Read Paite Chin EKSODAS 22 Bible Online

EKSODAS 22 - Paite Chin bible

EKSODAS 22

¹Mi’n bawngtal hiam, belam hiam gu in gou hiam zuakta leh; bawngtal khat gun in bawngtal nga, belam khat gun in belam li a dit ding ahi.

²Guta inluh kimu in, kivua in sita leh a vawpa pen sisan suah chi a mawhsak theih ahi kei ding.

³Himahleh a tung ah ni a suah nung ahihleh sisan suah chi a mawhpaih theih ahi ding. Ditna kim a piak ding ahi. Piak ding bangmah a neih kei leh, a guktak ziak a amah zuak ding ahi.

⁴A van guk a khut a hinga a kimuh leh, bawngtal hiam ahihkeileh sabiltung hiam, ahihkeileh belam hiam hitaleh, a mun nih a piakkik ding ahi.

⁵Mi’n lou hiam, grephuan hiam nek a omsak in, a gan lutsak in, midang lou ah ta leh; amah lou hoihna pen leh amah grephuan hoihna pen apan ditna a bawl ding ahi.

⁶Mei hongkangin, linglak hong kuang in, buh hiam ahihkeileh hai ding lai hiam ahihkeileh lou kangse taleh; a mei khahpa’n ditna a bawl ngeingei ding ahi.

⁷Mi’n a invengpa kep ding in dangka sum hiam van hiam pe khia henla, huai mi inn apan kiguta leh; guta a kimuh leh a zahnih pia hen.

⁸Guta a kimuh kei leh, a invengpa van tung ah a khut a kha na hiam, chih theihna ding in inn neipa vaihawmte kiang ah a pi ding ahi.

⁹Tatlekna chiteng, bawngtal thu ah hiam, sabiltung thu ah hiam, belam thu ah hiam, puansilh thu ah hiam, van mang dan himhim hiam, midang in kei a ahi, a chih leh, a langtuak thu vaihawmmite ma a tut ding ahi. Vaihawmte mawhpaihpa’n a invengpa a lehnih a piak ding ahi.

¹⁰Mi’n a invengpa kiang ah a kep ding in sabiltung hiam, bawngtal hiam, belam hiam gan himhim hiam pe khia henla; si hiam, liam hiam, hawlmang hiam a om in, kuamah in muta kei leh;

¹¹TOUPA kichiamna amau gel kikal ah a om dia; a invengpa vantung ah a khut a khakei chihna; a van neipa’n huai a pom dia, adin kei ding hi.

¹²Amah apan guk a om leh, a neipa kiang ah ditna a bawl ding hi.

¹³Gan balnen in a na omta leh, a theihpihna ding in a sa hontawi hen, bohnen a om pen adin kei ding hi.

¹⁴Mi’n a invengpa banghiam khel henla, a neipen omlouh kal in liam in hiam si hiam in omta leh, a dit ngeingei ding ahi.

¹⁵Himahleh a neipa a kiang a om ahihleh adin kei ding. Van khelhman in adin khin lel hi.

¹⁶Khamsa hilou nungak siangthou khat pasal in zol henla, luppih leh, mouman pia in zi in a nei ngeingei ding ahi.

¹⁷A numei pa’n a kiang a piak a nial bilbel leh, nungak siangthoute man dungzui in sum a pe ding hi.

¹⁸Numei mitkhialdawitawi a hin na phal ding ahi kei.

¹⁹Ganta luppih peuhmah sihsak ngeingei ding ahi.

²⁰TOUPA kiang kia loungal, pathian himhim kiang a kithoih peuhmah hihsiat dimdem ding ahi.

²¹Mikhual na subuai hiam, na nuaisiah hiam ding ahi kei hi. Aigupta gam a mikhual na hihtak ziak un.

²²Meithai hiam, naupang paneilou hiam na hihgenthei ding ahi kei.

²³Bangchi teng a amau na gentheih sak a, ka kiang a a hong kah peuhmah uh leh, a kahna uh ka ngaikhe ngeingei ding hi.

²⁴Ka thangpaihna a sou dia, namsau in ka honthat ding hi. Na zite uh meithai ahi ding ua, na tate uh paneilou ahi ding uhi.

²⁵Na kiang ua om ka mite lak a mizawng kuapeuh kiang a sum na leitawi sakleh, leitawisakmi hih bang a sumpung na nek louh ding ahi.

²⁶Kichiamna a na inveng puansilh na lak leh, ni tumma a amah kiang a na va piakkik ding ahi.

²⁷Huai lah a kikhuhna neihsun ahi ngal a, a vun adia a puansilh ahi. Bang in a ihmu dia? Hichi ahi dia, ka kiang a, a hong kah chiang in ka za ding; hehpihthei ka hih ziak in.

²⁸Pathian na kou ding ahi kei a, na mite vaihawmmi leng na hamsiat ding ahi kei hi.

²⁹Na theigah min masate, na uain masate lan ding in na zekai ding ahi kei. Na tapate lak a piang masapen kei n’on piak ding ahi.

³⁰Huchi mah bang in na bawngtalte lak ah leng na hih ding ahi. Na belamte lak ah leng hiai bang in na hih ding ahi. Ni sagih sung a pi kiang ah na omsak dia, a ni giat ni a kei n’on piak ding ahi.

³¹Kei adia misiangthoute na hih ding uh ahi. Huaiziak in gamlak a gamsa nek bang sa himhim na neklouh ding uh ahi a; uite na pe zaw ding uhi.