Read Paite Chin EKSODAS 23 Bible Online

EKSODAS 23 - Paite Chin bible

EKSODAS 23

¹Thutut zuau na genzak ding ahi kei. Theihpih diklou hi ding in migiloute toh na kizop ding ahi kei.

²Gilou hih ding in mipi na zui ding ahi kei. Vaihawmna kaikawi ding in mi tam lamlam zui in amau na gum ding ahi kei.

³Thubuai genna ah mizawng dou in guptuam na nei ding ahi kei.

⁴Na melma bawngtal hiam sabiltung hiam taimang na tuah leh a kiang a na pinawn ngeingei ding ahi.

⁵Nang hon haw mi sabiltung, a vanpuak lel a puk na muh leh taisan lou a, na panpih ngeingei ding ahi.

⁶Thubuai a kihekna ah mizawngte ading in thukhenna na kaikawi ding ahi kei.

⁷Thil diklou apan gamlapi ah om in. Thil hihkhial lou leh midikte that ken; migiloute siamtangsak lou ding ka hih ziak in.

⁸Golhgukna na la ding ahi kei. Golhgukna in mit a tawsak a, midiktatte thu a kaikawi ngal hi.

⁹Huailou in mikhual na hihgenthei ding ahi kei. Mikhual lungtang na theih ziak in, Aigupta gam ah mikhual in na om ngeita uhi, chih thei in.

¹⁰Kum guk sung na gam ah haichi na tuh dia, a gahte na lakhawm ding.

¹¹Himahleh a kum sagihna na omsak kinken a, na khawlsak ding ahi; na mite lak a mizawngte’n a nektheihna ding un. A nutsiat peuh uh gamlaksate’n a ne ding uhi. Huchibang mah in na grephuan leh na olive huan tung ah na hih ding uhi.

¹²Ni guk sung nangmah nna nasem dia, a ni sagih ni’n na khawl ding; na bawngtal leh na sabiltung a khawl ua, na sikhanu tapa leh mikhual a halh theihna ding un.

¹³Na kiang a ka gen tengteng zui ding in pilvang inla; pathian dangte min louken, na kam apan zak in leng omkei hen.

¹⁴Kum khat sung in ka kiang ah Ankuangluina thumvei na bawl ding ahi.

¹⁵Tanghou silngou sohlouh Ankuangluina bawl in k’on thupiak bang in, Abib kha a hun sehsa in, ni sagih sung tanghou silngou sohlouh na ne ding ahi. Huai ni a Aigupta apan na hong paikhiat ziak in. Ka ma a kuamah khutvuak a a hong kilat ding uh ahi kei.

¹⁶Pawltak Ankuanglui, na sepgim gahte, lou a na tuh puaklutna Ankuangluina na bawl ding ahi. Na lou apan na sepgimna gahte na puaklut khit chiang in kumtawp ah, Puaklut Ankuanglui na bawl ding ahi.

¹⁷Kum khat sung in thumvei pasal tengteng TOUPA Pathian ma a a kilat ding uh ahi.

¹⁸Ka kithoihna sisan tanghou silngousoh toh na lat ding ahi kei. Ka kithoihna thau a zingsang chiang tan in a om ding leng ahi kei hi.

¹⁹TOUPA na Pathian inn a na gam gah masapente lak a masapen na laklut ding ahi. Kelnou, a pi nawitui in na huan ding ahi kei.

²⁰Ngai in, lampi a nang honkem ding leh ka mun bawlsa a nang hontun ding in na ma ah Angel khat ka sawl hi.

²¹A ma ah pilvang inla, a aw zui in, hehsak ken. Na tatleknate a ngaihdam louh ding ziak in. Ka min lah amah ah a om ngal a.

²²Himahleh a aw na zuih taktak a, ka gen tengteng na hihleh; na melmate tung ah melma ka hidia, nang hondoute tung ah doumi ka hi ding hi.

²³Ka Angel na ma ah pai dia, Amorte, Hitte, Perizte, Kanante, Hivte leh Jebuste lak a nang hon pilut ding ka hi ngal a; huchi in amau ka satkhe ding hi.

²⁴A pathiante uh ma ah na kun ding ahi kei. A na uh leng na sem ding ahi kei. A thilhihte bang uh leng na hih ding uh ahi kei. Himahleh amaute na zou siang sipsip dia, a milimte uh na hihzan dimdem ding ahi.

²⁵TOUPA na Pathian nna uh nasem ding ua, aman na annek tuidawn uh a vualzawl ding hi. Huchi in na lak ua pan chinatna ka lamang ding hi.

²⁶Kuamah nausia a omkei dia, na gamsung uah kuamah a chingkei ding. Na nite zah uh ka tangtung sak ding hi.

²⁷Na ma uah kei lauhna ka sawl dia, na hong tunna mi tengteng lak ah buaizakna ka omsak ding hi. Huchi in na melma tengteng nang apan ka taikek sak ding hi.

²⁸Na ma ah khuaizanta ka sawl dia, huai in Hivte, Kanante leh Hitte na ma apan a hawlkhe ding hi.

²⁹Kum khat sung in amaute na ma apan ka hawlkhe kei ding. A gam a hongvuak dia, noute hon hihse ding in gamsa a hongpung ding hi.

³⁰Na hongpun ua, gam naluah mateng, na ma ua pan amaute tawmkha kha in ka hawlkhe ding hi.

³¹Tuipi San apan Philistiate tuipi pha hial in, gamdai apan lui chiang pha in na gamgi ka khung ding. Na khut ua a gamluah mite k’on piak khiak ding ziak in na ma uah amaute na hawlkhe ding uhi.

³²Amau toh hiam a pathiante utoh hiam leng thukhun na bawl ding uh ahi kei.

³³Na gamsung uah a teng ding uh ahi kei. Nang ka tung ah a hon khialsak kha ding uhi. A pathiante uh nna nasep uleh huaite nou adia thang a hi ding hi.