Read Paite Chin EKSODAS 27 Bible Online

EKSODAS 27 - Paite Chin bible

EKSODAS 27

¹Singgi sing in maitam na bawl dia, tong nga a sau, tong nga a za; maitam detdou ahi ding. A sanlam tong thum ahi ding ahi.

²A ning lite tung ah a kite na bawl dia; a kite a kibang ding ua; dal in na luan ding ahi.

³A meivu dohna ding belte na bawl dia, a luahna suahdul, kuangdal, keupi leh a sikkhut leh a meibel dai. A belsuan tengteng dal a na bawl ding ahi.

⁴Huai ading in dal in singkhul ding koihna len bang in na bawl dia; a tung a ning li ah dal sikkual li na bawl ding ahi.

⁵A nuailam maitam huapna nuai ah na koih dia; huchi a maitam laizanga, lente a kikim theihna ding in.

⁶Maitam ading in chiangte na bawldia, singgi sing chiangte dalin na luan ding ahi.

⁷Chiangte sikkual sung a thunlut ding ahi a; chiangte maitam sik nihte tung ah a om ding hi, a puakna ding in.

⁸Tang a k’on etsak bang in, singpekte ah a hawm na bawldia, huchibang in na bawl ding ahi.

⁹Biakbuk huang na bawl ding ahi. Simlam pang ading in simlam manoh in puankhai, huang umna ding in puanmalngat hoih sik khat ading in tong za a sau a om ding ahi.

¹⁰A khuam sawmnihte leh a kingakna khuakkuak sawmnihte dal ahi ding ua; khuamte khainate leh puanduangte dangka ahi ding uhi.

¹¹Huchi mah bang in mallam pang ah a saulam tong za a sau puankhai a om ding, dalkhuam sawmnihte leh a kingakna khuakkuak sawmnihte dangka chi khuam, a khaina leh puanduangte ahi ding hi.

¹²Tumlam pang a huang vailam ading in puankhai tong sawmnga a om ding. A khuamte uh sawm leh a kingakna khuakkuak sawm ahi ding.

¹³Suahlam a suahlam pang a huangsung umna vailam tong sawmnga ahi ding.

¹⁴Kongpi sik khatlam a puankhaite tong sawmlehnga ahi dia; a khuamte thum, a kingakna khuakkuak thum ahi ding.

¹⁵Langkhat lampang ah puankhai tong sawmlehngate a om dia; a khuamte thum leh a kingakna khuakkuak thum ahi ding.

¹⁶Huangsung kongpi ading in puankhai tong sawmnih a om dia, a dum, a sandup, a sanau leh puanmalngat hoih koptah, phim a khui ahi dia, a khuam uh li ahi dia, a kingakna khuakkuak li ahi ding hi.

¹⁷Huangsung kimvel a khuam tengteng dangka puanduang a gak ahi dia, a bannate dangka ahi dia, a kingakna khuakkuak dal ahi ding hi.

¹⁸Huangsung dunglam tong za khat ahi dia, a vailam tong sawmnga koipeuh ah, a sanlam tong nga puanmalngat hoih koptah a bawl, a kingakna khuakkuak dal ahi ding.

¹⁹Biakbuk a vanzat tengteng, a nasepna chiteng, a kilhbelhna sikzumte leh huangsung a kilhbelhna sikzum tengteng dal ahi ding ahi.

²⁰Israel suante meivak ding in olive thautak a bawl hontawi ding in thu na pe ding, khawnvak kuangsak gige ding in.

²¹Puanzak, theihpihna ma a om, pawlam a kikhawmte biakbuk ah, Aron leh a tapate’n TOUPA ma ah nitaklam apan zingsang lam tan in thu a pe ding uhi. Israel suante ziak in a khang a khang un tangtawn a ding in thuseh ahi ding hi.