Read Paite Chin EKSODAS 28 Bible Online

EKSODAS 28 - Paite Chin bible

EKSODAS 28

¹Israel suante lak apan na unaupa Aron leh a tapate siampu hi a ka na a sep theihna ding un la in. Aron leh a tapate: Nadab, Abihu, Eleazar leh Ithamar na la ding ahi.

²A thupina ding leh a kilawmna ding in na unaupa Aron ading in puan siangthou bawl in.

³Pilna kha a ka dimsak khutsiam tengteng kiang ah thu gen in, amau Aron puan, amah hihsiangna ding a bawltheihna ding un. Huchi a aman siampu nasepna mun a ka na a septheihna ding in.

⁴A puanbawl ding uh hiaite ahi: Awmtuam, siampupuan, puanaktual, puanakzem, lukhu leh kawnggak. Na unaupa Aron ading leh tapate ading in puan siangthou a bawl ding uh ahi, huchi a aman siampu nasepna mun a ka na sep a theihna ding in.

⁵Amau dangkaeng, a dum, a sandup, a sanau leh puanmalngat hoih a la ding ua;

⁶Dangkaeng, a dum, a sandup, a sanau leh puanmalngat hoih koptah in hoihtak a bawl in, siampupuan a bawl ding uhi.

⁷A liang nihte gei nihte a kimat ding ua; a kimatkhawm ding uhi.

⁸Siampu puanakzem gakna, puanduang kawnggak dangkaeng khau toh khau dum, khau sandup leh khau sanau siamtak a gat puanmalngat in a bawl ding uh ahi.

⁹Onik suang nih na la dia, huaite tung ah Israel suante min na gelh ding ahi.

¹⁰Suang khat tung ah a minte uh lak a guk, suang dang tung ah, a omlaite min guk dangte, a piandan bangzel un na gelh ding ahi.

¹¹Suainamna zungbuh khuakthoh a kigelh bang in, suang mantam khuak thoh a gelhsiamte gelh, huai suangmantam nihte ah Israel tapate min na gelh ding a, huai suang mantamte dangkaeng khuaksung ah na phum ding ahi.

¹²Huai suang nihte Israel suante adia theihgigena suang ding in siampu puan liangzang ah na koih ding. Huchi in theihgigena ding in Aron in a liangzang nihte tung ah TOUPA ma ah a minte uh a paw ding hi.

¹³Dangkaeng bulhna na bawl ding ahi.

¹⁴A mongte a dangkaeng tak khainiang nihte; pakkhi bang in na bawl dia, a kibulhnate ah pakkhi bang khainiangte na khih ding ahi.

¹⁵Vaihawmna omtuamna siamtakin na bawl dia; siampu puan bawl bang in na bawl ding, dangkaeng in, a dum in, a sandup in leh a sanau in leh puanmalngat hoih koptah in, na bawl ding ahi.

¹⁶Khep nih in a kikhep dia, a khep a dung a vai kikim, khap khat a sau leh khap khat a za ahi ding ahi.

¹⁷Huaite tung ah suangmantamte na bulh dia, suang vual li in. A vual khatna sardi suang, topaz suang leh karbankul suang ahi ding. Hiai a vualkhatna ahi ding hi.

¹⁸A vual nihna emerald suang, sapphir suang, leh diamond suang ahi ding ahi.

¹⁹A vual thumna liguri suang, agate suang leh amethis suang ahi ding.

²⁰A vual lina beril suang, onik suang leh jasper suang ahi ding hi. A bulhna ua dangkaeng bulh ding ahi.

²¹Suangte Israel suante min toh a kithuah dia, a min uh dungzui in sawmlehnih, chiamtehna gelhte bang in. Michih a min toh nam sawmlehnihte dungzui in ahi ding uhi.

²²Awmtuam tung ah pakkhi bang a bawl a mongte ah dangkaeng siang khainiang na bawl ding.

²³Awmtuam tung ah dangkaeng sikkual nih na bawl dia, huai sikkual nihte awmtuam mong nihte tung ah na koih ding hi.

²⁴Awmtuam mongte tung a om sikkual nihte ah dangkaeng pakkhi bang nihte na koih ding ahi.

²⁵Pakkhi bang khainiang nihte mong nih dangte bulhna nihte ah na khih dia, a ma a siampupuan liangzangte ah na koih ding hi.

²⁶Dangkaeng in sikkual nih na bawl dia, huai gei a siampu puan mong nihte tung ah na koih ding, a sunglam a siampu puan gei a om pen ah.

²⁷Dangkaeng in sikkual dang nihte na bawl dia, siampupuan gei nihte nuailam a a tung ah na koih ding, a malam sang a a kikhepna zawntak ah, siampu puan konggak lamdang tung tak ah.

²⁸A sikkual in awmtuam siampu puan sikkual ah puanduang dum toh na hen dia, huchi a siampupuan kawnggak lamdang tung a a om theihna ding in leh siampu puan apan awmtuam a kiphellouhna ding in.

²⁹Aron in, TOUPA ma a theihgige tawntungna dia, Mun Siangthou a a lut chiang in, a lungtang zawntak ah vaihawmna awmtuam tung ah Israel suante minte a paw ding hi. siampu Puansilh Dangte

³⁰Vaihawmna awmtuam ah Urim leh Thummim na koih ding. TOUPA ma in a valut chiang in, Aron lungtang zawn ah a om ding hi. Huchi in Aron in TOUPA ma ah a lungtang zawntak ah Israel suante vaihawmna a paw gige ding hi.

³¹Siampu puan puanaktual a dum in na bawl ding ahi.

³²A khung ah a awng a om dia; a laitak a, a awng kimvel ah gat thoh khihna a om dia, siklen puanak ban neilou hileh kilawm ahi ding, a kek louhna ding in.

³³A gei tung nuai ah, a dum in, a sandup in, leh a sanau in na bawl dia, a gei kimvel in. Dangkaeng dakte a kimvel in a kikal zel uah na bawl ding ahi.

³⁴Dangkaeng dak leh theibuhfai puanaktual gei tung ah a kivel in a om ding ahi.

³⁵Aron in na a sep chiang in huai a silh ding hi. Huchi in TOUPA ma a Mun Siangthou a, a lut chiang leh a hongpawt chiang in a ging a kiza dia, a sikei chih theihna ding in.

³⁶Dangkaeng tak in kuang na bawl dia, a tung ah na gelh ding, suai namna zungbuh bang a khuak in, SIANTHOUNA TOUPA A AHI chih na gelh ding ahi.

³⁷Huai laigelhna sikpek siampu dialkhip a, a mailam ah khau dum in na khihbelh ding ahi.

³⁸Huai Aron taltang ah a om dia, aman Israelte thillat siangthou toh kisai a, Israel suante khelhna a paw ding ahi. Huai Aron taltang ah a om gige dia, thillat siangthoute Toupa mai ah san ahi ding hi.

³⁹Puanmalngat hoih puanak na gan dia, puanmalngat in lukhu na bawl dia, a gat thoh in kawnggak na bawl ding hi.

⁴⁰Aron tapate ading in puanakte na bawl dia, kawnggakte na bawlsak ding. A thupina ding leh a kilawmna ding in lukhute amau ading in na bawl ding ahi.

⁴¹Huaite na unaupa Aron tung ah leh a kiang a a tapate tung ah na koih dia; amau thau na nilh dia, na septuam dia, na siansak ding ahi, siampu nasepna mun a ka na a sep theihna ding un.

⁴²A vuaktanna uh khuh ding in puan pheituam zumte na bawlsak dia; a tai apan a phei chiang a tun ding uh ahi.

⁴³Kihoupihna puanin a a lut chiang un hiam ahihkeileh Mun Siangthou a nasem dia dohkan kiang a, a hongpai chiang un, khelhna khatpeuh neih ziak a a sih louhna ding un huaite a sa tung uah a om gige ding ahi. Huchi in huai amah ading leh a nung a a suante ading in tangtawn a thuseh ahi ding hi.