Read Paite Chin EKSODAS 21 Bible Online

EKSODAS 21 - Paite Chin bible

EKSODAS 21

¹Huan, hiai vaihawmnate, a ma ua na ngak dingte ahi uhi.

²Hebru sikha na lei leh, kum guk sung nang na a sem dia, a kum sagih na ah bangmah pelou in noplen in a pawtkhe ding.

³Amah tuma honglut ahihleh, amah tum in a pawtkhe ding. Zi nei ahihleh, a zi in amah a zuikhe ding.

⁴A pu in zi a piak a, tapate hiam tanute hiam a neihsak leh, a zi leh a tate a pu a ahi ding ua, amah kia in a pawtkhe ding.

⁵Sikha in teltak a, “Ka pu ka it, ka zi leh ka tate ka it; noplen in ka pawtkhe kei ding” a chih leh;

⁶A pu in vaihawmte kiang ah amah a pi dia; kongkhak chiang ah hiam kongkhak khuam chiang ah hiam a pi dia, a pu in vuhna in a bil a vut pailet ding. Huchi in aman a pu na a sem tawntung ding hi.

⁷Min a tanu sikhanu dia a zuak leh, sikhapate bang in a paikhe kei ding.

⁸Amah khampa, a pu a lungkimsak kei leh, a pa a tankik sak ding. A tung ah muanhuailou tak a ahihleh melmak nam kiang a zuak ding in thuneihna a neikei.

⁹A tapa zi dia a deih leh, tanute bang in a bawl ding hi.

¹⁰Aman zi dang a neih thuah leh, a annek, a puansilh leh a piak ding a kilawm a sukkiam louh ding ahi.

¹¹A tung a hiai thumte ahihkeileh, sum leh pai pelou in noplen in a pawtkhe ding ahi.

¹²A sihna dia mi vua peuhmah, sihsak ngeingei ding ahi.

¹³Mi’n that ding in bukkei henla, Pathian in a khut ah pekhe zawta leh, a taina ding mun ka sehsak ding hi.

¹⁴Himahleh zekhem a amah that ding in, mi’n a invengte tung ah maingaltak in gamta leh a sihna ding in, amah ka maitam apan na la dia, a sih ding ahi.

¹⁵Kuapeuh in a pa hiam, a nu hiam vaw leh, sihsak ngeingei ding ahi.

¹⁶Kuapeuh in mihing gu in zuak leh, ahihkeileh a khut ah muhkhiak in om leh, amah sihsak ngeingei ding ahi.

¹⁷Kuapeuh in a nu leh pa hamsiat sihsak ngeingei ding ahi.

¹⁸Mite kisual uhenla, khat in khat suang in deng hiam, a khuttum hiam in tum henla, silou in, lupna ngakta leh;

¹⁹thounawn in, chiangkhun khun in kholak vak leh, a vawpa a hul dia; a hun sukbei man a pedia, amah a dam siangsak sipsip ding hi.

²⁰Mi’n a sikhapa hiam, a sikhanu hiam chiang in sat henla, a khut lum in si leh amah gawt ngeingei ding ahi.

²¹Himahleh ni khat hiam, ni nih hiam nung a dam a, a thohzoh leh, gawtlouh ding ahi; amah a pu neihsa a hih ziak in.

²²Mite kisual in, numei gailai hihna in, a nau tolh henla, himahleh siat detna in zuikei leh; numeinu pasal in a tung a, a chih bangbang a gawt ngeingei ding ahi. Vaihawmte’n a bikhiah bang uh a liau ding hi.

²³Siatna mawngmawng in zuita leh hinna tang a hinna a piak ding ahi.

²⁴Mit tang a mit, ha tang a ha, khut tang a khut, khe tang a khe.

²⁵Mei a hal tang a mei a hal, liam tang a liam, pawn tang a pawn.

²⁶Mi’n a sikha mit hiam, a sikhanu mit hiam suksak in, seta leh a mit ziak in noplen in a khah ding ahi.

²⁷A sikhapa ha hiam, a sikhanu ha hiam sukheta leh, a ha ziak in noplen in a khah ding ahi.

²⁸Bawngtal in pasal hiam, numei hiam, si in, sita leh; huai bawngtal denlup ngeingei ding ahi. A sa neklouh hial ding ahi. Himahleh a bawngtal nei pen gawtlouh in a suakta ding.

²⁹Himahleh huai bawngtal a malam a, a ki a misik hat hi a, a neitu kiang a hilhsa leng hinapi a, aman a na khum tuanlou ahihleh, pasal hiam, numei hiam a na siklup leh, huai bawngtal denlup ding ahi a; a neitu leng sihsak ding ahi.

³⁰A tung ah dangka sum a kiphut leh a kiphut bangbang a hinna tatna man ding in a pe ding ahi.

³¹Tapa hiam, tanu hiam a na sik leh, hiai vaihawmna bang a, a tung a hih ding ahi.

³²Bawngtal in sikhapa hiam sikhanu hiam a sik leh, a pu kiang ah dangka sekel sawmthum a pedia, bawngtal pen denlup ding ahi.

³³Pasal in kawkhuk sin hong henla, ahihkeileh pasal in kawkhuk tou henla, sin kei henla, asung ah bawngtal hiam sabiltung hiam ke leh,

³⁴Kawkhuk neitu in a bawlhoih a, a neipa kiang a dangka sum a piak ding ahi. Huchi in a gan si pen amah a ahi ding.

³⁵Mi khat bawngtal in midang khat bawngtal mah hihna henla, sita leh; a bawngtal hinglai pen a zuak ding ua, a sum a kihawm ding uhi. A bawngtal si pen leng a kihawm ding uhi.

³⁶Ahihkeileh a malam a huai bawngtal sikhat ahi, chih a kitheih a, a neitu in a khum kei chih a kitheih leh; bawngtal tang a bawngtal a piak ngeingei ding ahi. Huchi in a gan si amah a tuam ahi ding hi.