Read Paite Chin EKSODAS 15 Bible Online

EKSODAS 15 - Paite Chin bible

EKSODAS 15

¹Huaikhit in Mosi leh Israel suante’n TOUPA kiang ah hiai la a sa uhi: “Thupitak a, a vualzoh ziak in, TOUPA kiang ah la ka sa ding. Sakol leh a tung a tuangmi tuipi ah a paikheta.

²TOUPA ka hatna leh la ahi, ka hotdamna a honghi a; ka Pathian ahi, omna ka bawlsak ding. Ka pa Pathian, huchi in amah ka tawisang ding hi.

³TOUPA galhatpa ahi: TOUPA a min ahi.

⁴Pharo kangtalaite leh a sepaihte tuipi ah a paikheta: a heutute uleng, Tuipi San ah a kelum uhi.

⁵Thukna in amaute a khuhta: Suang bang in a taw ah a tumta uhi.

⁶TOUPA aw, na khut taklam thilhihtheihna thupi a hong hita: TOUPA aw, na khut taklam in melma a gawi zanta hi.

⁷Na hoihna thupina in nang hondou dia thoute a zouta: na thangpaihna na sawlkhia a, huai in amaute buhpawl bang in a kangta hi.

⁸Na nakvangte mut in tuite kaihkhawm in a om ua, tui tampite vum bang a chian in a om, huchi in tuipi sunggil ah thuknate kipsak in a om hi.

⁹Melma in, Ka delh dia, ka pha dia, gallak ka hawm ding: huaite ah ka duhgawlna a tai ding, ka namsau ka phawi dia, ka khut in amau ka hihgawp ding, a chi hi.

¹⁰Nang na huih in na muta, tuipi in amau a khuhta hi; tui hatte ah ngen bang in a tumta uhi.

¹¹TOUPA aw, nang bang kua a om a? pathiante lak ah! Sianthouna a thupi, phatnate a lauhuai, thillamdang hih ah, Nang bang kua a om a?

¹²Na khut taklam na zankhia a, lei in amau a valhta hi.

¹³Na tatsa mite nang na chitna in na pikhia a; na tenna siangthou ah na hatna in amau na pita hi.

¹⁴Mite’n a za ua, a ling uhi: Palestin a tengte nattom in a manta.

¹⁵Huaichiang in Edom hausate’n lamdang a sa mahmah ua: Moab a mi thilhihtheite, linna in a man; Kanan a tengte tengteng a zulmang uhi.

¹⁶Launa leh kihtakna a tung uah a hongtung; na khut thupina in suang bang in a dai uhi; TOUPA aw, na mite’n a Paikan masiah uh, na leisa, na mite’n a Paikan masiah uh.

¹⁷Na gouluah tang ah amau na hontun ding a, Na suan ding, TOUPA aw, tenna ding a na kibawlna mun ah, Mun Siangthou ah, TOUPA aw, na khut in a lamkipsa ah.

¹⁸TOUPA’N tangtawn tangtawn in vai a hawm ding.”

¹⁹Pharo sakol kangtalaite leh a sakoltungtuangmite toh tuipi ah a pilut a, TOUPA’N a tung uah tuipi tuite a hon nilkhawm nawn a; himahleh Israel suante tuipi tung ah gam hul ah a pai uhi.

²⁰Miriam zawlneinu, Aron sanggamnu’n khuangta a khut in a la a; numei tengteng in khuangta toh lamkawm in a nung ah a zui uhi.

²¹Miriam in amau a dawng a, “Thupitak a, a vualzoh ziak in, TOUPA kiang ah la sa un; sakol leh a tungtuangmi tuipi ah a paikheta hi” chi in.

²²Huchibang in Tuipi San apan Mosi in Israelte a pi a, Sur gamdai ah a pai ua, gamdai ah ni thum a pai ua, tui a mu kei uhi.

²³Marah a hongtun un, Marah tuite a khat ziak in a dawn theikei uhi; Huaiziak in a min Marah a sa uhi.

²⁴Mosi dem in mite a phun ua, “Bang dawn ding i hia!” a chi uhi.

²⁵TOUPA kiang ah a kap a; TOUPA’N sing khat a ensak a, tui lak a a khiak leh, tui a hong limta hi. Huai ah amau ading in thuseh leh dan a bawl a, huai ah amau a enchian hi.

²⁶“Lungluttak a TOUPA na Pathian aw na ngaihkhiak a, a mitmuh a dik na hih a, a thupiakte a bil na doh a, a thusehte na zuih leh, Aiguptate tung a ka tut, huai hite lak a a bangmah na tung ah ka koih kei ding. Nang hon hihdampa TOUPA ka hi ngal a” a chi hi.

²⁷Elim, tuikhuk sawmlehnih omna leh tumsing sawmsagih omna a hongtung ua; huai a tuite kiang ah a giakta uhi.