Read Paite Chin EKSODAS 12 Bible Online

EKSODAS 12 - Paite Chin bible

EKSODAS 12

¹TOUPA’N Aigupta gam ah Mosi leh Aron kiang ah thu a gen hi.

²Hiai kha nou adia khate kipatna ahi ding. Nou ading in kum khat a a kha masapen ahi ding hi.

³Israel khawmpite kiang ah thu gen in, Hiai kha ni sawm ni’n a pipute inkuan bangzel in, michih in amah ading in belamnou a kilak chiat dia, in khat zel ading in belamnou khat zel ahi ding.

⁴Belamnou khat adia inkuan a tawmluat leh, a mi zah dungzui in amah leh a in zom a, invengte toh lakhawm hen. Michih in a kham ding bangzel in belamnou na sim ding uhi.

⁵Na belamnou uh gensiatbei, a pa kum khatna ahi dia; belamhon lak hiam kelte lak apan in hiam na la khe ding uhi.

⁶Huai kha mah a ni sawmlehli tan na kem ding ua; nitaklam in Israel khawmpi omkhawmte’n a gou ding uhi.

⁷A sisan na la ding ua, a nekna ding in kongkhak biang khuam nihte ah leh kongkhak tung ah na tat ding uhi.

⁸Huai zan in sa mei a hai, tanghou silngou sohlouh toh na ne ding uhi; lou kha toh na ne ding uhi.

⁹Sial nek kei unla, tuihuan hetkei un, a lutang, a khete, leh a sungkua toh mei in na haimin zaw ding uhi.

¹⁰A zingchiang tan in a bangmah na valsak kei ding uhi. A zingchiang tan a omlaite mei in na hal ding uhi.

¹¹Hichibang in na ne ding uhi. Na kawng uh gaksa in, na khedap uh na khe ua bulhsa in, na khut ua na chiangkhunte uh tawisa in na kin nekding uhi. TOUPA Paikan Ankuang ahi.

¹²Tu zan chia Aigupta gam ka tawnsuak ding hi. Aigupta gam a piang masa teng, mi leh gan that ding ka hih ziak in. Aigupta pathian tengteng siatna ding in ka vaihawm ding hi. Kei TOUPA ka hi.

¹³Sisan nou ading in na omna innte uah chiamtehna ahi ding. Sisan ka muh chiang in, k’on Paikan dia, Aigupta gam ka gawt lai a, nou hon hihse ding in na tung uah hiai gawtna a omkei ding hi.

¹⁴Tuni nou ading in theihgige ahi ding. Na khang teng un TOUPA kiang a Ankuangluina in na nei ding ua; tangtawn in dan a Ankuangluina in na nei ding uhi.

¹⁵Ni sagih tanghou silngou sohlouh na ne ding ua; ni masapen ni ngei in na innte ua pan in silngou na koihmang ding uhi. Ni masapen apan a ni sagih ni tan, tanghou silngou sawh ne peuhmah, huai mi Israel apan satkhiak ding ahi ngal a.

¹⁶Ni masapen ni’n kikhopna siangthou a om dia, a ni sagih ni’n nou ading in kikhopna siangthou a om ding. Huai nite in nekbawl chihlouh ngal nna seplouh himhim ding ahi, Nek bawl kia na hihthei ding uhi.

¹⁷Tanghou silngou sohlouh Ankuangluina na tang ding ua; hiai ni mah a Aigupta gam apan na mite uhi ka pikhiak ziak in. Huaiziak in tangtawn in na khang un dan in hiai ni na tang ding uh ahi.

¹⁸A kha khatna ah, huai kha a ni sawmlehli ni, nitaklam a kipan huai kha nitaklam a ni sawmnih leh khat matan in, tanghou silngou sohlouh na ne ding uhi,

¹⁹Na inn sung uah ni sagih silngou muh in a om ding ahi kei. Kuapeuh silngou sawh ne, huai mingei mi khual hiam hi in, a gamsung a piang hita leh Israel khawmpi apat satkhiat ding ahi.

²⁰Silngou sawh bangmah na ne ding uh ahi kei. Na tenna peuhmah uah tanghou silngou sohlouh na ne ding uhi, a chi hi.

²¹Mosi in Israel upate a sam sak a, a kiang uah, “Na inkuan bangzel un belamnou kaikhia unla kilak unla, Paikan gou un, a chi hi.

²²Hussop gaklop na la ding ua, belkuang sung a om sisan ah na diah ding ua, belkuang sung a om sisan in kongkhak biang khuam tuak leh kongkhak tung na zep ding uhi. Zingsang masiah na lak ua kuamah a inn kongkhak ah a va pawtkhe ding ahi kei.

²³Aiguptate that dia TOUPA hong paisuak ding a hih ziak in. Kongkhak tung a leh kongbiang khuam nihte a sisan a muh chiang in TOUPA’N huai kongkhak a Paikan dia, honthat ding in na inn sung uah hihse mi a honglut a phalkei ding hi.

²⁴Tangtawn in na tapate uh ading leh nou ading in dan in hiai thil na tang ding uh ahi.

²⁵A chiam bang a, nou a honpiak ding gam, na tun chiang un, hichi ahi dia, hiai biakna thilzek in na nei ding uh ahi.

²⁶Hichi a honghi dia, na tate un na kiang ua, Hiai biakna thilzek bang na chihna uh ahia? a honchih chiang un,

²⁷Aiguptate a thah a, ei innte a tatkhiak lai a, Aigupta gam a Israel suante innte paikanpa, TOUPA paikanna theihgigena ahi” na chi ding uhi. Huchi in mite’n a lutang uh a kunsak ua a beta uhi.

²⁸Israel suante a paimang ua, TOUPA’N Mosi leh Aron thu a piak bang in a hih ua, huchibang in amau leng a hihta uhi.

²⁹Huan, hichi ahi a, zankim lai in TOUPA’N Aigupta gam a piang masa tengteng, a mangtutphah tung a tu Pharo ta masapen apan suangkulh sung a om sal ta masapen tan in, ganhon nou masapen teng toh a thatta hi.

³⁰Huchi in zan in Pharo a thou a, amah leh a sikhate leh Aigupta tengteng. Aigupta gam ah kahna thupitak a omta a; inn khat mahmah mi khat sih louhna a omlouh ziak in.

³¹Zan in Mosi leh Aron a samsaka, “Thou unla, ka mite lak apan paikhia un. Nou gel leh Israel suante pai un. Na gensa bang un, TOUPA nna va sem un.

³²Na bawnghonte uleh na ganhonte u leng, na chih bang un, pi unla, pai un. Huchi in keileng hon vualzawl un” a chi hi.

³³Kintak a gam apan a sawlkhiak theihna ding un Aiguptate’n mite a nawh mahmah ua; “Mi sisa hivek ding i hi uh” a chih ziak un.

³⁴Mite’n a tangbuang uh silngou sawh ma in a la ua, a liangzang uah a tangbuang haihnate uh puan a khihsawn in.

³⁵Mosi thu bang in Israel suante a omta ua; Aiguptate dangka suangmantam leh dangkaeng suangmantam leh puansilh a ngen uhi.

³⁶Aiguptate mitmuh in TOUPA’Nmite deihsakna a pia a, a deih bang un huai thilte a kiang uah a pia uhi. Huchi in Aiguptate a lok uhi.

³⁷Israel suante Rameses apan Sukkoth a tung ua, naupangte simlouh pasal ngen khe a pai nuai guk ahi uhi.

³⁸Mi kihelte’n leng bawnghonte, ganhonte leh ganta tampi mahmah toh amau a zuitou uhi.

³⁹Silngou sohlouh a hih ziak in, Aigupta gam apan a honpuak uh tangbuang tanghou beu silngou sohlouh in a kang uhi. Aigupta gam apan hawlkhiak a om a, a tam theih nawnlouh ziak un, annek bangmah a kibawl kholh man kei uhi.

⁴⁰Aigupta gam a teng, Israel suante tamsung, kum za li leh sawmthum ahi.

⁴¹Kum za li leh sawmthum bei in hichi ahi a, huai ni ngei in hichi ahi a, Aigupta gam apan TOUPA’N mi tengteng a paikheta uhi.

⁴²Aigupta gam a kipan amau a pikhiak ziak in TOUPA ading in huai zan pilvangtak a tan ding ahi. Hiai TOUPA zan Israel suante’n a khang a khang a, pilvang tak a tan ding uh ahi.

⁴³TOUPA’N Mosi leh Aron kiang ah: “Hiai Paikan Ankuang dan ahi. Mikhual in hiai a neklouh ding ahi.

⁴⁴Himahleh michih sikha sum a leisa, a zek na sum nung in hiai a ne thei ding hi.

⁴⁵Gamdangmi leh sikha goih in hiai a ne ding ahi kei hi.

⁴⁶Inn khat a nekding ahi; inn apan sa, a bangmah na la thang ding uh ahi kei. A guh leng na hihtan ding uh ahi kei.

⁴⁷Israel khawmpi tengteng in hiai a zuih ding uh ahi.

⁴⁸Na kiang ua mikhual a om a, TOUPA adia Paikan Ankuang a um ding leh, pasalte zeksum ding ahi, huaikhit chiang in hongpai nai uhenla, um uhen. Amah gamsung a piang bang ahi dia; zeksum louh mi in a nek louh ding a hih ziak in.

⁴⁹Khotualmi ading leh na lak ua mikhual tam ading in dan khat a om ding ahi,” a chi hi.

⁵⁰Huchibang in Israel suan tengteng in a hih uhi. TOUPA’N Mosi leh Aron thu a piak bang in a hih uhi.

⁵¹Huai ni mah in hichi ahi a, TOUPA’N Aigupta gam apan Israel suante a pawlpi in a pikheta hi.