Read Paite Chin EKSODAS 16 Bible Online

EKSODAS 16 - Paite Chin bible

EKSODAS 16

¹Huan Elim apan a zinzel ua, Israel suante Aigupta gam apan a pawt khiak nung uh a kha nihna, a ni sawmlehnga ni’n Israel suante Sin gamdai a tung ua, huai Elim leh Sinai kikal a om ahi.

²Gamdai ah Israel suante omkhawm Mosi leh Aron dem in a phun uhi.

³Israel suante’n a kiang uah, “Sa bel bulte a i tutlai un, kham tak a tanghou i neklai un, Aigupta gam ah TOUPA khut in na sizaw maile hang. Hiai a omkhawm tengteng kial a honthat dia, hiai gamdai ah n’on pikhiak tak ziak un” a chi uhi.

⁴TOUPA’N Mosi kiang ah, “Ngai in, nou ading in van apan tanghou k’on zusak ding. Huchi in mite a paikhe ding ua, niteng daih ding bangzah zah hiam a lakhawm ding ua, ka dan ah a om uhiam omlou, amau ka etchian theihna ding in.

⁵A ni guk ni’n, hichi ahi ding a, a honlakte uh a bawl ding ua; nitenga a lakkhawm uh mun nih a tam ahi ding” a chi hi.

⁶Mosi leh Aron in Israel suan tengteng kiang ah, “Nitaklam in huai hun in TOUPA’N Aigupta gam apan a hon pikhia chih na thei ding uhi.

⁷Zingsang in, huai hun in TOUPA thupina na mu ding ua; TOUPA kalh a na phunnate u lah a zata ngal a. Kou bang ka hi ua, ka tung ua na phun uh?

⁸Mosi in, Nitaklam a nekding sa, Zingsang a kham ding tanghou TOUPA’N a honpiak chiang in hiai na mu ding uhi. Amah tung a na phunnate uh TOUPA’N a zata ngal a. Kou bang ka hi ua? Kou kalh a phun na hi kei ua, TOUPA kalh a phun na hizaw uhi” a chi hi.

⁹Mosi in Aron kiang ah thu a gen a, “Israel suan omkhawm tengteng kiang ah TOUPA ma ah hong painai un. Na phunnate ulah a zata ngal a, chi in” a chi hi.

¹⁰Hichi ahi a, Aron in Israel suan omkhawm tengteng kiang a thu a gen lai in, gamdai lam a et uleh, ngai in, meipi ah TOUPA thupina a hong dawk hi.

¹¹TOUPA’N Mosi kiang ah thu a gen a;

¹²“Israel suante phunna ka za; a kiang uah thu gen in. Nitaklam in sa na ne ding ua, zingsang lam in tanghou na kham ding uhi. Huchi in TOUPA na Pathian uh ka hi, chih na thei ding uh” a chi hi.

¹³Hichi ahi a, nitaklam in vengkeng a hong kuantou ua, giahphual a hong tuamdim ua; zingsang in giahphual kimvel ah daitui a kia hi.

¹⁴Daitui kia a om nawnlouh tak in, ngai in, gamdai pumpi ah thil bem neu, leitung a zingdai tuikhal ngou chia a neu, a om hi.

¹⁵Israel suante’n a muh un, “Hiai Bang ahia?” a kichi tuah ua, bang ahia chih lah a thei ngalkei ua. Mosi in a kiang uah, Hiai TOUPA’N a honpiak na nekding uh tanghou ahi.

¹⁶Michih in a khamhun ding bang in la hen. Na mite uh zah dungzui in, michih ading in omer khat, la uhen chi a, TOUPA’N thu a piak hiai ahi. Michih in a puanin a om ading in la un” a chi hi.

¹⁷Israel suante’n huchibang in a hih ua, a khen in tam deuh, a khen in tawm deuh a la uhi.

¹⁸Omer in a teh uleh a tamla in bangmah a nei valkei a, a tawm la in bangmah a tasam kei hi. Michih in a kham ding bangzel in a la uhi.

¹⁹Mosi in, Kuamah in zingsang tan nutsiat neikei hen, a chi hi.

²⁰Hinapi in Mosi a ngaikhe kei ua; a lak ua khenkhatte’n zingchiang tan in a nusia ua, a than a, a uih hi. Huchi in Mosi a tung uah a hehta hi.

²¹Zingsang teng in, michih in a kham ding bangzel in a la ua; ni a hongsat chiang in a zul hi.

²²A ni guk ni’n hichi ahi a, tanghou a mun nih a tam mi khat ading in omer nih zel a la uhi. Khawmpite heutu tengteng a hong ua Mosi a hilh uhi.

²³Aman a kiang uah, “Hiai TOUPA chihsa ahi, zingchiang TOUPA adia Sabbath siangthou khawlna ahi. Na kan nop uleh tuni in kang unla; na huan ding uleh huan un. A valte zingchiang tan ading in kikoih un” a chi hi.

²⁴A zingchiang tan Mosi sawl bang in a koih ua, a uih kei a, than leng a omkei hi.

²⁵Mosi in, “Tuni in huai ne un; tuni lah TOUPA adia khawlni ahi ngal a. Tuni in gamlak ah tanghou na mu kei ding uhi.

²⁶Ni guk na lakhawm ding ua; himahleh a ni sagih ni khawlni ahi, huai ni’n bangmah a omkei ding” a chi hi.

²⁷Hichi ahi a, a ni sagih ni’n lakhawm ding in mi khenkhat a paikhia ua, himahleh bangmah a mu kei uhi.

²⁸TOUPA’N Mosi kiang ah, “Bang tan ka thupiakte leh ka dante zuilou ding na hi ua?

²⁹En in, TOUPA’N khawlni a honpiak ngal leh, a ni guk ni’n ni nih ading tanghou a honpia hi. Michih a mun ah om hen, a ni sagih ni’n a mun apan kuamah paikhe kei hen” a chi hi.

³⁰Huchi in mite a ni sagih ni’n a khawlta uhi.

³¹Israel inkawte’n a min Manna a sa ua; sing namtui chi bang ahi, a ngou; chep in tanghou pei khuaizu sawh a bang hi.

³²Mosi in, “Hiai thil TOUPA thupiak ahi. Na khang na khang ua ding in omer khat thundim un. Aigupta gam apan k’on pikhiak lai a, gamdai a k’on vakna tanghou a muhtheihna ding un” a chi hi.

³³Mosi in Aron kiang ah, “Bel la inla, huai ah omer khat manna dim koih in, TOUPA ma ah luikhia in, na khang na khang ua, zuihding in” a chi hi.

³⁴TOUPA’N Mosi thu a piak bang in, Aron in Thukhun ma ah, koih ding in a luitouta hi.

³⁵Gam kiluah a hongtun masiah uh, Israel suante’n kum sawmli manna a ne uhi. Kanan gamgi a hongtun masiah uh, manna a ne uhi.

³⁶Omer khat, ephah khat mun sawm ahi.