Read Paite Chin EKSODAS 11 Bible Online

EKSODAS 11 - Paite Chin bible

EKSODAS 11

¹Huan, TOUPA’N Mosi kiang ah, “Pharo tung leh Aigupta gam tung ah gawtna khat ka tunlai ding. Huaikhit chiang in hiai apan a hon paisak ding. A hon paisak chiang in, a hon hawlkhe siang sipsip ding hi.

²Tuin mite bil ah thu gen inla, pasal chih in invengte kiang ah ngen hen. Numei chih in invengte kiang ah dangka suangmantamte leh dangkaeng suangmantamte ngen hen” a chi hi.

³TOUPA’N Aiguptate mitmuh in mite deihsakna a pia hi. Huailou in Aigupta gam ah leh Pharo sikhate mitmuh in leh mite mitmuh in Mosi a thupi mahmah hi

⁴Mosi in, “Hiai bang in TOUPA’N a chi, zankim chiang in Aigupta gamsung teng ka tawnsuak ding hi.

⁵Aigupta gam a piang masa tengteng, a mangtutphah a tu Pharo tapa masapen apan buhhek a om sikhanu ta masapen leh ganta piang masa tengteng toh a si ding uhi.

⁶Aigupta gam pumpi ah kahna thupi a om dia, huchibang om ngei nai lou, huchibang om ngei nawnlou ding.

⁷Himahleh Israel suante lak a kuamah siatna ding in, mi hiam gan hiam siatna ding in ui in a lei a tangsak kei ding a; TOUPA’N Aiguptate leh Israel a khentuam dan na thei ding hi.

⁸Huai hun chiang in na milian tengteng ka kiang ah a hongsuk ding ua, a hong kun ding ua, ‘nang honzui mitengteng toh paikhia un’ a honchi ding uhi. Huaikhit chiang in ka paikhe ding” chi in hehtak in Pharo apan Mosi paikhia hi.

⁹TOUPA’N Mosi kiang ah, “Ka thillamdangte Aigupta gam a a punna ding in Pharo in a hon ngaikhe kei ding” a chi hi.

¹⁰Mosi leh Aron in Pharo ma ah hiai thillamdang tengteng a hihta ua; TOUPA’N Pharo lungtang a khauhsak a, gam apan Israel suante a paisak nuam kei hi.