Read Paite Chin EKSODAS 2 Bible Online

EKSODAS 2 - Paite Chin bible

EKSODAS 2

¹Huan, Levi inn apan pasal khat a paikhia a, Levi tanu zi in a nei hi.

²Huai numei in nau a pai a, tapa a nei a, naupang melhoih ahi chih a theih in kha thum a selta hi.

³A sel zoh nawnlouh tak in, phaiphek bawm a bawlsak a, vahaibuan leh chim in a zutbit a, asung ah nau a koih a; luipang ah loupa kawm ah a koih hi.

⁴A sanggamnu, bang hongsuak hiam chih thei ding in gamla kuam ah ading hi.

⁵Pharo tanu lui ah kisil ding in a hong paisuk a; a nungzui numeite toh luigei ah a vak uhi. Loupa lak a bawm a mu a, a sikha numei khat va la ding in a sawl hi.

⁶A hon leh, naupang a muta a, ngai in, naungek a kapta hi. A hehpihta a, “Hiai Hebru tate lak a khat ahi” a chi hi.

⁷A sanggamnu’n Pharo tanu kiang ah, “Nau hon donsak ding, Hebru numeite lak a naudonmi khat k’on va sapsak na ut hia?” a chi hi.

⁸Pharo tanu in a kiang ah, “Kuan in,” a chi hi. Nungak a kuanta a, naungek nu a vasamta hi.

⁹Pharo tanu in a kiang ah, “Hiai nau la inla, hon donsak in. Na loh k’on pe ding” a chi hi. Huchi in huai numei in nau a lata a, a donta hi.

¹⁰Nau a khang a, Pharo tanu kiang ah a honpi a, huchi in a tapa a hong hita hi. “A min Mosi a sa a, tui apan ka kaihkhiak a hih ziak in,” a chi hi.

¹¹Huailai in hichi ahi a, Mosi a honglet in a unaute kiang ah a va hoh a, a puakgikte uh a va mu hi. A unaute lak a khat, Hebru mi khat Aigupta mi in a vuaklai a va muta hi.

¹²A dak loplop a, kuamah a omkei, chih a theihtakin, Aigupta mi a thatta a, piaunel ah a sel hi.

¹³A ni nih ni a, a va hohnawn leh, ngai in, Hebru mite lak a mi nih a na kisual ua; gilou hihpa kiang ah, “Bangdia na lawm vua na hia?” a chi hi.

¹⁴Aman, “Ka tung ua lal leh vaihawm dia nang kua’n honbawl ahia? Aigupta mi na thah bang a, hon thah tum na hi maw?” a chi hi. Huchi in, Mosi a lau a, “Hiai thil kithei khe petmah eive,” a chi hi.

¹⁵Pharo in hiai a zak in, Mosi thah ding in a zongta hi. Himahleh Pharo mai apan Mosi a taimangta a, Midian gam ah a tengta a; tuileh kiang ah a tu hi.

¹⁶Midian siampu in tanu sagih a nei a, amau a hongpai ua, tui a hontawi ua, a pa uh ganhon buahna ding in a tuitheite a dim uhi.

¹⁷Belamchingte a hong ua, a hawlmang uhi. Himahleh, Mosi ading a, amau a panpiha, a ganhon uh tui a buak hi.

¹⁸A pa uh Reuel kiang a a hongpai tak un, “Bang a chia, tuni’n hong paibaih ve uchia?” a na chi hi.

¹⁹Amau, “Belamchingte khut apan Aigupta mi khat in a hon hunkhia a, tui leng a hontawi chingsak a, ganhon a buak hi” a chi uhi.

²⁰Aman a tanute kiang ah, “Ahihleh amah kaw om ahia? Bangdia huai mi hon nusia? An ne ding in sam un” a chi hi.

²¹Mosi huai mi kiang a ten a lungkima, aman a tanu Zipporah Mosi a peta hi.

²²Tapa a neihsaka, melmak gam ah mikhual ka hita, a chih ziak in a min Gershom a sa hi.

²³Hun hongpai zel ah hichi ahi a, Aigupta kumpipa a sita a, huchi in a koltan ziak un Israel suante a thumthum ua, a kap ua, a kahna uh a koltan ziak un Pathian kiang ah a tungtou hi.

²⁴A mauna uh Pathian in a za a, huchi in Pathian in Abraham toh, Isak toh leh Jakob toh a thukhun a theigige hi.

²⁵Pathian in Israel suante a en a, Pathian in amau a zahtak hi.