Read Paite Chin EKSODAS 17 Bible Online

EKSODAS 17 - Paite Chin bible

EKSODAS 17

¹Huan, Israel suante omkhawm Sin gamdai apan a zin ua, TOUPA thupiak bang a, a zin nung un Rephidim ah a puanin uh a kai uhi. Huai ah mite dawn ding tui a omkei hi.

²Huaiziak in mite’n Mosi a kinakpih ua, “Ka dawn ding uh tui honpia in” a chi uhi. Mosi in a kiang uah, “Bangdia hon kinakpih na hi ua? Bangdia TOUPA ze-et na hi ua?” a chi hi.

³Mite lah tuiduh in huai ah a dang uh a tak a; mite Mosi tung ah a phun ua, “Dangtakna a kou leh ka tate uh leh ka gante uh honthat dia, bangdia Aigupta gam apan hon lakhia na hia?” a chi uhi.

⁴Mosi TOUPA kiang ah a kap a, “Hiai mite tung ah bang ka hihdia? Suang a hon denglum ding in mansa in a om uhi” a chi hi.

⁵TOUPA’N Mosi kiang ah, “Mite ma ah pai inla, Israel upate tonpih inla; lui na satna chiang na khut in tawi inla, pai in.

⁶Ngai in, Horeb ah suangpi tung ah na ma ah ka ding dia, suangpi na sat dia, huai apan tui a hong pawtkhe ding, mite’n a dawn theihna ding un” a chi hi. Israel upate muh in huchibang in Mosi in a hihta hi.

⁷Huai mun min Massah leh Meribah a sa hi, Israel suante’n Toupa tong in, Amah ze-et a, “I lak uah TOUPA a om hia, omlou” a chih ziak un.

⁸Huaikhit in Amalek a hong kuan a, Rephidim ah Israelte a hong dou hi.

⁹Mosi in Joshua kiang ah, “Mi hon telkhia inla, pawtkhia ni’n, Amalek i dou ding. Zingchiang in ka khut a Pathian chiang tawi in tangvum ah ka kuan ding” a chi hi.

¹⁰Huchi in Mosi in a kiang a, a gen bang in Joshua in a hih a, Amalek a dou uhi. Mosi leh Aron leh Hur tang vum ah a hohtouta uhi.

¹¹Hichi ahi a, Mosi in a khut a liktouh chiang in, Israelte a hat ua; a khut a khiaksuk chiang in, Amalek a hat hi.

¹²Himahleh Mosi khut a gik a; huchi in suang a la ua, a nuai ah a koih uhi. Huai tung ah amah a tu a, Aron leh Hur in a khut a dop touhsak uhi. Khat, khat lampang ah, a dang, a dang lampang ah. Huchi in nitum matan a khutte a pangzou hi.

¹³Huchi in Joshua in Amalek leh a mite a namsau in a zouta hi.

¹⁴TOUPA’N Mosi kiang ah, “Theihgige ding in hiai laibu ah gelh inla, Joshua bil ah gennawn in. Van nuai apan Amalek theihgigena ka koihmang sipsip ding ziak in” a chi hi.

¹⁵Mosi in huai ah maitam a doh a, a min a sa hi.

¹⁶A khang a khang a TOUPA’N Amalek dou gige ding chi a a kichiam ziak in, a chi hi.