeng lallukhu thupi toh, puanaktual puanmalngat hoih leh sandup toh kumpipa ma a kipan a paikheta hi: Susan khopi a kikou a, a kipak hi.

¹⁶Huchi in Judahte’n kouzanna leh kipahna, nuamna leh zahna a nei uhi.

¹⁷Bial chiteng leh, khopi chiteng a, koilai peuh a kumpipa thupiak leh a thubawl paina peuh ah, Judahte’n Ankuangluina leh ni hoih kipahna leh nuamna a nei uhi. Huchi in gam a mite lak a tampite Judahte a honghi ua; Judahte launa lah a tung uah a hong omta hi.