Read Paite Chin EKSODAS 14 Bible Online

EKSODAS 14 - Paite Chin bible

EKSODAS 14

¹Huan, TOUPA’N Mosi kiang ah thu a gen hi.

²“Israel suante kiang ah thu gen in. Kihei uhenla, Pi-hahiroth ma ah, Migdol leh tuipi kikal ah, Baal-Zephon zawntak ah giak uhen. A ma ah tuipi kiang ah na giak ding uh ahi.

³Israel suante tungtang thu, gamdai in a daltan ziak in gamsung ah a tang in buaigawp uh, Pharo in chi ding ahi.

⁴Amaute nungdelh ding in Pharo lungtang ka khauhsak ding. Pharo tung leh a sepaihte tung ah zahtak in ka om ding hi. Huchi a Aiguptate’n TOUPA ka hi, chih a theihna ding un” a chi hi. Huchibang in Israel suante’n a hihta uhi.

⁵Mite a paikheta uh, chih Aigupta kumpipa a hilh uhi. Pharo lungtang leh a sikhate lungtang mite siatna ding in hei in a om hi. “Eite na a sepna ua pan Israel i paisak uh, bangdia hiai hih i hi ua!” a chi uhi.

⁶A kangtalai a mansak a, a mite a tonpihta hi.

⁷Kangtalai hoihpen za guk, Aigupta gam a kangtalai tengteng leh a heutute chiat uh toh a tonpih hi.

⁸TOUPA’N Aigupta kumpipa Pharo lungtang a khauhsak a; Israel suante a nungdelhta hi. Israel suante hangsantak in a paikheta uhi.

⁹Himahleh Aiguptate’n a nungdelh ua, Pharo sakol tengteng leh kangtalai tengteng, a sakol tungtuangmite leh a sepaih pawlte Baal-zephon ma a, Pi-hahiroth pam a tuipi kiang a a giahna uah a phata uhi.

¹⁰Pharo in a honnaih lai in, Israel suante a daktou ua, ngai in, Aiguptate’n amau a hondelhta uhi. A lau mahmah ua; Israel suante TOUPA kiang ah a kapkhia uhi.

¹¹Mosi kiang ah, “Aigupta gam a han a omlouh ziak a gamdai a si dia hon pikhia na hi maw! Bang achia hichibang a honbawl dia Aigupta gam apan hon pikhia na hia?

¹²Aigupta gam a k’on hilh uh hiai thu ahi kei maw? Om maimai ni, Aiguptate na i septheihna ding in, chi’n. Gamdai a ka sih sang ua, kou adia Aiguptate nasep a hoihzawk ding ziak in” a chi uhi.

¹³Mosi in mite kiang ah, “Lau kei unla, ding dinden un, TOUPA hotdamna tuni a nou a hon etsak ding, en un. Tuni a na muh uh Aiguptate tangtawn a mu nawnlou ding na hih ziak un.

¹⁴TOUPA’N nou ading in a hon dousak dia, na paukei ding uhi” a chi hi.

¹⁵TOUPA’N Mosi kiang ah, “Bang a chia ka kiang a kap na hia? Malam a a paina ding un, Israel suante kiang ah thu gen in.

¹⁶Na chiang lik inla, tuipi tung ah na khut zankhia inla, sat in. Huchi in Israel suante tuipi laizang ah leihul ah a paisuak ding uhi.

¹⁷Ngai in, ken Aiguptate lungtang ka khauhsak dia; amaute a delhzui ding uhi. Pharo tung ah, a kangtalaite tung ah leh a sakol tungtuangmite tung ah zahtakhuaina ka kimuh ding hi.

¹⁸Pharo tung, a kangtalaite tung leh a sakol tungtuangmite tung a zahtakhuaina kakimuh chiang in, Kei TOUPA ka hi, chih Aiguptate’n a thei ding uh” a chi hi.

¹⁹Israelte giahphual ma a pai, Pathian angel a kisuan a, a nunglam uah a pai a; meipi ding a mailam ua kipan a kisuana, a nunglam uah a dingta hi.

²⁰Aiguptate giahphual leh Israelte giahphual kikal ah a hong omta a; amau ading in meipi leh khomial ahi a; himahleh zan in hiaite ading in vak a pia hi. Huchi in zankhua in a kuamah a kinaihtuah thei zawsam a omkei uhi.

²¹Mosi in tuipi tung ah a khut a zankhia a; TOUPA’N zankhua in suahlam huih hat in tuipi a paikik sak a, tuipi gam hul in a bawl a, tuite a kikhenta hi.

²²Tuipi lak a gam hul tung ah Israel suante a pai ua; a khut taklam uh leh a khut veilam uah amau ading in tuite bang a hong hita uhi.

²³Aiguptate’n a delh ua, Pharo sakol tengteng, a kangtalai tengteng, leh a sakoltungtuangmi tengteng nangawn tuipi lak ah amau nung ah a pailut uhi.

²⁴Hichi ahi a, zingsang a hong hih tak in TOUPA’N mei khuampi ding leh meipi khuampi ding kawm ah Aigupta sepaihte lam a en a, Aigupta sepaihte a hihbuaita hi.

²⁵A kangtalai khete uh a lakkhiak sak a, haksapi in a hawl ua; Aiguptate’n, “Israelte ma apan taikek ni. Amaute ading in TOUPA’N lah Aiguptate siatna ding in a dousak ngal a” a chi uhi.

²⁶TOUPA’N Mosi kiang ah, “Aiguptate tung leh, a kangtalaite tung leh, a sakol tungtuangmite tung a tuite a hongpai nawn theihna ding in, tuipi tung ah na khut zankhia in” a chi hi.

²⁷Mosi in tuipi tung ah a khut a zankhia a, zingsang a hong hih in tuipi a hatna ah a hong kiknawn a; Aiguptate a lak ah a taikek ua; tuipi lak ah TOUPA’N Aiguptate a thalpaihta hi.

²⁸Tuite a hong kiknawn ua, kangtalaite, sakoltungtuangmite leh Pharo sepaih a nung ua honglut tengteng tui in a khuhta hi. A lak uah khat lel leng dam a suakta omkei uhi.

²⁹Himahleh tuipi lak ah gam hul tung ah Israel suante a pai ua; a khut taklam uleh, a veilam uah tuite amau ading in bang ahita hi.

³⁰Huchibang in TOUPA’N huai ni’n Aiguptate khut apan Israelte a hondamta hi. Tuipi piau a Aiguptate si Israelte’n a mu uhi.

³¹Aiguptate tung a a nasep thupi Israelte’n a mu ua, TOUPA leh a sikha Mosi a gingta uhi.