Read Paite Chin ESTHER 9 Bible Online

ESTHER 9 - Paite Chin bible

ESTHER 9

¹Huan a kha sawmlehnih, Adar kha, huai mah a ni sawmlehthum ni, kumpipa thupiak leh a thubawl tangtunna ding a hong nailai in, Judate melmate’n a tung ua vaihawmna neih a kilamet ni uh; hinapi a, a hilou lam a hong kilehbuta, Judate’n amau mudahte tung a vaihawmna a hon neihlai un;

²Kumpipa Ahasueras bial tengteng a khopite uah Judahte, amau siatna zongte tung a khutkha ding in, a kikhawm khawm ua: kuamah in lah amaute a nangzou kei uhi; mite tengteng tung ah lah amaute launa a hong omta hi.

³Huchi in bialte a vaihawmte leh, gamukmite leh, ukpipate leh kumpipa nasemte’n, Judahte a panpih ua; Mordekai launa lah a tung uah a hongom ngal a.

⁴Kumpipa inn ah Mordekai a thupi a, bial tengteng ah a min a thang kheta hi: hiai mipa Mordekai lah a hong thupi semsem hi.

⁵Huchi in namsau a sat in Judahte’n a melmate tengteng a that ua, thahna leh hihsiatna in, amaute mudahte tung ah a hih ding uh a hihta uhi.

⁶Susan Inpi ah Judahte’n mi za nga a that ua a hihgawp uhi.

⁷Parsandatha, Dalphon, Aspahtha,

⁸Poratha, Adalia, Aridatha,

⁹Parmastha, Arisai, Aridai, Vajezathate,

¹⁰Judate melmapa Hammedatha tapa Haman tapate, a that ua; himahleh gallak ah a khut uh a nga kei uhi.

¹¹Huai ni’n Susan Inpi a thah a om zah kumpipa ma ah a hontawi uhi.

¹²Huan kumpipa’n kumpinu Esther kiang ah, “Judate’n Susan Inpi sung ah mi za nga a that ua a hihsia uh, Haman tapa sawmte toh; kumpipa bial dangte ah bang a chi bawlta phet ding uam ah: Khaile, bang na thum a? Na kiang a phal ahi ding: ahihkeileh bang ahia na ngetlai? Na kiang a phal ahi” a chi hi.

¹³Esther in, Kumpipa lungkimna ahihleh, zingchiang a tuni a thupiak bangbang a gamtang ding in Susan a om Judahte phal inla, Haman tapa sawmte khailupna khuam ah kikhai le uh” a chi hi.

¹⁴Huchi in huchibang a hih ding chi’n kumpipa’n thu a pia hi: Susan ah thubawl a kipekhia a: huchi in Haman tapa sawmte a khaita uhi.

¹⁵Adar kha mah a ni sawmlehli ni’n Susan a om Judahte a kikhawm khawm ua, Susan ah mi za thum a that uh; himahleh gallak tung ah a khut uh a nga kei uhi.

¹⁶Huchi in kumpipa bialte a om Judah dangte a kikhawm khawm ua, a hinna uh a hum ua, a melmate ua kipan khawlna a nei ua, amau mudahte lak ah mi sing sagih leh sang nga a that ua; himahleh gallak tung ah a khut uh a nga kei uh.

¹⁷Adar kha ni sawm leh thumni in hiai tuh hih ahi; huai mah a ni sawmlehli ni’n a khawl ua, Ankuanglui ni leh kipahna ni’n a zang uhi.

¹⁸Himahleh Susan a om Judate a kikhawm ua a ni sawmlehthum ni’n, leh a ni sawmlehli ni’n; huai mah a ni sawmlehnga ni’n a khawlta ua, Ankuanglui ni leh kipahna ni’n a zang uhi.

¹⁹Huaiziak in khoneute a Judahte, khaw kulhbang neilou a tengte’n, Adar kha ni sawmlehli ni kipahna ni leh Ankuanglui nin, ni hoih ni, leh a kuakua tantuan kikhakna ni’n a nei uhi.

²⁰Huan Mordekai in hiai thilte a gelh a, kumpipa Ahasueras bial tengteng a om Judahte, gamla leh nai a omte kiang ah a khak hi,

²¹Kum teng a, Adar kha ni sawmlehli leh ni sawmlehnga ni kumteng a tang ding a hilhna ding in,

²²Judahte a melmate ua kipan a khawlni uh, amau adia lungkhamna kipahna a hong hihna kha, misi sunna ni hoih a hong hihna kha bang in: huai nite Ankuangluina leh kipahna ni a om ua, tantuante a kuakua a kikhak ua, gentheite kiang ah thilpiakte piakna a neih theihna ding un.

²³Huchi in Judahte’n a patkhitsa bang un leh, Mordekai in amaute kiang a a gelhkhitsa bang in hih ding in a theisiam uhi.

²⁴Hammedatha tapa Haman, Agagmi, Judah tengteng melmapa’n Judah tengteng siatna ding amau hihse ding, a ngaihtuah a, amaute hihgawp ding leh, amaute hihse ding a, Pur, huai bel, aisan ahi, a na paih ziak in;

²⁵Himahleh a thu kumpipa ma a hongtun in, a ngaihtuah gilou, Judahte siatna dia a ngaihtuah, amah lutung mahmah a kibung ding in laikhakte in thu a peta a; huchi a amah leh a tapate khailupna khuam a khai a omna ding un.

²⁶Huchibang a hih ziak in hiai nite Purim, Pur minzui in a sa uhi. Huaiziak in hiai laikhak thute tengteng ziak leh hiai thu tungtang thu a muhsa uh, a tung ua hongtun ziak in.

²⁷Judahte’n a hihkip ua, amau tung leh, a suante uh tung leh, amaute huchibang a kizomkhawm bangte tengteng tung ah a kisuanta uhi, huchi a pellou a, huai a laigelh dungzui leh, huai a hun sehsa dungzui a, kum chiteng a hiai ni nihte a tan theihna ding un.

²⁸Huchi a hiai nite a khang a khang a, a inkuan kuan a, bial chiteng leh khopi chiteng a theihgige leh tan a omtheihna ding in; huchi a hiai Purim nite Judahte lak a kipan a a zuaulouh a, huaite theihgigena leng a suante uh a kipan a manlouhna ding in.

²⁹Huchi in kumpinu Esther, Abihail tanu leh, Mordekai Judah min, hiai Purim laikhak nihna sukkipna ding in thuneihna tengteng in a gelhta uhi.

³⁰Judahte tengteng kiang ah, Ahasueras gam a bial za leh sawmnih leh sagihte kiang ah, lungmuanna leh thutak thute, laikhakte a khakta hi,

³¹Hiai Purim nite a hun a sehsa uh, Mordekai Judah mi leh kumpinu Esther in huaite pha a sak uh dungzui leh, amau ading leh a suante uh adia, anngawlna leh a kahna thu ua a na hihkip bang ua hihkip ding in.

³²Esther thupiak in hiai Purim thute a hihkip a; laibu ah a kigelhta hi.