Read Paite Chin EKSODAS 13 Bible Online

EKSODAS 13 - Paite Chin bible

EKSODAS 13

¹Huan, TOUPA’N Mosi kiang ah thu a gen a,

²Piang masapen tengteng, Israel suante lak a sul hong peuhmah, mihing hi in ganta hita leh siangthou in sehtuamsak in, kei a ahi, a chi hi.

³Mosi in mite kiang ah, “Hiai ni theigige un, Aigupta gam apan na hongpawt khiak ni uhi, saltanna inn apan na hongpawt khiak ni uhi. Khut thahat in TOUPA’N hiai mun hontun lah ahi ngal a. Tanghou silngou sawh neklouh ding ahi.

⁴Hiai ni, Abib kha in na hong paikhia uhi.

⁵Hichi a honghi dia, TOUPA’N Kanante, Hitte, Amorte, Hivte leh Jebuste gam nou honpiak dia, na pipute uh kiang a, a kichiamna, bawngnawi leh khuaizu a luang gam a hontut chiang in, hiai biakna thilzek hiai kha in na tang ding uhi.

⁶Ni sagih tanghou silngou sohlouh na ne ding ua, a ni sagih ni’n TOUPA ading in Ankuangluina a om ding ahi.

⁷Ni sagih tanghou silngou sohlouh a kine dia; na kiang uah tanghou silngou sawh a kimu ding ahi kei. Na omna tengteng uah leng silngou muh in a om ding ahi kei hi.

⁸Huai ni’n na tapa na hilh dia. ‘Aigupta gam apan ka hong paikhiak lai a TOUPA’N kei adia a thilhih ziak a hiai kihih ahi’ na chi ding hi.

⁹Na ban ah nang ading in chiamtehna ahi dia, na mitte kikal ah theihgigena, huchi a na TOUPA dan na kam a a om theihna ding in TOUPA’N ban thahat a Aigupta gam apan nou a hon pikhiak ziak in.

¹⁰Huaiziak in kum teng in a hunbi in hiai dan na zui ding uh ahi.

¹¹Hichi ahi ding a, TOUPA’N, nang kiang leh na pipute kiang a, a kichiam bang a, Kanante gam a hontut chiang in, hiai a honpiak chiang in,

¹²TOUPA ading in sul hong tengteng na koihtuam dia, na neih ganta apan hongom, a nou masapen teng; a pate TOUPA a ahi ding uhi.

¹³Sabiltung nou masapen teng belamnou in na tan dia; huchi a na tat kei leh, a ngawng na hektan ding. Na tapate lak a mihing tapa masa tengteng na tan ding ahi.

¹⁴Hun hongtung ding ah hichi ahi ding a, na tapa in, ‘hiai bang ahia? chi a a hondot chiang in, nang a kiang ah, Ban thahat in TOUPA’N Aigupta gam apan, koltanna inn apan a hon lakheta’ a kiang ah na chi ding uhi.

¹⁵Hichi ahi a, Pharo in a hon paisak noplouh lai in, TOUPA Aigupta gam a piang masa tengteng, mihing a piang masate leh ganta a piang masate a that hi. Huaiziak in sul hong tengteng, pasal hi in, TOUPA kiang a ka lat ahi ua; himahleh ka tapate lak a piang masa tengteng ka tan hi.

¹⁶Huchi in na khut ah chiamtehna ding ahi dia, na mitte kikal a khaukhip ahi ding hi; TOUPA’N Aigupta gam apan ban thahat a, a hon pikhiak ziak in” na chi ding hi..

¹⁷Hichi ahi a, Pharo in huai mite a paisak lai in, Pathian in, nai zaw mahleh, Philistiate gamtawn in a pikei hi. Pathian in, “Kidouna a muh chiang un mite a kisik kha ding ua, Aigupta gam ah a kiheikik kha ding uh” a chih ziak in.

¹⁸Huchi in Pathian in mite a pikual a, Tuipi San gamdai lampi tawn in a pi hi. Huchibang in Aigupta gam apan Israel suante a pawlpawl a kizawm in a paitou uhi.

¹⁹Mosi in Joseph guhte a pua hi. “Pathian in pellou in a hongveh dia; hiai apan ka guhte na puak ding uh ahi” chi a Israel suante chihtak tak a, a kichiam ziak in.

²⁰Sukkoth apan a zin kheta ua, gamdai zul ah, Etham mun ah a giakta uhi.

²¹TOUPA a ma uah sun in meipi khuampi ding in, amaute lampi a pi ding in a pai a; zan in mei khuampi ding in, amaute vakna pe ding in; sun leh zan a pai hi.

²²Mite ma apan sun a meipi khuam ding ahihkeileh zan a mei khuampi ding a lamang ngeikei hi.