Read Paite Chin EKSODAS 10 Bible Online

EKSODAS 10 - Paite Chin bible

EKSODAS 10

¹Huan TOUPA’N Mosi kiang ah, “Pharo kiang ah lut in. A ma a hiai ka chiamtehnate ka etsak theihna ding in a lungtang, a sikhate lungtang toh ka khauhsak hi.

²Na tapa bil leh na tapa tapa bil a, Aigupta gam a bang thil ahia ka hih, a lak ua chiamtehna ka hihte na gentheih a, TOUPA ka hi chih na theihna ding un” a chi hi.

³Mosi leh Aron Pharo kiang ah a lut ua, a kiang ah, “Hebrute TOUPA Pathian in hichi in a chi. ‘Bangtan vei ka ma a kiniamkhiak nial ding na hia? Ka na a sep theihna ding un, ka mite paisak in.’

⁴Huchi a hih kei a, ka mite paisak na nial leh ngai in, na tuipiau ah zingchiang in khaukhup k’on sawl ding hi.

⁵Lei mai a tuam ding ua, mite’n lei a mu theikei ding. A suakta bang a ne ding ua, gial in a hon hawisak teng, lou apan nang adia singpou chiteng a ne ding uhi.

⁶Na innte uah a dim ding ua, na sikhate innte leh Aiguptate innte leh leitung om apan tuni tan a na pate, na pate uh pate un a muh ngeilouh uh,” a chi uhi. Huchi in a kihei a, Pharo apan a pawtkheta hi.

⁷Pharo sikhate’n a kiang ah, “Bang tan hiai mipa ei adia thang hi ding ahia? Mite paisak in, TOUPA a Pathian uh na a sep theihna ding un. Aigupta hihsiat in a om, chih thei nailou na hi hia?” a chi uhi.

⁸Mosi leh Aron Pharo kiang ah a honpi nawn ua; aman a kiang uah, “Pai un, TOUPA na Pathian uh na sem un. Himahleh a paidingte kuate ahi ua?” a chi hi.

⁹Mosi in, “Ka naupangte u toh, ka tekte utoh, ka tapate uleh ka tanute uh, ka ganhonte uleh ka belamhonte utoh ka pai ding uhi. TOUPA kiang a Ankuangluina nei ding ka hih ziak un” a chi hi.

¹⁰Aman a kiang uah, “TOUPA na kiang uah om hen, na numeite uh leh na nau neute uh k’on paisak leh, kiveng un, na ma uah gilou a om hi.

¹¹Huchi hilou e, nou pasal piching teng kuan unla, TOUPA na vasem un. Huailah na ut ngal ua” a chi hi. Huchi in Pharo apan delhkhiak in a om uhi.

¹²TOUPA’N Mosi kiang ah, “Aigupta gam tung ah khaukhupte a hong omna ding in na khut zankhia in. Aigupta gam a, a hong paitouh ua, gam a haichi teng, gial in a hawi teng tanpha a nek theihna ding un” a chi hi.

¹³Mosi in a chiang Aigupta gam tung ah a lik a, TOUPA’Nhuai ni nitum in leh huai zankhua in suahlam huih a nungsak a; zingsang a hong hih in suahlam huih in khaukhup a hon tunta hi.

¹⁴Huchi in Aigupta gam tengteng tung ah khaukhupte a paitou ua, Aigupta gam tengteng ah a khawl ua: a chimtakhuai mahmah uhi. A malam uah huchibang khaukhup amau bang in a om ngeikei a, a nunglam uah leng huchibang a omkei ding hi.

¹⁵Leimai tengteng a tuam ziak un, gam a mialta hi. Gam a haichi chih gial in a hawi singgahte toh a ne uhi. Huchi in singte ah hiam, lou a haichite ah hiam leng thil hing a omta kei, Aigupta gamsung teng ah.

¹⁶Huaitak in Pharo in kintak in Mosi leh Aron a samsaka; “TOUPA na Pathian leh nou tung ah ka na khialta hi.

¹⁷Huaiziak in tuin, k’on ngen hi. Hiai tutung kia ka khelhna ngaidam inla, kei apan hiai sihna a lakmang theihna ding in, TOUPA na Pathian kiang ah ngen in” a chi hi.

¹⁸Huchi in Pharo apan a paikheta a, TOUPA kiang ah a ngenta hi.

¹⁹TOUPA’N suahlam huih hat mahmah a khahta a, huai in khaukhupte a lamang a, Tuipi San ah a lawnlutta hi. Huchi in Aigupta gam tengteng ah khaukhup khat leng a omta kei hi.

²⁰Himahleh TOUPA’N Pharo lungtang a khauhsak a, Israel suante a paisak nuamta kei hi.

²¹TOUPA’N Mosi kiang ah, “Aigupta gam tung a khomial, khoihtheih ding mialsah a om theihna ding in, vanlam ah na khut likkhia in” a chi hi.

²²Mosi in vanlam ah a khut a likkhia a; huchi in ni thum sung Aigupta gam tengteng ah khomial bikbek a omta hi.

²³Kuamah a kimu tuah kei ua, a omna apan ni thum sung kuamah a thou kei uhi. Himahleh Israel suante tenna uah khovak a nei uhi.

²⁴Pharo in Mosi a sam a, “Pai un, TOUPA nna sem un. Na bawnghonte leh na ganhonte uh kia om uhen. Na nau neute un leng hon zui uhen” a chi hi.

²⁵Mosi in, “TOUPA ka Pathian uh kiang a ka kithoih theihna ding un, kithoihnate leh haltum thillatte leng na honpiak ngeingei ding ahi.

²⁶Ka bawnghonte un leng a honzuih ding uh ahi. Nunglam ah chi in khat lel leng nawtsiat ahi kei ding. Huaite apan TOUPA ka Pathian uh nasepna dia ka lak ding uh a hih ziak in. Huai mun ka tun masiah uh, bang in ahia TOUPA nna ka sep ding uh, ka theikei uhi” a chi hi.

²⁷Himahleh TOUPA’N Pharo lungtang a khauhsak a, amau a paisak nuam kei hi.

²⁸Huchi in Pharo in a kiang ah, “Ka kiang apan paimang in. Kiveng in, ka mel mu nawn ken. Ka mel na muh nini a si ding na hih ziak in” a chi hi.

²⁹Mosi in, “Na gen hoih e. Ka mel na mu nawn kei ding” a chi hi.