Read Paite Chin EKSODAS 18 Bible Online

EKSODAS 18 - Paite Chin bible

EKSODAS 18

¹Jethro, Midian siampu, Mosi sungpan, Mosi ading leh a mi Israelte adia Pathian in a hih tengteng leh Aigupta gam apan TOUPA’N Israelte a pikhiak dan a naza hi.

²Huchi in Jethro, Mosi sungpan, Zipporah, Mosi zi, a sawlkik nung in a na kem hi,

³Zipporah tapa nihte toh. Huai nih lak a khat min Gershom ahi a, “Melmak gam ah mikhual ka na hi” a chih ziak in.

⁴A dang min Eliezer ahi a, “Ka pa Pathian hon panpihpa ahi, Pharo namsau apan a hon tatkhiak ziak in” a chi hi.

⁵Jethro, Mosi sungpa a tapate leh a zi toh gamdai ah Mosi kiang ah a hong ua, Pathian tang a a puanin kaihna mun ah.

⁶Mosi kiang ah, “Kei na sungpa Jethro na kiang ah ka hong, na zi leh a kiang a a tapa nihte toh” a chi hi.

⁷Mosi, a sungpa dawn ding in a pawtkhia a, a kuna, a tawp a; bang na chi uhiam chi’n a kidong ua; puanin sung ah a lut uhi.

⁸Mosi in a sungpa Pharo tung leh Aiguptate tung a Israelte ziak a TOUPA thilhih tengteng leh lampi a haksatna a tung ua hongtung tengteng leh huaite apan TOUPA’N a tatkhiak dante a hilh hi.

⁹Aiguptate khut apan a tatkhiak, Israelte tung a TOUPA’N a hih hoihna tengteng ziak in Jethro a kipak hi.

¹⁰Jethro in, “Aiguptate khut apan leh Pharo khut apan hon tankhepa, Aiguptate khutnuai apan a mite tankhepa TOUPA’N nuamsa hen.

¹¹Tuin pathian tengteng sang in TOUPA a thupizaw, chih ka thei. Kisatheitak a Israel suante tung a thilhihte tung a hiai a hihtak ziak in” a chi hi.

¹²Jethro Mosi sungpan, haltum thillat leh thillat dangte Pathian ading in lan hi. Pathian ma a Ankuang umkhawm ding in Aron leh Israel Upa tengteng a hongpai uhi.

¹³Hichi ahi a, a zing in Mosi mipite vaihawm ding in a tu hi. Mipite zingsang apan nitaklam tan in Mosi kiang ah ading uhi.

¹⁴Mosi sungpan Mosi in mite tung a a hih tengteng a muh in, “Mite tung a hiai thil na hih bang ahia? Bangdia tangtut na hia? Bangdia zingsang apan nitaklam tan a mite na kiang a ding uh ahia?” a chi hi.

¹⁵Mosi in a sungpa kiang ah, “Pathian dong dia mite ka kiang a hongpai ahi uhi.

¹⁶Haksatna a neih chiang un, ka kiang ah a hongpai ua; khat leh a dang kikal ah vai ka hawm a, Pathian thusehte leh a dante ka theisak hi” a chi hi.

¹⁷Mosi sungpan a kiang ah, "Na thilhih a hoih kei hi.

¹⁸Nang leh na kiang a om hiai mite na segawp mahmah ding uhi. Nang adia hiai thil a gik luat ziak in, nang kia in na hih theikei hi.

¹⁹Tuin ka aw ngaikhia in, k’on thuhilh ding hi. Na kiang ah Pathian om hen. Pathian lam ah nang mite palai na hidia a thubuaite uh Pathian kiang ah na tun ding hi,

²⁰Thusehte leh dante amau na sinsak dia, a paina ding lam uh leh a nasep ding uh toh na ensak ding hi.

²¹Huailou in mite apan hithei, Pathian kihtakdan siamte, thutak mite, enna hawte na telkhe dia, amaute a tung uah na koih ding. Sangte vaihawmte, zate vaihawmte, sawmngate vaihawmte leh sawmte vaihawmte ahi ding uhi.

²²Hun tengteng in amau mite vai hawmsak uhen. Hichi ahi dia, thu lian chiteng nang kiang a hongtun ding ua, thu neu chiteng amau a ngaihtuah ding uhi. Huchi in nang ading in a baihlam zaw dia, na puakgik a hon puakpih ding uhi.

²³Hiai thil na hih a, huchibang a Pathian in thu a honpiak leh, huchi in na pangzou dia, hiai mite leng lungkim in a mun uah a paiding uhi” a chi hi.

²⁴Mosi in a sungpa aw a ngaikheta a, a gen tengteng a hihta hi.

²⁵Israel tengteng apan Mosi in mihitheite a telkhia a, mite tung a lutang in a bawlta hi. Sangte vaihawmte, zate vaihawmte, sawmngate vaihawmte leh sawmte vaihawmte in a bawl hi.

²⁶Hun tengteng in mite vai a hawmsak ua; thu haksate Mosi kiang ah a tun ua, thu neute amau a ngaihtuah uhi.

²⁷Huchi in Mosi in a sungpa a paisak a, a gam ah a paita hi.