Read Paite Chin EKSODAS 25 Bible Online

EKSODAS 25 - Paite Chin bible

EKSODAS 25

¹Huan, TOUPA’N Mosi kiang ah thu a gen hi:

²Thillat a hontawi theihna ding un, Israel suante kiang ah thu gen in. Michih lungtang a uttak a pete apan thilpiak na la ding.

³Amau apan thilpiak na lak ding hiai bang ahi. Dangkaeng leh dangka leh dal.

⁴Puanmalngat dum, khau sandup, leh khau sanau leh khau hoih leh kel mul.

⁵Belampa vun sansaksa leh ngalvang vun leh singgi sing.

⁶Vak ding in sathau, thaunuh ding gimlim, gim namtui ading toh.

⁷Onik suangte, siampu puan leh awmtuamna a siat ding suangte.

⁸Mun siangthou hon bawlsak uhen; a lak ua ka ten theihna ding in.

⁹Nang k’on etsak bangbang in, biakbuk lim bang in leh a vanzat tengteng lim bang in na bawl ding ahi.

¹⁰Singgi sing in thukhun bawm na bawl ding ahi. A dunglam tong nih leh a kim ahi dia, a vailam tong khat leh a kim ahi dia, a sanlam tong khat leh a kim ahi ding hi.

¹¹Dangkaeng tak in na luan dia, a sunglam leh a pawlam na luan dia, a kimvel ah dangkaeng lallukhu bawl in a tung ah na bawl ding ahi.

¹²Dangkaeng in a sikkual li na sung dia, a ning lite ah na bulh ding. Sikkual nih a pang khat ah a om ding ua, sikkual nih dangte a pang khat ah a om ding uhi.

¹³Singgi sing chiang na bawl dia, dangkaeng in na luan ding hi.

¹⁴Thukhun bawm sik a sikkualte sung ah chiangte na thunlut dia, huaite thukhun bawn zawn a hih theihna ding in.

¹⁵Chiangte thukhun bawm sikkual sung ah a om ding uhi.

¹⁶Thukhun bawm sung ah ka honpiak theihsakna na koih ding ahi.

¹⁷Dangkaeng tak in chitna tutphah na bawl dia; a dunglam tong nih leh a kim ahi dia, a vailam tong khat leh a kim ahi ding.

¹⁸Chitna tutphah mong nihte ah, dangkaeng in cherubte na bawl dia, huaite sekthoh in na bawl ding ahi.

¹⁹A mong khat ah Cherub khat na bawl dia, Cherub dang a mong langkhat ah. A mong nihte ah chitna tutphah ah cherubte na bawl ding ahi.

²⁰Cherubte’n tungsang lam ah a khate uh a zakkhe ding ua, a khate ua chitna tutphah tuam in, a mai un a ki en tuah ding ua; cherubte mai chitna tutphah lam ah a om ding hi.

²¹Thukhun bawm tung ah chitna tutphah na koih dia; thukhun bawm sung ah k’on piak ding theihsakna na koih ding ahi.

²²Huai ah k’on kimuhpih dia, chitna tutphah tung apan, theihsakna thukhun bawm tung a om Cherub nihte kikal apan Israel suante kiang a thupiak k’on piak ding thil tengteng thu ah, k’on houpih ding hi.

²³Singgi in dohkan na bawl dia; a dunglam tong nih ahi dia; a vailam tong khat, a sanlam tong khat leh a kim ahi ding hi.

²⁴Dangkaeng tak in na luan dia; a kimvel in dangkaeng lallukhu na bawl ding ahi.

²⁵A kimvel in a gei khut chia in na bawl dia; a kimvel in a gei ah dangkaeng lallukhu na bawl ding ahi.

²⁶A sikkual ding in dangkaeng in li na bawl dia; sikkualte a ning lite a khe li tung a omte ah na koih ding.

²⁷Dohkan puakna ding chiangte a omna ding in a gei chin ah sikkualte a om ding uh ahi.

²⁸Singgi in chiangte na bawl dia, dangkaeng in na luan dia, huaite dohkan a kipuak theihna ding ahi.

²⁹A kuangte, a keute, a sinte, a noute, a sitna ding in na bawl ding hi. Huaite dangkaeng tak in na bawl ding hi.

³⁰Ka ma a dohkan tung ah tanghou sawmlehnih na koih gige ding hi.

³¹Dangkaeng tak in khawnvak koihna na bawl ding hi. Khawnvak koihna sekthoh in na bawl ding ahi. A kungpi leh a hiangte, a pakmum leh a pakte, a kibang mah in na bawl ding ahi.

³²A pangte apan hiang guk a kakhe dia; khawnvak koihna pang khat apan hiang thum, khawnvak koihna pang dang apan hiang thum.

³³Belkuang thumte makha bang a bawlte, hiang khat a pakmum leh pak; hiang dang a belkuang thumte makha bang a bawlte, pakmum leh pak; huchibang in khawnvak koihna apan a hongsuak hiang gukte.

³⁴Khawnvak koihna ah belkuang li makha bang a bawl a om ding ahi, a pakmumte leh pakte u toh.

³⁵Huai mah a hiang nihte nuai ah pakmum khat a om dia, huai mah a hiang nihte nuai ah a pakmum khawnvak koihna apan a hongsuak khia hiang gukte dungzui in.

³⁶A pakmumte leh a hiangte a kibang ding ua: avek in dangkaeng tak a sekthoh ahi ding hi.

³⁷Huai ah khawnvak sagih na bawl dia; khawnvakte a diam ding ua, a pang a vakna a piak theihna ding un.

³⁸A taitehte leh a meivukuangte, dangkaeng tak ahi ding ua;

³⁹belsuan tengteng toh dangkaeng tak talent khat a bawl ding ahi.

⁴⁰Tang a k’on etsak lim dungzui a bawl ding in pilvang in, a chi hi.