Read Paite Chin EKSODAS 24 Bible Online

EKSODAS 24 - Paite Chin bible

EKSODAS 24

¹Huai nung in Pathian in Mosi kiang ah, “TOUPA kiang ah hongtou in, nang leh Aron, Nadab leh Abihu, leh Israel upate lak a sawmsagihte. Gamlapi apan in Pathian bia un.

²Mosi kia TOUPA kiang ah a hongpai ding. Himahleh amau a hongpai nailouh ding uh ahi. Mite leng amah toh a honghoh touhlouh ding uh ahi” a chi hi.

³Mosi a hongpai a, TOUPA thute leh vaihawmna tengteng mite a hilhta hi. Mite’n aw kituak in a dawng ua “TOUPA’N a chih thu tengteng ka hih ding uh” a chi uhi.

⁴TOUPA thu tengteng Mosi in a gelh a, zingsang in beltak in a thou a, tang nuai ah maitam a bawl a, Israel nam sawmlehnih dungzui in, khuam sawmlehnih a phut hi.

⁵Aman Israel suante lak a tangvalte a sawl a, amau TOUPA kiang ah haltum thillat leh lemna thillat in bawngtalte a lan uhi.

⁶Mosi in bawngtalte sisan kimkhat a la a, kuangkum sung ah a koih a; a sisan kimkhat maitam tung ah a theh hi.

⁷Thukhun Laibu a la a, mite zak in a sim hi. Mite’n “TOUPA’N a gen tengteng hih in a thu kamang ding uhi” a chi uhi.

⁸Mosi in sisan a la a mite tung ah a theh a, “Thukhun sisan en un, hiai thu tengteng thu a TOUPA’N a khun” a chi hi.

⁹Mosi, Aron, Nadab, Abihu leh Israel Upa sawmsagihte a paitou ua;

¹⁰Israel Pathian a va mu uhi. A khepek nuai ah sapphir suangmantam a bawl hileh kilawm leh van bang a siang a om hi.

¹¹Himahleh Israel suante lak a upate dou in Pathian in a tung uah a khut a likkei hi. Amau leng Pathian mu napi in hingdam a om in ne in a dawn uhi.

¹²TOUPA’N Mosi kiang ah, “Tang ah ka kiang ah hongtou inla, huai ah om in. Suangpekte a ka gelhsa dan leh thupiakte k’on pe ding; amaute na sinsak theihna ding in” a chi hi.

¹³Mosi leh amah huhpa Joshua ading khia ua, Pathian tang ah a hohtou uhi

¹⁴Upate kiang ah, na kiang ua ka hong kiknawn masiah uh hiai ah hon ngak un. Ngai un, Aron leh Hur na ompih uhi. Mi kuapeuh in thubuai bangpeuh gen ding na neih uleh, amah a kiang uah honghoh hen” a chi hi.

¹⁵Mosi tang ah a hohtou a, meipi in tang a khuhta hi.

¹⁶Sinai tang tung ah TOUPA thupina a om a, meipi in ni guk sung a khuh hi. A ni sagih ni’n meipi lak apan Mosi a samta hi.

¹⁷Tangvum tung a TOUPA thupina, Israel suante muh in kangmang thei mei bang ahi.

¹⁸Meipi lak ah Mosi a lutta a, tang ah a va hohtou hi. Mosi tang ah ni sawmli leh zan sawmli a va omta hi.