Read Paite Chin EKSODAS 19 Bible Online

EKSODAS 19 - Paite Chin bible

EKSODAS 19

¹Aigupta gam apan Israel suante a hong paikhiak uh; a kha thumna, huai ni mah in Sinai gamdai a hongtung uhi.

²Rephidim apan pawtkhia in, Sinai gamdai a hongtung ua, gamdai ah a giak uhi. Huai ah Israelte’n tang mazawn ah puanin a kai uhi.

³Mosi Pathian kiang ah a hohtou a, TOUPA’N tang apan amah a sam a, “Hichibang in Jakob inkawte kiang ah na chi dia, Israel suante na hilh ding hi:

⁴Aiguptate tung a ka hihleh muvanlai khate a k’on tuah, keimah kiang ngei kontut dan na muta uhi.

⁵Huaiziak in tuin, ka aw na man taktak ua, ka thukhun na zuih taktak uleh, lei tengteng kei a a hih ziak in mite sang in kei ading in gou tuambik na hi ding uhi.

⁶Kei ading in siampute, lalgam leh nam siangthou na hi ding uhi. Hiai thute Israel suante kiang a na gen ding ahi” a chi hi.

⁷Mosi a hong a mite upate a samsaka, TOUPA’N amah a piak hiai thu tengteng a ma uah a luita hi.

⁸Mi tengteng in kituaktakin a dawng ua, TOUPA thugen tengteng ka hih ding uhi, a chi uhi. Mosi in mite thu TOUPA kiang ah a tun nawn hi.

⁹TOUPA’N Mosi kiang ah, “Ngai in, na kiang ah meipi sah in ka hong, na kiang a thu ka gen chiang a mite’n a zak theih ua, chiklaipeuh a nang a hon gintak theihna ding un” a chi hi. Mosi in mite thu TOUPA a hilh hi.

¹⁰TOUPA’N Mosi kiang ah, “Mite kiang ah hoh inla, tuni leh zingchiang a ding in amaute siangsak in, a puante uh sawp uhen.

¹¹A ni thumni ading in mansa in om uhen. A ni thum ni a mi tengteng muh a Sinai tangtung a TOUPA a hong paisuk ding ziak in.

¹²Mite kimvel ah dai na kai dia, tang a hohtou lou ding in pilvang un, ahihkeileh tang kim khoihlou ding in pilvang un. Kuapeuh tang khoih sihsak ngeingei ding ahi.

¹³Khut in a lawng ding uhi a hi kei, a lawng peuhmah suang a denlup ngeingei ahi dia; ahihkeileh kap pailet ahi ding. Gan hiam mihing hiam hileh leng, a hing kei ding. Pengkul sawtpi a gin chiang in, tang ah a hong tou ding uh ahi” a chi hi.

¹⁴Tang apan mite kiang ah Mosi a paisuk a, a puante uh a sawp uhi.

¹⁵Aman mite kiang ah, “Ni thum ni ading in kisakhol un; na zite uh naihkei un” a chi hi.

¹⁶A ni thum ni’n zingsang in hichi ahi a, vanpi gingte leh khophiate, tang tung a meipi sah, pengkul aw a ngaiha ngaih a hongomta a, giahphual sung a om mi tengteng a lingta uhi.

¹⁷Mosi in puanin apan mite Pathian toh kimu ding in a hon pikhia a; amau tang nuailam ah ading uhi.

¹⁸TOUPA mei a tangtung a, a hongkum ziak in Sinai tang a pumkhut vekta hi. Huai a meikhu meipi khu bang in a tungkaha, a tang pumpi a ling zungzung hi.

¹⁹Sawtpi pengkul ging a ngaih semsem lai in Mosi in thu a gen a, Pathian in aw in amah a dawng hi.

²⁰Sinai tangtung a tangvum tung ah TOUPA a hong paisuk hi. A tangvum tung ah TOUPA’N Mosi a samtou a; Mosi a hohtou hi.

²¹TOUPA’N Mosi kiang ah, “Paisuk inla, mite vauhilh in. En ding in TOUPA lam hong phuvang in a lak ua tampi a mangthang kha ding uhi.

²²TOUPA kiang a hongpai, siampute leng, kihih siangthou uhen, huchilou in zaw a tung uah TOUPA a puakzak kha ding” a chi hi.

²³Mosi in TOUPA kiang ah, "Sinai tang ah mite a hongtou theikei ding uhi. Tang kimvel in daikai inla, hih siangthou in chi a, n’on hilh ziak in," a chi hi.

²⁴TOUPA’N a kiang ah, "Pai in, kumsuk in. Na hongtou dia, nang leh Aron na kiang ah. Himahleh siampute leh mite’n TOUPA kiang a hong ding in hon phuvang kei uhen. Huchilou in zaw amaute tung ah a puakzak kha ding," a chi hi.

²⁵Mosi mite kiang ah a hohsuk a, a kiang uah thu a genta hi.